1 Ninfɛ di Elisa latɔkɔ ɔsanko wɔ obisuɔtɔbi aasɛnkɛsa ni alɛ, "Die ninfũ minko leyo lɛfɔ batii bilaasiɛ kɛɛkɛ di lɛba lele biafuo, diekye SAATE nwu ntɔɔta kɔka makpɛ di kasɔ nwu suoto alɛɛ akuɛnsĩ." 2 Nioso ɔsanko nwu latuna alɛ ɔɔbla fɛ mmle di Yaa otii nwu labuɛ nii. Ni di ɔsanko nwu ku leyo nɔɔ batii lasifi baalaasiɛ di Filisti batii kasɔ alɛɛ akuɛnsĩ nɛ.

3 Di alɛɛ akuɛnsĩ kayɛntɛkɔ ɔsanko nwu ladie di Filisti batii kasɔ, ni aakyɛ ɔka nfũ alɛ ɔɔlaatikiti nwɔ lekoto di leyo ku kasɔ nɔɔ suoto nɛ. 4 Ɔka nwu latɔɔkakatɛ ko Yaa otii nwu kpɛmblatɛ Gehasi ni aabuɛ alɛ, "Tɔkɔ mi asaa kplɛ ya amuu di Elisa ntɔɔbla ni." 5 Di Gehasi latɔɔtɔkɔ ɔtɔkɔ ɔka mmle di Elisa lasɛnkɛsa ni bakpi yi, ni di ɔsanko wɔ obisuɔtɔbi di Elisa lasɛnkɛsa ni lawa alɛ ɔɔbatikiti ɔka lekoto di leyo ku kasɔ nɔɔ suoto nɛ.

Ni di Gehasi labuɛ alɛ, "Nnya ɔsanko nwu, saate nii, nnya obisuɔtɔbi nɔɔ wɔ di Elisa lasɛnkɛsa ni."

6 Nioso ɔka lakaalɛ ɔsanko nwu, ni aatɔkɔ nwɔ nɛ.

Ni di ɔka ladiki ɔnɔɔfotii onwii alɛ anyu ɔsanko nwu ɔlaa, ni aatɔkɔ nwɔ alɛ, "Kplesa lɛsaa biala ninle ni ɔsanko nwu lele fatɔɔ ku koto ko kumuu niakye ni kasɔ nɔɔ nwu suoto, diayɔ ni di dii le aadie ni di kale nwu diɛbadu ni kanunua."

7 Elisa lakyɛ Damasko, ni di Siria ɔka Ben-Hadad latɔɔfiɛ nɛ. Obe wɔ baatɔkɔ ni ɔka alɛ, "Yaa otii nwu ntɔɔkata ɛɛwa ni ninfũ," 8 ni di ɔka latɔkɔ Hasael alɛ, "Yɔ lɛkyɛsaa lewo faklee faalaakyakako Yaa otii nwu. Kaalɛ SAATE nwu fafenko di suoto nɔɔ; kaalɛ nwɔ falɛ, ‘Kamataka di ɔfiɛ wɔ mmle suoto?’ "

9 Nioso Hasael lakyɛ aalaakyakako Elisa, aaklee kapubapɔnkɔ afosi ana atoo, niale ni Damasko asaa biene, biene amuu, fɛ akyɛsaa. Ni aakyɛ aalaayila di Elisa anu aabuɛ alɛ, "Obisuɔtɔbi lɛfɔ Ben-Hadad, ninle ni Siria ɔka niekpee mi alɛ makaalɛ fɔ nlɛ, ‘Kamataka di ɔfiɛ wɔ mmle suoto?’ "

10 Ni di Elisa ladiki kanya alɛ, "Tɔɔkyɛ falaatɔkɔ nwɔ falɛ, ‘Nwaako fabataka’; kafɔɔ SAATE nwu lediki eetuo mi alɛ kubio abakpi." 11 Ninfɛ di Elisa latoonyu nwɔ tunwĩi dialaase di obe wɔ di sinunsɔ lakpɛ ni Hasael. Ninfɛ di Yaa otii nwu lakyako owi nɛ.

12 Ni di Hasael lakaalɛ nwɔ alɛ, "saate nii, be oso foowi?"

Ni di Elisa ladiki kanya alɛ, "Diekye n-ye lɛsaa kpile le fababla ni Israel batii. Fabakpee ɔtɔ di aba lɛma ya beetofo seyoyiɛ beekyisa nii. Fanlo bakosopo lɛma ku kapamii, fan-yɔ babi lɛma fanlaasa ni kaasɔ, fambɛbɛɛ ni bamɛlakatɛ lɛma nfutu."

