1 Yosia lafũ alɛɛ anɛ fiɛ aabale ɔka, ni aale sɛka di Yerusalem alɛɛ afosi-atiɛ-ninwii nɛ. Ɔya leyooto niale Yedida; Adaia wɔ niakye ni Boskat obisankobi aale. 2 Aabla nle niasiɛko ni di SAATE nwu anu, aakyɛ di ote Dawid sisuku simuu suoto, atamunikĩi aafe oletanɛɛkyɛ ee ɔmɛntukyɛ.

3 Di Ɔka Yosia sɛka ole lɛlɛɛ lefosi-nɛnle kamɛ yi, aakpee Mesulam obisuɔtɔbi, Asalia obisuɔtɔbi, Safan wɔ niale ni kukũ kpanatɛ alɛ akyɛ SAATE nwu olekatɛkɔ. Aatɔkɔ nwɔ alɛ: 4 "Kata fakyɛ faalaatɔkɔ oletatɛ-nɔɔfo Hilkia falɛ asiisa koto ko di n-yoko banyuntɛ lafũ ni di batii nwu ɔkyɛ, baayɔ bawako ni SAATE nwu olekatakɔ. 5 Ayɔ koto nwu aakpee di batii ba baadiki alɛ batoonyu ni olekatakɔ nwu ɔkpɛ ɔbla nnɛɛ. Di ɔkpɛ banyuntɛ nwu bayɔ koto nwu bata bakpɛntɛ ba nikololaa ni SAATE nwu olekatakɔ. 6 Asaa bawolatɛ, ayo batofotɛ ku afuɔ seyoyiɛ batofotɛ. Ta ma baaya kafɔɔ sewoso ku afuɔ ya beewola babayɔ manlolaa ni olekatakɔ nwu. 7 Kafɔɔ diɛkaatɛ bɛɛkaalɛ ɔkpɛ banyuntɛ nwu bɛɛyɔ koto beekpee ni ninnɛɛ nkuntaa, diekye bɔɔbla di onukwale kanya."

8 Ni di oletatɛ-nɔɔfo nwu latɔkɔ kukũ kpanatɛ Safan alɛ, "Ntɔɔnya Kufiofa Kukũ nwu di SAATE nwu olekatakɔ." Ni aayɔ kũ aata Safan, ni aaka kũ nɛ. 9 Ninfɛ di kukũ kpanatɛ Safan lakyɛ aalaatɔkɔ ɔka Yosia alɛ: "Banɔɔfotii lɛfɔ ntɔɔyɔ koto ko niate ni di SAATE nwu alekatakɔ beekpee di bakpɛntɛ ku ɔkpɛ banyuntɛ nwu di olekatakɔ nnɛɛ." 10 Ninfɛ di kukũ kpanatɛ Safan lata ɔka letofo alɛ, "Oletatɛ nwu lɛtɛɛ kukũ kunwii." Ni di Safan laka kũ di ɔka anu nɛ.

11 Obe wɔ di ɔka lanu ni Kufiofa Kukũ nwu kamɛ sɛlaa, ni aabɛbɛɛ akpeele nɔɔ nɛ. 12 Ni di ɔka latɔkɔ oletatɛ Hilkia ku Safan obisuɔtɔbi, Ahikam ku Mikaia obisuɔtɔbi, Akbor ku kukũ kpanatɛ Safan ku ɔka kpɛmblatɛ Asaia alɛ: 13 "Bikyɛ biɛlaawolaa kamɛ di SAATE nwu nfũ bitɛɛ ku batii nwu ku Yuda omuu di lɛsaa le bɛɛkpana ni di kukũ ko mmle bɛɛnya ni kamɛ. SAATE nwu nnya ɔblɔ osie kanya ankpeeko wo, diekye bate loo ditakyɔɔ kukũ ko mmle sɛlaa atoko; batabla di sɛlaa se simuu bɛɛkpana ni kanya beefenko ni di suoto loo."

14 Ni di Hilkia, Ahikam, Akbor, Safan ku Asaia lakyɛ ɔlaabuɛtɛtɛ-sanko Hulda wɔ niale ni Harhas obisuɔtɔbi, Tikwa obisuɔtɔbi manlɛɛ ni Salum, ɔsɔfɔ ɔkyɛ nɛ. Nnwɔɔ niale akpeele katɛkɔ nyuntɛ nɛ. Aasiɛ di abaa kale kakyɛ nnyɔɔfa kamɛ di Yerusalem.

15 Ni di ɔsanko nwu latɔkɔ ma alɛ, "Nnya ɔlaa wɔ di SAATE, Israel Yaa nwu kobuɛ ni alɛ: Bitɔkɔ osuɔtɔ wɔ niekpee ye ni ɔkyɛ nii bilɛ, 16 ‘Nnya ɔlaa wɔ di SAATE nwu kobuɛ ni alɛ: Nyu, kamata ɔlaa kpile nwa di lɛba le mmle ku batii nini suoto, di mmle kanya bɛɛkpana ni lɛsaa biala di Yuda ɔka ntɔɔka nii. 17 Diekye batoosĩ mi, ni beefiɛ olufui bɛɛta bayaa bamba, beekpee mi ɔblɔ ku afiɔ ya amuu bɛɛbla ni ku nnɛɛ lɛma nɛ. Ɔblɔ kamafiɛ mi di lɛba le mmle kunɔmayɔɔ nii.’ 18 Bitɔkɔ Yuda ɔka, nnwɔ niekpee ye alɛ bibawolaa ni kamɛ di SAATE nwu nfũ bilɛ, ‘Nnya ɔlaa wɔ di SAATE, Israel Yaa nwu kobuɛ ni, di sɛlaa se bienu ni kanya: 19 Ta mmle di otu lɛfɔ lefũ kuokpee ni, fɛɛwakosa ni suoto lɛfɔ kasɔ di SAATE nwu anu, di obe wɔ feenu ni ɔlaa wɔ lɛkakatɛ ni di lɛba le mmle ku batii nini suoto, alɛ babale ni lɛkpaani, manwɔɔ ni oso, diekye faabɛbɛɛ ni akpeele lɛfɔ, faawi ni kaku di anu nii oso yi, ntoonu fɔ ɔlaa, SAATE nwu niebuɛ. 20 Nioso kamata fɔ fansifi bate lɛfɔ nfũ, mankookaa fɔ di atoko ɔkyɛ ole kamɛ. Anu lɛfɔ dilɔbanya ɔlaa kpile wɔ kamayɔ nwako ni di lɛba le mmle.’ "

Nioso baayɔ ɔsanko nwu kanya baakyɛnko ɔka.