1 Di Ahab kukpi sɛmaa, Moab lataka aayila di Israel suoto. 2 Ninfɛ di Ahasia lakpa aakye di fesre di leyo takale nɔɔ di Samaria, suoto nɔɔ lafũ nkɔ. Nioso aakpee batɔkyɛntɛ, aatɔkɔ ma alɛ, "Bikyɛ biɛlaakaalɛ Baal-Sebub, Ekron afiɔ nwu, aanyu nse kamataka di nkɔ be mmle lefũ ni suoto."

3 Kafɔɔ SAATE nwu tɔkyɛntɛ latɔkɔ Eliya, Tisbi otii nwu alɛ, "Kata fakyɛ faalaakyakako Samaria ɔka batɔkyɛntɛ nwu faakaalɛ ma falɛ, ‘Ta Yaa nnaa ni di Israel oso foofe falɛ fɔɔlaakaalɛ asaa di Ekron afiɔ, Baal-Sebub nfũ?’ 4 Nkpo oso nnya ɔlaa wɔ di SAATE nwu kobuɛ ni alɛ: ‘Flɔbataka di atensaa ya suoto fate nii. Kubio fabakpi!’ " Nioso Eliya lakyɛ.

5 Obe wɔ di batɔkyɛntɛ nwu lakple baasifi ni ɔka nfũ, aakaalɛ ma alɛ, "Be oso bitookple biɛwa?"

6 Ni baadiki kanya alɛ, "Osuɔtɔ onwii lawa aabakyakako wo, ni aatɔkɔ wo alɛ, ‘Bikple bitɔɔkyɛ biɛlaatɔkɔ ɔka wɔ niekpee ye ni kɔtɔ bilɛ, "Nnya ɔlaa wɔ di SAATE nwu kobuɛ ni alɛ: Ta Yaa nnaa ni di Israel oso fookpee batii falɛ balaakaalɛ asaa di Ekron afiɔ, Baal-Sebub nfũ? Nkpo oso flɔbataka di atensaa ya suoto fate nii. Kubio fabakpi!" ’ "

7 Ni di ɔka nwu lakaalɛ alɛ, "Ɔmɛn-suɔtɔ okle aale, aawa aabakyakako ye aatɔkɔ ye ɔlaa wɔ mmle?"

8 Ni baadiki kanya alɛ, "Aale osuɔtɔ onwii niakpee ni sinwini akpeele, aatika ni kafɔɔ bɔkɛɛ kukũ ofiamɛ di ɔtɔ."

Ni di ɔka nwu labuɛ alɛ, "Eliya, Tisbi otii nwu diale nɛ."

9 Ninfɛ di ɔka lakpee kakpɛ tunletɛ onwii ku batii afosi-anɔɔ baakyɛ Eliya nfũ nɛ. Kakpɛ tunletɛ nwu lakata aakyɛ Eliya wɔ niasiɛ ni di lekpenkpe nsintɛɛ, aalaatɔkɔ nwɔ alɛ, "Yaa otii, ɔka alɛ, ‘Soo fawa!’ "

10 Ni di Eliya latɔkɔ kakpɛ tunletɛ nwu alɛ, "Nse Yaa otii nle yi, ni ɔtɔ kukye osi kuwa kuɔbafiɛ afɔ ku batii afosi-anɔɔ lɛfɔ nwu!" Ninfɛ di ɔtɔ lakpa kuakye osi kuabafiɛ kakpɛ tunletɛ nwu ku batii nɔɔ nɛ.

11 Di nle mmle kamaa, ɔka lakple aakpee kakpɛ tunletɛ bamba ku batii afosi-anɔɔ baakyɛ Eliya ɔkyɛ. Ni di kakpɛ tunletɛ nwu latɔkɔ Eliya alɛ, "Yaa otii, nnya ɔlaa wɔ di ɔka nwu kobuɛ ni, alɛ, ‘Soo fawa wla!’ "

12 Ni di Eliya latɔkɔ kakpɛ tunletɛ nwu alɛ, "Nse Yaa otii nle yi, ni ɔtɔ kukye osi kuwa kuɔbafiɛ afɔ ku batii afosi-anɔɔ lɛfɔ nwu!" Ninfɛ di Yaa ɔtɔ nwu lakpa kuakye osi kuabafiɛ kakpɛ tunletɛ nwu ku batii afosi-anɔɔ nɔɔ nwu nɛ.

13 Nioso ɔka lakple aakpee kakpɛ tunletɛ tiɛfa ku batii afosi-anɔɔ. Kakpɛ tunletɛ tiɛfa wɔ mmle lakata aakyɛ aalaapɛ akunkyi nɔɔ di Eliya katũ aatikiti nwɔ lekoto alɛ, "Yaa otii, lekoto ta ɔlaa nii kunu fɔ kafutu ku batii afosi-anɔɔ ba mmle nkpa, bakpɛmblatɛ lɛfɔ! 14 Nyu, ɔtɔ ntɔɔkpa kuokye osi kuɔbafiɛ kakpɛ batunletɛ banyɔ kasale nwu ku batii lɛma. Kafɔɔ nunua ta ɔlaa nii kunu fɔ kafutu!"

15 Ni di SAATE nwu tɔkyɛntɛ latɔkɔ Eliya alɛ, "Tanyɛkɛ nwɔ, soo fakyɛ ku nnwɔɔ." Nioso Eliya lataka aasoo ku kakpɛ tunletɛ nwu baakyɛ ɔka nwu nfũ.

16 Ninfɛ di Eliya latɔkɔ ɔka nwu alɛ, "Nnya ɔlaa wɔ di SAATE nwu kobuɛ ni alɛ: Ta Yaa nnaa ni di Israel ata fɔ alɛ faakaalɛ ni oso feekpee batii falɛ balaakaalɛ asaa di Ekron afiɔ, Baal-Sebub nfũ nɛ? Ta fatɔɔbla ni nle mmle oso yi, diidii flɔbataka di atensaa ya suoto fate nii. Kubio fabakpi!" 17 Nioso ɔka nwu lakpi, ta SAATE nwu sɛlaa se kanya di Eliya lakakatɛ ni oso.

Ta Ahasia ditawɛ ni obisuɔtɔbi oso, Yoram niayila nwɔ kaanya fɛ ɔka, di Yuda ɔka Yehosafat obisuɔtɔbi, Yehoram lɛlɛɛ nyɔɔfa kamɛ. 18 Di Ahasia sɛka ole sɛsaabla bamba simuu ku nle aabla nii yi, bɛɛkpana nya beekpee di Israel baka sekofolaa kukũ kamɛ.