1 Ninfɛ di Yaa ɔlaabuɛtɛtɛ Elisa lalɛɛ osuɔtɔ onwii di Yaa ɔlaababuɛtɛtɛ kamɛ aatɔkɔ nwɔ alɛ, "Yɔ akpeele wua lɛfɔ fakpee, faatika ofiamɛ lɛfɔ, faayɔ kakɔkɔɛ ka mmle ku ɔfɔɔ faatɔɔkyɛ Ramot Gilead. 2 Nse feebuo nfa, faawolaa Nimsi obisuɔtɔbi, Yehosafat obisuɔtɔbi Yehu. Faakyɛ ɔkyɛ nɔɔ falaakpaa nwɔ fadieko di bawo nɔɔ kamɛ fasifiko leyo le kaamɛ. 3 Faadiki kakɔkɔɛ nwu fanyɛɛnɛ ɔfɔɔ nwu fakpete nwɔ diisi faabuɛ falɛ, ‘Nnya ɔlaa wɔ di SAATE nwu kobuɛ ni alɛ: Lɛpɛ fɔ ɔfɔɔ fɛ Israel ɔka.’ Faasɛkɛtɛ kayoko, faatoso fadie; tankyɛkyɛlɛ!"

4 Nioso okosopo, Yaa ɔlaabuɛtɛtɛ nwu lakyɛ Ramot Gilead. 5 Obe wɔ aabuo nii, aanya bakpɛtɛ kanyabayilatɛ lasi baasiɛ. Ninfɛ aabuɛ alɛ, "Kakpɛ kanyayilatɛ, bɛɛtɛɛ kanya alɛ nta fɔ."

Ni di Yehu lakaalɛ alɛ, "Kɛɛta owe loo?"

Ni di Yaa ɔlaabuɛtɛtɛ nwu ladiki kanya alɛ, "Afɔ, kakpɛ kanyayilatɛ."

6 Ni di Yehu lataka aabuo leyo kamɛ nɛ. Ninfɛ di Yaa ɔlaabuɛtɛtɛ nwu lanyɛɛnɛ ɔfɔɔ nwu aakpete di Yehu disi aabuɛ alɛ, "Nnya ɔlaa wɔ di SAATE , Israel Yaa nwu kobuɛ ni alɛ: ‘Lɛpɛ fɔ ɔfɔɔ fɛ ɔka di SAATE nwu batii, Israel suoto. 7 Dikpe ni fɛɛwɔɔsa saate lɛfɔ Ahab leyo. Kamabla nkyisa kafɔɔ di bakpɛmblatɛ Yaa ɔlaababuɛtɛtɛ nii ku SAATE nwu bakpɛmblatɛ bamuu ba ntɔ di Yesebel lawii ni suoto. 8 Ahab leyo nimuu kamakpi. Kamawɔɔsa Ahab osuɔtɔ biala di Israel- ɔlanle ee nnwɔ ninsiko ni suoto. 9 Kamabla Ahab leyo fɛle Nebat obisuɔtɔbi, Yeroboam leyo ku Ahiya obisuɔtɔbi, Basa leyo. 10 Yesebel nnwɔɔ yi, baweewee nimawee nwɔ di Yesreel kasɔ suoto, kuonwii dilɔbakookaa nwɔ.’ " Ninfɛ di Yaa ɔlaabuɛtɛtɛ nwu lasɛkɛtɛ kayoko aatoso aadie nɛ.

11 Obe wɔ di Yehu ladie aasifi ni banɔɔfotii wo nɔɔ nfũ yi, onwii lɛma lakaalɛ nwɔ alɛ, "Lɛsaa biala nlɛ? Be oso di fiibuotɛ nwu lɛwa fɔ ɔkyɛ?"

Ninfɛ di Yehu ladiki kanya alɛ, "Faye osuɔtɔ nwu ku sɛlaa se okle ambuɛ nii."

12 Ni baabuɛ alɛ, "Kuote nkpo, tɔkɔ wo!"

Ninfɛ di Yehu labuɛ alɛ, "Nnya ɔlaa wɔ aatɔkɔ mi ni, alɛ: ‘Nnya ɔlaa wɔ di SAATE nwu kobuɛ ni alɛ: Lɛpɛ fɔ ɔfɔɔ fɛ ɔka di Israel suoto.’ "

13 Ni baapɛsɛwa baadidiki akpeele lɛma, baafukuti nya baatɛtɛɛ di nkpaa nɔɔ kasekɔ nɛ. Ninfɛ baafɛ kakyukye, baataasiwidi, baabuɛ alɛ, "Yehu nfɛ ninle ɔka!"

