BAKA 2 14

Yuda Ɔka Amasia

1 Di Yehoahas obisuɔtɔbi, Yehoas Israel ɔka lɛlɛɛ nyɔɔfa kamɛ, ni di Yoas, Yuda ɔka obisuɔtɔbi, Amasia lakye sɛka ole kasɔ di Yuda nɛ. 2 Alɛɛ afosi-anyɔ-anɔɔ aafũ fiɛ aabale ɔka. Aale sɛka di Yerusalem alɛɛ afosi-anyɔ-anaasĩ. Ɔya leyooto niale Yehoadin, aakye ni Yerusalem nɛ. 3 Aabla lɛsaa le niasiɛko ni di SAATE nwu anu, kafɔɔ ditale fɛ mmle di ote Dawid labla nii. Di lɛsaa biala kamɛ, aatikanko ote Yoas ɔsaabla nkpaamaa. 4 Kafɔɔ batabibiɛ ntakalekɔ nwu; ni di batii nwu lakple baatɔɔta ole, baatɔɔfiɛ olufui ninfa nɛ.

5 Obe wɔ di sɛka kalekɔ nwu latɛ siasiɛ nwɔ ni ninnɛɛ yi, aaloloo banɔɔfotii ba nialo ni ote, ɔka. 6 Kafɔɔ atalo batii ba nialo ni ote babisuɔtɔbi, ta di mmle bɛɛkpana ni di Mose Kufiofa Kukũ kanya, di nfũ di SAATE nwu labuɛ ni alɛ: "Batanlo bate di babi lɛma kanya, ee balo babi di bate lɛma kanya. Obiala akpi di sikpile nɔɔ simu kanya."

7 Amasia nwu niale nwɔ nialenkee ni Edom batii nkpe lefosi di Mmba Ɔtaata, aamufũ ni kafɔɔ Sela di kakpɛ kamɛ, aalɛɛ ni alɛ Yokteel, leyooto le niate ni dialaadu ni dii le baakpana ni sɛlaa se mmle.

8 Ninfɛ di Amasia lakpee batɔkyɛntɛ Yehoahas obisuɔtɔbi, Yehoas wɔ niale ni Israel ɔka, Yehu obisuɔtɔbi nfũ ku kanya ka mmle alɛ: "Wa fabakyakakoe, anu ku anu."

9 Kafɔɔ Israel ɔka Yehoas lakplesa kanya aata Yuda ɔka Amasia alɛ: "Owuu dibuu ninwii di Lebanon lɛta seda kanya di Lebanon alɛ, ‘Yɔ obisankobi lɛfɔ fata obisuɔtɔbi nii ayɔ.’ Ninfɛ di lepoo kamɛ bɔkɛɛ kplɛ onwii di Lebanon lawa aabananafu owuu dibuu nwu di nkpaa kalɔ nɛ. 10 Nwaako faalenkee Edom, ni di nunua fɔɔtakatɛsa suoto katoo nɛ. Wɛ Dibu di lelenkee lɛfɔ nwu, kafɔɔ siɛ di leyo lɛfɔ! Be oso foomiɛ ɔlaa ku kasɔ ɔpɛ fanta afɔ omu lɛfɔ suoto ku Yuda lele kafɔɔ?"

11 Kafɔɔ Amasia ditanu, nioso Israel ɔka Yehoas lalakpɛ. Nnwɔɔ ku Yuda ɔka Amasia lakpɛ bawo anu ku anu di Bet Semes di Yuda kasɔ. 12 Ninfɛ di Israel lalenkee Yuda, ni di kpɛtɛ biala latoso aasifi leyo nɔɔ nɛ. 13 Ni di Israel ɔka lamufũ Yuda ɔka Amasia wɔ niale ni Yoas obisuɔtɔbi wɔ niale ni Ahasia obisuɔtɔbi di Bet Semes nɛ. Ninfɛ di Yehoas lakyɛ Yerusalem aalaabibiɛ Yerusalem seyoyiɛ aatɛ kaasɔ, diayɔ ni di Efraim Kayoko dialaadu ni Leyokɔ Kayoko- kakyɛ nwu labla fɛ nkpaa alafa akuɔ lɛkaana. 14 Aayɔ koto sɛɛle ku koto fututu ku asaa ya amuu aanya ni di SAATE nwu olekatakɔ ku lɛkayo asaakatɛkɔ. Aakpaa kafɔɔ mba aamufũ ni di kakpɛ kamɛ, ni aakple aasifi Samaria nɛ.

