1 Ninfɛ di Elisa labuɛ alɛ, "Binu SAATE nwu ɔlaa. Nnya ɔlaa wɔ di SAATE nwu kobuɛ ni alɛ: Kɔsɛɛ nuakpa okle, babasunsũ nnaafũ bakilo banɔɔ ku akpaa bakilo lefosi, koto fututu kunwii di Samaria kayokontũ."

2 Ni di ɔnɔɔfotii wɔ kɔnɛɛ suoto di ɔka lakpɛ ni latɔkɔ Yaa otii nwu alɛ, "Nyu, nse bia SAATE nwu lɛsɛkɛtɛ osi n-yoko, nle mmle kafuo ɔwa kaanya?"

Ni di Elisa ladiki kanya alɛ, "Fabanya ni ku anu lɛfɔ amu, kafɔɔ flɔbale kuniwii nini!"

3 Ninfɛ di basuɔtɔ bana lawɛ ofiɛ sɛɛle di okpoo kplɛ nwu kayoko nɛ. Ni baatɔkɔ bawo alɛ, "Be oso buasiɛ ninfũ ninaase di obe wɔ bubakpi ni? 4 Nse buobuɛ bulɛ, ‘Buosifi okpoo kplɛ nwu kamɛ’- kɔka nkpe ninfa, ni bubakpi. Nse buosiɛ ninfũ kafɔɔ, bubakpi. Nioso bita busifi Siria batii kasikɔ buɔlaayɔ suoto buta. Nse beediɛ wo, bubasiɛ nkpa; nse beelo wo kafɔɔ, bubakpi."

5 Ni baataka ku kolesɛtũ baasifi Siria batii kasikɔ nɛ. Obe wɔ baadu ni kasikɔ nwu kanya, otii kuonwii ditawɛ ninfa. 6 Diekye SAATE nwu lata Siria batii nwu lanu bakeke ba di bapɔnkɔ nnanfi ni ku bapɔnkɔ ku bakpɛtɛ kplɛ sɛlɔ. Nioso baabuɛ baatɔkɔ bawo alɛ, "Binyu, Israel ɔka lɛyɔ Heti batii ku Egipte batii baka alɛ babakpɛ wo!" 7 Nioso baataka baatoso ku kolesɛtũ nwu, baadiɛ akpaayo lɛma ku bapɔnkɔ lɛma ku babɔkɛɛ lɛma ba nintuka ni atoo. Baadiɛ kasikɔ nwu fɛ mmle kaate nii, baata nkpa lɛma, baatoso.

8 Ni di basuɔtɔ ba niawɛ ni ɔfiɛ sɛɛle nwu ladu ni kasikɔ nwu kanya, ni baabuo lɛkpaayo ninwii kamɛ nɛ. Baale, baanyi ni baatuka koto fututu, koto sɛɛle ku akleesaa lɛma baasifiko baalaakookaa nɛ. Baakple baababuo lɛkpaayo bamba kamɛ baalaayɔ asaa awo baalaakokaa, nnya kafɔɔ.

9 Ni baatɔkɔ bawo alɛ, "Buloololaa bubla. Miɛ ninle ɔlaa biene dii, ni buole ni munta suoto loo nɛ. Nse buosoko diɛlaadu obe wɔ di kale lɛkpa nii, ni letoko naanfi kamawa wo di suoto. Ta bukyɛ buɔlaabuɛ ɔlaa wɔ mmle di ɔka leyo."

10 Nioso baakyɛ baalaalɛɛ okpoo kplɛ nwu kayoko banyuntɛ baatɔkɔ ma alɛ, "Buakyɛ Siria batii kasikɔ, kafɔɔ otii kuonwii ditawɛ- butanu kuonwii lɛkpanko- bapɔnkɔ ku babɔkɛɛ ba nintuka ni aatoo, beekpee ni sikũ beese ni, ku akpaayo lɛma lete baadiɛ fɛ mmle aate nii." 11 Ni di kayoko banyuntɛ lafaa baabuɛ ɔlaa nwu, ni kuakyaka lɛkayo nwu kamɛ nɛ.

12 Ninfɛ di ɔka lataka ku kakyɛ, ni aatɔkɔ banɔɔfɔtii nɔɔ alɛ, "Kamatɔkɔ ye lɛsaa le di Siria batii nwu lɛbla wo nii. Baye alɛ kɔka kolo wo; nioso beedie di kasikɔ nwu bɛɛlaawofa di lepoo kamɛ, beenyu alɛ, ‘Nwaako, babadie manwa, munmufũ ma ku nkpa, mumbuo di okpoo kplɛ nwu kamɛ.’ "

13 Ni di ɔnɔɔfotii nɔɔ onwii labuɛ alɛ, "Bita bakpɛtɛ nwu bawo bayɔ bapɔnkɔ ba niebu ni di okpoo kplɛ nwu banɔɔ. Mma kafɔɔ babate fɛle Israel batii ba bamuu niebu ni ninfũ- nwaako, ote babate fɛle Israel batii ba mmle niekpi nii. Nioso ta bukpee ma baalaanyu lɛsaa le niɛwa ni."

14 Nkpo oso baadiki bakeke ba di bapɔnkɔ nnaanfi ni banyɔ ku bapɔnkɔ lɛma, ni di ɔka lakpee ma Siria batii bakpɛtɛ nfũ nɛ. Aatɔkɔ bakatɛ nwu alɛ, "Bikyɛ biɛlaanyu lɛsaa le nikɔwa ni." 15 Baatikanko ma baalaadu bia Yordan okle, ni baanya di osuku nwu omuu, mmle baatɛtɛɛ ni akleesaa ku akpɛnsaa ya di Siria batii lafuki baayu ni di kakpɛ otoso lɛma kamɛ nɛ. Nioso batɔkyɛntɛ nwu lakple baabatɔkɔ ɔka. 16 Ninfɛ di batii nwu lakyɛ baalaayɔ kakpɛ kamɛ asaa di Siria batii kasikɔ nwu nɛ. Nioso baasunsũ nnaafũ bikilo batiɛ ku akpaa bakilo bakuɔ, koto fututu kunwii fɛ mmle di SAATE nwu labuɛ nii.

17 Ninfɛ di ɔka layɔ ɔnɔɔfotii wɔ kɔnɛɛ suoto aakpɛ ni aase di kayoko nwu kanya nɛ. Ni di batii nwu lananafu nwɔ di kayoko nwu kanya, ni aakpi nɛ. Fɛ mmle kanya di Yaa otii nwu labuɛ aatɛ ni, di obe wɔ di ɔka nwu lasoo aawa ni leyo nɔɔ. 18 Diawa fɛ mmle di Yaa otii nwu labuɛ aatɔkɔ ni ɔka alɛ, "Kɔsɛɛ nuakpa okle, babasunsũ nnaafũ bakilo batiɛ ku akpaa bakilo bakuɔ, koto fututu kunwii di Samaria kayokontũ."

19 Di ɔnɔɔfotii nwu latɔkɔ ni Yaa otii nwu alɛ, "Nyu, nse bia SAATE nwu lɛsɛkɛtɛ osi n-yoko, nle mmle kafuo ɔwa kaanya?" Ni di Yaa otii nwu ladiki kanya alɛ, "Fabanya ni ku anu lɛfɔ amu, kafɔɔ flɔbale kuniwii nini!" 20 Nni kafɔɔ niale lɛsaa le niatɛ diawa nwɔ ni di suoto nɛ. Diekye batii lananafu nwɔ di kayoko nwu kanya, ni aakpi nɛ.