1 Di Ahasia ɔya, Atalia lanya alɛ obisuɔtɔbi nɔɔ ntookpi nii, ni aawɔɔsa ɔka leyo kamɛ nimuu nɛ. 2 Kafɔɔ Ɔka Yehoram obisankobi, Yehoseba, aale ni Ahasia obilɛma-sankobi layu Ahasia obisuɔtɔbi, Yoas aatosoko di ɔka babisuɔtɔbi ba alɛ babalo ni kamɛ. Ni di Yehoseba layɔ Yoas ku nyuntɛ nɔɔ aalaakpee di letenyo kamɛ alɛ oowofasa nwɔ di Atalia suoto; di mmle manamalo ni Yoas. 3 Nioso Yoas ku nyuntɛ nɔɔ lawɛ di kawofakɔ nwu di SAATE nwu olekatakɔ alɛɛ akuɔ, di Atalia latoole ni sɛka di kasɔ nwu suoto.

4 Di lɛlɛɛ kuɛsinle kamɛ, Yehoiada lakpee baalɛɛ bakpɛtɛ kɔlafa akudi kanyabayilatɛ ku Kari batii ku ɔka asaa banyuntɛ baawako nwɔ di SAATE nwu olekatakɔ. Ni di Yehoiada labla kanya ninii ku mma, aayɔ ma aakpee di ntam kalɔ di SAATE nwu olekatakɔ nɛ. Ninfɛ aatuo ma ɔka obisuɔtɔbi nwu nɛ. 5 Ni aatɔkɔ ma alɛ, "Nnya lɛsaa le bibabla ni: Aye ba ninle ni akudi atiɛ, biofe ni ɔkpɛ kamɛ di Lɛnyɛɛtɛyi- akudi atiɛ lee nwu ninwii kanyu ɔka leyo, 6 dikudi tiɛfa ninwii di Sur Kayoko, di ditiɛfa ninwii kafɔɔ di kayoko ka di asaa banyuntɛ nwu sɛmaa-baatɔɔkyɛlɛnsa ni bawo di olekatakɔ nwu onyu suoto- 7 aye ba kafɔɔ di akudi anyɔ ya bule kamɛ ninankyɛ ni ɔkpɛ kamɛ di Lɛnyɛɛtɛyi suoto, bamuu lee bienyu olekatakɔ nwu bita ɔka. 8 Biyila bikyi ɔka nwu, osuɔtɔ biala ku lɛkpɛsaa nɔɔ di kɔnɛɛ nɔɔ. Dikpe ni bielo olele niɛwa ye katũ. Bitɛɛtɛɛ ɔka di kakɔ lele oofe."

9 Bakpɛtɛ kɔlafa nwu kanyabayilatɛ labla fɛ mmle kanya di oletatɛ Yehoiada labuɛ nii. Obiala lɛma lakpaa batii nɔɔ- mba ninkyɛ ni ɔkpɛ kamɛ di Lɛnyɛɛtɛyi suoto ku mba ninankyɛ ni ɔkpɛ kamɛ- baakyɛ oletatɛ Yehoiada nfũ. 10 Ninfɛ aayɔ akplɔ ku kubiafunsaa ya niale ni Ɔka Dawid ale, aate ni di SAATE nwu olekatakɔ aata kakpɛ kanyabayilatɛ nwu nɛ. 11 Asaa banyuntɛ nwu, obiala ku lɛkpɛsaa nɔɔ di kɔnɛɛ nɔɔ, layila baakyi ɔka- di oleɔta akyikye ɔlɔɔkɔ ku olekatakɔ nwu. Diayɔ ni di olekatakɔ nwu kala kasɔ dialaadu ni katoo kasɔ.

12 Ninfɛ di Yehoiada ladiki ɔka obisuɔtɔbi nwu aawako, aayɔ lɛkakoto nwu aatũkũsa nwɔ nɛ; aayɔ kanya ninii nwu kukũ aatɔɔ, ni aase nwɔ sɛka nɛ. Baapɛ Yoas ɔfɔɔ, ni di batii nwu lapɛ anɛɛkya baataasiwidi baabuɛ alɛ, "Ɔka asiɛ nkpa aklɛ!"

13 Obe wɔ di Atalia lanu ni asaa banyuntɛ ku batii nwu kudu, ni aakyɛ batii nwu nfũ di SAATE nwu olekatakɔ nɛ. 14 Aanyu, ni aanya ɔka nwu n-yɛ di lɛkpaka ɔlɔɔkɔ, fɛ mmle di ɔsaabla nwu late nii. Banɔɔfotii ku kukyukyoe bafɛtɛ lawɛ di ɔka ɔlɔɔkɔ, kasɔ nwu batii bamuu kafɔɔ latɔɔnya suoto lɛyɔɔ ku kukyukyoe ɔfɛ. Ninfɛ di Atalia labɛbɛɛ akpeele nɔɔ aafaa aabuɛ alɛ, "Kale abiɛsaa nɛ! Kale abiɛsaa nɛ!"

15 Ni di oletatɛ Yehoiada ladiki bakpɛtɛ kɔlafa kanyabayilatɛ ba niayila ni di bakpɛtɛ nwu kanya alɛ: "Bikpaa ɔsanko nwu bidieko di batii nwu kamɛ biwako, bielo olele nintikanko nwɔ ku kapamii." Diekye oletatɛ nwu labuɛ alɛ, "Diɛkaatɛ alɛ bielo ɔsanko nwu di SAATE nwu olekatakɔ kamɛ." 16 Nioso baamufũ nwɔ, di obe wɔ aadu ni lɛba le di bapɔnkɔ nfe mambuo ni ɔka leyo, ni baalo nwɔ ninfa nɛ.

17 Ninfɛ di Yehoiada labla kanya ninii di SAATE nwu ku ɔka ku batii nwu ntɛɛ alɛ babale SAATE nwu batii nɛ. Aabla kafɔɔ kanya ninii di ɔka ku batii nwu ntɛɛ. 18 Ni di kasɔ nwu batii bamuu lakyɛ Baal difiɔyo baalaabiɛ ni baatɛ kaasɔ nɛ. Baabibiɛ oleɔta akyikye ku afiɔ nwu wɔkyɔwɔkyɔ, baalo kafɔɔ Baal oletatɛ Matan di aleɔta akyikye nwu katũ.

Ninfɛ di oletatɛ Yehoiada layɔ asaa banyuntɛ aase di SAATE nwu olekatakɔ nwu nɛ. 19 Ni aakpaa bakpɛtɛ alafa kanyabayilatɛ, Kari batii, asaa banyuntɛ ku kasɔ nwu batii bamuu aasiisa, ni baalaakpaa ɔka di SAATE nwu olekatakɔ baasifiko ɔka leyo nɛ. Baafe di asaa banyuntɛ osuku kayoko. Ninfɛ di ɔka lasiɛ di kasiɛkɔ nɔɔ di lɛkakpomii suoto, 20 ni di kasɔ nwu batii bamuu lanya suoto lɛyɔɔ nɛ. Ni di okpoo kplɛ nwu layɔɔ buɛɛ nɛ, ta Atalia wɔ baalo ni ku kapamii di lɛkayo oso.

21 Alɛɛ akuɛnsĩ di Yoas lafũ fiɛ aakyako sɛka ole.