15 Di Yehoas sɛka ole sɛsaabla bamba suoto, n-ya aabla ni ku n-ya aafũ ni leyooto, di kakpɛ ku Yuda ɔka Amasia nsi ni kaamɛ, bɛɛkpana nya beekpee di Israel baka sekofolaa kukũ kamɛ. 16 Ni di Yehoas latɛ ɔnyɛɛ ku bate nɔɔ, baakookaa nwɔ di Samaria ku Israel baka nɛ. Ni di obisuɔtɔbi nɔɔ Yeroboam layila nwɔ kaanya fɛ ɔka nɛ.

Yuda Ɔka Amasia Kukpi

17 Yoas obisuɔtɔbi, Amasia wɔ niale ni Yuda ɔka lasiɛ nkpa alɛɛ lefosi-anɔɔ di Yehoahas obisuɔtɔbi, Yehoas wɔ niale ni Israel ɔka kukpi sɛmaa. 18 Di Amasia sɛka ole sɛsaabla bamba suoto yi, bɛɛkpana nya beekpee di Yuda baka sekofolaa kukũ kamɛ.

19 Batii lakũ kanwumbe di Amasia suoto di Yerusalem, ni aatoso aasifi Lakis nɛ, kafɔɔ baakpee batii baati nwɔ baakyɛ Lakis baalaalo nwɔ ninfa. 20 Baayɔ kpi nɔɔ nwu baatika di pɔnkɔ suoto baawako baabakookaa di Yerusalem ku bate nɔɔ di Dawid Okpoo kplɛ kamɛ.

21 Ninfɛ di Yuda batii bamuu layɔ Asaria,*14.21 Nnwɔɔ mankple manlɛɛ Usia nɛ di obe wɔ atoofũ ni alɛɛ lefosi-akuɔ baase sɛka di ote Amasia kanya nɛ. 22 Nnwɔɔ niale otii wɔ niase ni Elat okpoo dibudi, aakplesa nwu aata Yuda, di Amasia latɛ ni ɔnyɛɛ ku bate nɔɔ sɛmaa nɛ.

Israel Ɔka Yeroboam Nyɔɔfa

23 Di Yoas obisuɔtɔbi, Yuda ɔka Amasia lɛlɛɛ lefosi-nɔɔnle kamɛ yi, ni di Yehoas obisuɔtɔbi, Yeroboam labale Israel ɔka di Samaria, ni aale sɛka alɛɛ afosi-ana-ninwii nɛ. 24 Aabla okpile di SAATE nwu anu, atadiɛ Nebat obisuɔtɔbi, Yeroboam sikpile kuonwii aatɛ, nse aata Israel labla nii. 25 Nnwɔɔ niale otii wɔ niase ni Israel kasɔ amɛ ofũ nɛ, diayɔ ni di Lebo Hamat dialaadu ni Araba Lekpo,*14.25 Lekpo nwu kafɔɔ ninle Mmba Lekpo nɛ di ɔlaa wɔ kanya di SAATE, Israel Yaa lakakatɛ aafenko ni di kpɛmblatɛ nɔɔ Amitai obisuɔtɔbi, Yona suoto, aale ni Yaa ɔlaabuɛtɛtɛ wɔ niakye ni Gat Hefer nɛ.

26 SAATE nwu lanya mmle diatoobuo ni otii biala di Israel osie kanya, ɔlanle woo ee nwɔ nisiko ni suoto; kuonwii ditawɛ aakyakaako ma nii. 27 Ta di SAATE nwu ditabuɛ alɛ abayɛɛsa ni Isarel leyooto di kolo kalɔ oso yi, ni aadiki ma aafenko di Yehoas obisuɔtɔbi, Yeroboam kɔnɛɛ kamɛ nɛ.

28 Di Yeroboam sɛka ole sɛsaabla bamba, n-ya amuu aabla ni ku nkpɛ nɔɔ be aalenkee nii, di mmle aakple aafũ ni Damasko ku Hamat, aakyuu nwu anyɔ niale ni Yaudi*14.28 Leyooto nwu ninle ole Yuda nɛ kale aata ni Israel nkyakaa nii yi, bɛɛkpana nya beekpee di Israel baka sekofolaa kukũ kamɛ. 29 Ni di Yeroboam latɛ ɔnyɛɛ ku bate nɔɔ Israel baka nɛ. Ni di obisuɔtɔbi nɔɔ Sakaria layila nwɔ kaanya fɛ ɔka nɛ.