1 Di Ahasia obisuɔtɔbi Yoas, Yuda ɔka sɛka ole alɛɛ afosi-anyɔ-ditiɛfa kamɛ yi, Yehu obisuɔtɔbi, Yehoahas labale Israel ɔka di Samaria, ni aale sɛka lefosi alɛɛ akuɛnsĩ nɛ. 2 Aabla okpile di SAATE nwu anu ta aatikanko ni Nebat obisuɔtɔbi, Yeroboam sikpile se aata Israel batii labla ni, ata diɛ sĩ ni ɔbla oso. 3 Nioso ɔblɔ lafiɛ SAATE nwu di Israel suoto, ni aata ma baasiɛ di Siria ɔka Hasael ku obisuɔtɔbi nɔɔ osie kalɔ baaklɛ nɛ.

4 Ninfɛ di Yehoahas latikiti SAATE nwu lekoto, ni di SAATE nwu lanu aatɔɔ nɛ. Diekye SAATE nwu lanya mmle di Siria ɔka latɔɔbla ni Israel amumu. 5 Ni di SAATE nwu ladiki dikitɛ aata Israel, ni baadie di Siria osie nwu kalɔ nɛ. Nioso Israel batii nfɛ lasiɛ di ayo lɛma amu kamɛ fɛ mmle baasiɛ ni saa. 6 Kafɔɔ batadiɛ Yeroboam leyo kamɛ sikple se aata Israel labla ni ɔbla; baakple baatɔɔbla sĩ ɔbla. Nioso Asera owoso n-yɛ ɔyɛ di Samaria.

7 Lɛsalɛsaa ditabu Yehoahas bakpɛtɛ, diediki bapɔnkɔ basiɛtɛ afosi anɔɔ, bakeke ba di bapɔnkɔ nnanfi ni lefosi ku bakpɛtɛ ba ninkyɛ ni ninkpaa nkpe lefosi. Diekye Siria ɔka lawɔɔsa babule, aabla ma kafɔɔ fɛle kudu di kakpaa.

8 Sɛsaabla bamba di Yehoahas sɛka ole kamɛ, n-ya aabla ni amuu ku n-ya aafũ ni leyooto yi, bɛɛkpana nya beekpee di Israel baka sekofolaa kukũ kamɛ. 9 Yehoahas lakpi, ni baakookaa nwɔ di Samaria nɛ. Ni di obisutɔbi nɔɔ Yoas layila nwɔ kaanya fɛ ɔka nɛ.

10 Di Yuda ɔka Yoas alɛɛ afosi-atiɛ-dikuɛnsinle kamɛ yi, Yehoahas obisuɔtɔbi, Yoas labale Israel ɔka di Samaria, ni aale sɛka lefosi alɛɛ akuɛsĩ nɛ. 11 Aabla okpile di SAATE nwu anu, atadiɛ kafɔɔ sikpile se di Nebat obisuɔtɔbi, Yeroboam labla ni kuonwii, nse aata Israel labla nii; aanwini aatɔɔbla sĩ.

12 Di ablasaa bamba di Yoas sɛka ole kamɛ, asaa ya amuu aabla ni ku n-ya aafũ ni leyooto, di kakpɛ nɔɔ ɔkpɛ ku Yuda ɔka Amasia nkyakaa nii, bɛɛkpana nya beekpee di Israel baka sekofolaa kukũ kamɛ. 13 Yoas latɛ ɔnyɛɛ ku bate nɔɔ, ni di Yeroboam layila nwɔ kaanya fɛ ɔka di lɛkakpomii suoto nɛ. Ni baakookaa Yoas di Samaria ku Israel baka nɛ.

14 Ninfɛ di Elisa latɔɔfiɛ ofiɛ wɔ kamɛ aakpi ni nɛ. Israel ɔka Yoas lasoo aakyɛ aalaanyu nwɔ, ni aawi Elisa nɛ. Aawi aabuɛ alɛ, "Teete nii! Teete nii! Israel bakeke ku bapɔnkɔ basiɛtɛ!"

15 Ni di Elisa labuɛ alɛ, "Miɛ kɔtaa ku kɔtaa kubi kowo," ni aabla nkpo nɛ. 16 Ni di Elisa latɔkɔ Israel ɔka alɛ, "Yɔ kɔtaa nwu faklee di nnɛɛ lɛfɔ." Obe wɔ aayɔ kũ aaklee ni di nnɛɛ nɔɔ, ni di Elisa layɔ nnɛɛ nɔɔ aakpee di ɔka nwu nnɛɛ kamɛ nɛ.

17 Ni di Elisa latɔkɔ Israel ɔka alɛ, "Sɛkɛtɛ kufĩ katunkɔ sɛfle," ni aasɛkɛtɛ nwɔ nɛ. Ni di Elisa labuɛ alɛ, "Taa!" ni di ɔka nwu lataa nɛ. Ninfɛ di Elisa labuɛ alɛ, "SAATE nwu lelenkee kɔtaa, lelenkee kɔtaa di Siria suoto! Fabawɔɔsa Siria batii fɛɛ di Afek okpoo kplɛ nwu."

18 Ninfɛ di Elisa latɔkɔ nwɔ alɛ, "Yɔ kɔtaa nwu," ni di ɔka nwu layɔ kũ nɛ. Ni di Elisa latɔkɔ nwɔ alɛ, "Yɔ fatofo kaasɔ." Ninfɛ di ɔka nwu layɔ kɔtaa nwu aatofo kaasɔ sitiɛ, ni aadiɛ nɛ. 19 Ninfɛ di Yaa otii nwu lanya ɔblɔ aakpeeko nwɔ aabuɛ alɛ, "Nse fan-yɔ fantofo kaasɔ sɛnɔɔ ee sikuɔ; ni nse fatabalenkee Siria fanwɔɔsa nwu fɛɛ. Kafɔɔ kanunua sitiɛ lete fabalenkee nwu."

20 Ni di Elisa lakpi baakookaa nwɔ nɛ.

Moab batii ba ninfũ ni asaa di batii nnɛɛ ntoobuo kale nwu di kɔkyɛɛ biala kamɛ. 21 Obe onwii kamɛ di Israel batii latookookaa ni osuɔtɔ onwii, nfanwu baanya batii ba ninfũ ni asaa di batii nnɛɛ dikudi; nioso baafuki kpi nwu baakpee di Elisa ɔkya kamɛ. Obe wɔ di kpi nwu lakaa ni di Elisa akufi yi, osuɔtɔ nwu lasɛnkɛ, ni aataka aayila ninkpaa nɔɔ nɛ.

22 Siria ɔka Hasael lanyinka Israel di Yehoahas sɛka ole nwu omuu kamɛ. 23 Kafɔɔ SAATE nwu lale ma sibualɛ, aanya ma nyaami, ni aayɔ nwu ole di suoto lɛma ta kanya ninii nɔɔ nwu ku Abraham, Isak ku Yakob oso nɛ. Diɛbase ni bia miɛ oloomiɛ alɛ awɔɔsa ma ee akyisa ma di anu nɔɔ.

24 Siria ɔka Hasael lakpi, ni di obisuɔtɔbi nɔɔ Ben-Hadad layila nwɔ kaanya fɛ ɔka nɛ. 25 Ninfɛ di Yehoahas obisuɔtɔbi, Yoas lakple aafũ sekpoo se di Hasael obisuɔtɔbi, Ben-Hadad lafũ ni di ote Yehoahas nnɛɛ nɛ. Sitiɛ simu di Yoas lalenkee nwɔ, nioso aakple aafũ Israel batii sekpoo nwu.