14 Nioso Nimsi obisuɔtɔbi, Yehosafat obisuɔtɔbi, Yehu latɛ Yoram kala. (Di obe nwu Yoram ku Israel omuu latootĩtĩi Ramot Gilead di Siria ɔka Hasael suoto. 15 Kafɔɔ Ɔka Yoram ntookple eesifi Yesreel alɛ ɔɔlaakaasa nkɔ be di Siria batii latika nwɔ ni di kakpɛ lɛma ku Siria ɔka Hasael.) Ninfɛ di Yehu latɔkɔ banɔɔfotii nɔɔ nwu alɛ, "Nse nkpo kanya bionyu, ni bitanta kuonwii lamaa aadie di okpoo kplɛ nwu aakyɛ aalaabuɛ ɔlaa nwu di Yesreel." 16 Ninfɛ di Yehu labuo di keke nɔɔ wɔ di bapɔnkɔ nnaanfi ni kamɛ aasiɛ aasifi Yesreel nɛ. Diekye Yoram latɔɔtɛ ɔnyɛɛ ninfa, ni di Yuda ɔka Ahasia lasoo aakyɛ alɛ ɔlaasɛɛsɔɔ nɛ.

17 Obe wɔ di nnwɔ nin-yila ni di Yesreel leyo takale, le manyila manyu ni, lanya Yehu bakpɛtɛ kawɔ nii, ni aafaa aabuɛ alɛ, "Lɛnya bakpɛtɛ bawo kɔwa."

Ni di Yoram labuɛ alɛ, "Miɛ pɔnkɔ-siɛtɛ onwii fakpee aalaakyakako ma, aakaalɛ ma alɛ, ‘Atoko ɔkyɛ ole kamɛ biɛwa?’ "

18 Ni di pɔnkɔ-siɛtɛ nwu lasiɛ pɔnkɔ aalaakyakako Yehu, aalaakaalɛ alɛ, "Nnya ɔlaa wɔ di ɔka kɔkaalɛ ni alɛ, ‘Atoko ɔkyɛ ole kamɛ biɛwa?’ "

Ni di Yehu ladiki kanya alɛ, "Be kamɛ dikpe fɔ ku atoko ɔkyɛ ole? Bafe sɛmaa nii wla."

Ni di nyuntɛ nwu labuɛ alɛ, "Tɔkyɛntɛ nwu ntoodu ma, kafɔɔ olosinkple awa."

19 Nkpo oso ɔka lakple aakpee pɔnkɔ-siɛtɛ nyɔɔfa. Obe wɔ aakyɛ ni ɔkyɛ lɛma, ni aabuɛ alɛ, "Nnya ɔlaa wɔ di ɔka kɔkaalɛ ni alɛ, ‘Atoko ɔkyɛ ole kamɛ biɛwa?’ "

Ni di Yehu ladiki kanya alɛ, "Be kamɛ dikpe fɔ ku atoko ɔkyɛ ole? Bafe sɛmaa nii wla."

20 Ni di nyuntɛ nwu labuɛ alɛ, "Tɔkyɛntɛ ntoodu ma, kafɔɔ olosinkple awa. Ɔkanle nwu nte fɛle Nimsi obisuɔtɔbi, Yehu- anka ni keke fɛle fiibuotɛ."

21 Ni di Yoram labuɛ alɛ, "Bilolaa keke nii wɔ di pɔnkɔ nnanfi ni betɛɛ." Baaloo nwɔ ni ololaa, ni di Israel ɔka Yoram ku Yuda ɔka Ahasia lasiɛ nwɔ baadie, obiala ku ole nwɔ omu baalaakyakako Yehu nɛ. Baalaakyakako nwɔ di kasɔ ka niale ni Nabot, Yesreel otii nwu kale. 22 Di Yoram lanya ni Yehu, ni aakaalɛ nwɔ alɛ, "Yehu, atoko ɔkyɛ ole kamɛ fɛɛwa?"