13 Ni di Hasael labuɛ alɛ, "Lɛ di kpɛmblatɛ lɛfɔ, weewee ko ale ni, kabla lɛsaa kplɛ le mmle?"

Ni di Elisa ladiki kanya alɛ, "SAATE nwu ntootuo mi alɛ fabale Siria ɔka."

14 Ninfɛ di Hasael ladiɛ Elisa aakple aasifi saate nɔɔ nfũ nɛ. Ni di Ben-Hadad lakaalɛ nwɔ alɛ, "Obe di Elisa lɛtɔkɔ fɔ?" Hasael ladiki kanya alɛ, "Aatɔkɔ mi alɛ nwaako fabataka." 15 Kafɔɔ kaleesɛ Hasael layɔ dibula le ninkpe ni opĩ aakpee di ntu kamɛ, ni aadiki ni aalaatĩi ɔka anu, diata alɛ ɔka lakpi. Ninfɛ di Hasael layila nwɔ kaanya fɛ ɔka nɛ.

16 Di Ahab obisuɔtɔbi Yoram, niale ni Israel ɔka lɛlɛɛ nɔnle kamɛ yi, di Yehosafat lale ni Yuda ɔka, ni di Yehosafat obisuɔtɔbi, Yehoram lakye kasɔ aatoole sɛka fɛ Yuda ɔka nɛ. 17 Alɛɛ afosi-atiɛ alɛɛ anyɔ aafũ, di obe wɔ aabale ni ɔka, ni aale sɛka di Yerusalem alɛɛ anɛ nɛ. 18 Aakyɛ di Israel baka nwu sisuku suoto, fɛ mmle di Ahab leyo labla nii, diekye Ahab obisankobi aayɔ. Aabla okpile di SAATE nwu anu. 19 Kafɔɔ, ta kpɛmblatɛ nɔɔ Dawid oso, SAATE nwu ditawɔɔsa Yuda. Diekye aabuɛ aatɛ alɛ abata Dawid ku banantii nɔɔ kandiɛ, dinaa ni kaloo.

20 Di Yehoram obe kamɛ, Edom lataka aayila di Yuda suoto, ni aase ɔka nɔɔ omu nɛ. 21 Nioso Yoram lakyɛ Sair ku bakeke nɔɔ ba di bapɔnkɔ nnaanfi ni bamuu. Ni di Edom batii lamana nwɔ ku bakeke nɔɔ nwu kanyabayilatɛ baakyi nɛ, kafɔɔ aataka ku kakyɛ aabɛ ma kamɛ aafe; bakpɛtɛ nɔɔ kafɔɔ latoso baakple baasifi ayo lɛma. 22 Diɛbase ni di dii le baakpana ni kukũ ko mmle, Edom latɔɔtaka di Yuda suoto. Libnab kafɔɔ lataka aayila ma di suoto di obe nwu onwii kamɛ.

23 Di sɛsaabla se bamba di Yoram sɛka ole kamɛ ku n-ya amuu aabla nii, bɛɛkpana nya di Yuda baka sekofolaa kukũ kamɛ. 24 Ninfɛ di Yoram lalaatɛ ɔnyɛɛ ku bate nɔɔ, baakookaa nwɔ ku mma di Dawid okpoo kplɛ nɛ. Ni di obisuɔtɔbi nɔɔ Ahasia layila nwɔ kaanya fɛ ɔka nɛ.

25 Di Israel ɔka Ahab obisuɔtɔbi, Yoram lefosi lɛlɛɛ nyɔɔfa kamɛ, ni di Yehoram obisuɔtɔbi, Ahasia Yuda ɔka lakye kasɔ aatoole sɛka nɛ. 26 Alɛɛ afosi-anyɔ-anyɔ di Ahasia lafũ fiɛ aabale ɔka. Ni aale sɛka di Yerusalem lɛlɛɛ ninwii nɛ. Ɔya leyooto niale Atalia, aale ni Israel ɔka Omri ɔwa obisankobi. 27 Aakyɛ di Ahab leyo sisuku kanya, ni aabla okpile di SAATE nwu anu, fɛ mmle di Ahab leyo labla nii. Diekye Ahab leyo kamɛ ɔlɔ aale.

28 Ninfɛ di Ahasia latikanko Ahab obisuɔtɔbi, Yoram baakyɛ baalaakpɛko Siria ɔka Hasael di Ramot Gilead nɛ. Siria batii latika Yoram nkɔ. 29 Nioso Ɔka Yoram lakple aasifi Yesreel alɛ ɔɔlaakaasa nkɔ be di Siria batii latika nwɔ ni di Ramot, di kakpɛ nɔɔ ku Siria ɔka Hasael kamɛ.

Ninfɛ di Yuda ɔka Yehoram obisuɔtɔbi, Ahasia lasoo aakyɛ Yesreel aalaanyu Ahab obisuɔtɔbi, Yoram nɛ, diekye baatika nwɔ nkɔ.