1 Manase lafũ alɛɛ lefosi anyɔ fiɛ aabale ɔka, ni aale sɛka di Yerusalem alɛɛ afosi-anɔɔ-anɔɔ nɛ. Ɔya leyooto niale Hefsiba. 2 Ni aabla okpile di SAATE nwu anu, aatikanko ayududusaa ya di nnle be di SAATE nwu latososa ni di Israel batii anu sɛsaabla. 3 Aase ntakalekɔ be di ote Hesekia labibiɛ ni letofo; aakple aapɛ oleɔta akyikye aata Baal, aase kafɔɔ Asera owoso, fɛ mmle di Israel ɔka Ahab labla nii. Ni baawakasɔ baata osi asaa amuu, baasumu nya nɛ. 4 Aapɛ oleɔta akyikye di SAATE nwu olekatakɔ ka suoto di SAATE nwu labuɛ ni alɛ, "Di Yerusalem kamatɛ Leyooto nii." 5 Di SAATE nwu olekatakɔ nflɔnkɔ nwu nnyɔ yi, aapɛ oleɔta akyikye aata osi asaa amuu. 6 Aayɔ obisuɔtɔbi nɔɔ aata ole di ɔtɔ kamɛ, aatɔɔbla afasaa, sɛbɔ ɔkpɛ, asaa ɔkaalɛ ku anwuna kamɛ sɛsaabla. Aale sikpile kpinwu di SAATE nwu anu, aata ɔblɔ lafiɛ nwɔ.

7 Ni aayɔ Asera owoso wɔ aawola ni aalaatɛ di SAATE nwu olekatakɔ ka di SAATE nwu latɔkɔ ni Dawid ku obisuɔtɔbi nɔɔ Solomon alɛ, "Di olekatakɔ ka mmle ku Yerusalem, lediki ni di Israel ana amuu kamɛ, kamatɛ Leyooto nii dinaa ni kaloo. 8 Namasinta Israel batii kafɔɔ bakyɛ bakyi di kasɔ ka lata ni bawa lɛma, nse babalolaa mannyu, mambla kafɔɔ lɛsaa biala le lɛtɔkɔ ma nii, manle kafɔɔ Afiofa nii amuu ya di kpɛmblatɛ nii Mose lata ma nii." 9 Kafɔɔ batii nwu ditanu. Manase lata ma baayu osuku, nioso baabla sikpile kpinwu baalenkee nnle be di SAATE nwu lawɔɔsa ni di Israel batii anu.

10 SAATE nwu labuɛ aafenko di bakpɛmblatɛ ku Yaa ɔlaababuɛtɛtɛ nɔɔ suoto alɛ: 11 "Yuda ɔka Manase lɛbla ayududusaa sikpile se mmle. Eele sikpile kpinwu alenke Amori batii ba niale nwɔ ni katũ, ni aaleko Yuda katũ di sikpile ku afiɔ nɔɔ nɛ. 12 Nioso nnya ɔlaa wɔ di SAATE, Israel Yaa nwu kobuɛ ni alɛ: Kamayɔ ɔlaa kpile nwako di Yerusalem ku Yuda suoto alɛ otii biala atoko ya ni ma nu nwu ni kamatũtũkũ. 13 Kamayɔ lɛklapoosaa okũ wɔ layɔ ni di Samaria suoto ku kamantĩ okũ wɔ layɔ ni di Ahab leyo suoto ntika di Yerusalem suoto. Kamasunsú Yerusalem kundie fɛ mmle di otii nsunsú ni kasɛfɛ, ansunsú ka an-yɔ anfuusa ni kaasɔ. 14 Kamasĩ atesaa nii ya niebu nii, nin-yɔ ma nkpee di balo lɛma nnɛɛ. Balo lɛma kamayu ma, manlɛ kafɔɔ asaa lɛma mansifiko. 15 Diekye bɛɛbla okpile di anu nii, beekpee mi ɔblɔ diayɔ ni di dii le di bawa lɛma ladie ni di Egipte diɛbadu ni bia miɛ wɔ mmle."

16 Diɛkyakaa nii, Manase kafɔɔ lawii ntɔ kpinwu be nitabla ni lɛsalɛsaa, aayɔ mi aayiisa Yerusalem, diayɔ ni di disi le dialaase ni di disi le- diakyakaa ni ku okpile wɔ aata Yuda labla ni suoto, ni baabla okpile di SAATE nwu anu nɛ.

17 Di sɛsaabla bamba di Manase sɛka ole kamɛ ku n-ya amuu aabla ni, aakyakaa ni ku okpile wɔ aabla nii yi, bɛɛkpana nya beekpee di Yuda baka sekofolaa kukũ kamɛ. 18 Ni di Manase latɛ ɔnyɛɛ ku bate nɔɔ, ni baakookaa nwɔ di lɛkayo nɔɔ kɔba kamɛ, Usa kɔba. Ni di obisuɔtɔbi nɔɔ Amon layila nwɔ kaanya fɛ ɔka nɛ.

19 Amon lafũ alɛɛ afosi-anyɔ-anyɔ fiɛ aabale ɔka, ni aale sɛka di Yerusalem alɛɛ anyɔ nɛ. Ɔya leyoooto niale Masulemet, Harus wɔ niakye ni Yotba obisankobi aale. 20 Ni aabla okpile di SAATE nwu anu fɛ mmle di ote Manase labla ni nɛ. 21 Aakyɛ di ote sisuku simuu suoto; aasumu afiɔ ya di ote lasumu nii, ni aase katũ kaasɔ aata nya nɛ. 22 Aasĩ SAATE, bate nɔɔ Yaa nwu, ni atakyɛ di SAATE nwu sisuku suoto nɛ.

23 Ni di Amon banɔɔfotii nɔɔ lakũ kanwumbe di suoto nɔɔ, baalo nwɔ di lɛkayɔ nɔɔ kamɛ nɛ. 24 Ninfɛ di kasɔ nwu batii lalo batii ba bamuu niataka ni di Ɔka Amon suoto nɛ. Ni baayɔ obisuɔtɔbi nɔɔ Yosia baase ɔka di kasiɛkɔ nɔɔ nɛ.

25 Di sɛsaabla bamba se di Amon sɛka ole kamɛ, ku n-ya aabla ni yi, bɛɛkpana nya di Yuda baka sekofolaa kukũ kamɛ. 26 Baakookaa nwɔ di ɔkya nɔɔ kamɛ di Usa kɔba kamɛ. Ni di obisuɔtɔbi nɔɔ Yosia layila nwɔ kaanya fɛ ɔka nɛ.