Ni di Yehu ladiki kanya alɛ, "Lɛ di atoko ɔkyɛ ole kawɛ, di yaafɔ afiɔ ɔtɔ ku sɛsɛɛ simuu mpɔ ni?"

23 Ninfɛ di Yoram lamunikĩi aatoso, aatɔɔlɛɛ Ahasia alɛ, "Ahasia, kakpɛ kale!"

24 Ninfɛ di Yehu labɔkɔtɛ kɔtaa nɔɔ aataa Yoram di amuusi obo nɛ. Kɔtaa nwu latofo di otu nɔɔ ni aabɔkɔtɛ aanɔɔ di keke nɔɔ wɔ di bapɔnkɔ nnaanfi ni kamɛ nɛ. 25 Ni di Yehu latɔkɔ Bidkar wɔ niale ni keke nɔɔ ɔnɔɔfotii alɛ, "Kɛnkɛ nwɔ fafuki fayu di kofe ko ninle ni Nabot, Yesreel otii nwu kole kamɛ. Nyuma mmle buasi buatɔɔka ni bakeke buatikanko ni Yoram ote, Ahab sɛɛmaa di SAATE nwu labuɛ ni ɔlaa di suoto nɔɔ aatɛ ni alɛ: 26 ‘Kɔsa lanya Nabot ntɔ ku babisuɔtɔbi nɔɔ ntɔ, SAATE nwu niabuɛ, ni nwaako kamanyu nlɛ fɛɛta ntɔ nwu koto di kasɔ ka mmle suoto, SAATE nwu niabuɛ.’ Nioso kanunua kɛnkɛ nwɔ fafuki fayu di kasɔ nwu suoto, di SAATE nwu ɔlaa kanya."

27 Obe wɔ di Yuda ɔka Ahasia lanya ni lɛsaa le niawa nii, ni aatoso aayɔ osuku aakata aasifi Bet Hagan. Ni di Yehu latikanko nwɔ aatooyiisa kudu alɛ, "Lo nnwɔɔ kafɔɔ!" Baatika nwɔ nkɔ di keke nɔɔ kamɛ, aakyɛ ni di osuku oofe ni Gur ninkaako ni Yibleam okpoo. Kafɔɔ aatoso aasifi Megido aalaakpi ninfa. 28 Bakpɛmblatɛ nɔɔ layɔ kpi nɔɔ baakpee di keke kamɛ baasifiko Yerusalem, baalaakookaa nwɔ ku bate nɔɔ di ɔkya nɔɔ kamɛ di Dawid Okpoo kplɛ nwu. 29 (Di Ahab obisuɔtɔbi, Yoram lefosi lɛlɛɛ kasale kamɛ di Ahasia labale Yuda ɔka.)

30 Ninfɛ di Yehu lakyɛ Yesreel nɛ. Di Yesebel lanu nwu ni ole, ni aalolaa anu nɔɔ, aabla disi nɔɔ, ni aatoonyu di sɛfle nɛ. 31 Di Yehu labuo ni di kayoko, Yesebel lakaalɛ nwɔ alɛ, "Afɔ wɔ ninte ni fɛle Simri wɔ nialo ni saate nɔɔ, fɛɛwa ku atoko ɔkyɛ ole?"

32 Ni di Yehu lanyu osi di sɛfle nwu aakaalɛ alɛ, "Owe nin-yɛ mi kamaa? Owe?" Ni di batii ba aatáa beediki ni banyɔ ee batiɛ lanyu nwɔ kasɔkasɔ nɛ. 33 Ni di Yehu labuɛ alɛ, "Bifuki ɔsanko nwu beyu kaayi!" Nioso baafuki nwɔ baayu kaayi, ni di ntɔ nɔɔ nwo lakpete di oyoyiɛ ku bapɔnkɔ suoto di obe wɔ baananafu ni ɔsanko nwu ku nkpaa nɛ.

34 Ninfɛ di Yehu lasifi aalaale, aanyi nɛ. Ni aabuɛ alɛ, "Binyu ɔsanko nwu baakpaani ni, bikookaa nwɔ, diekye ɔka obisankobi aale." 35 Kafɔɔ obe wɔ baadie baakyɛ alɛ bɔɔlaakookaa ni ɔsanko nwu, batanya lɛsaalɛsaa, diediki disi nɔɔ dikufi, nkpaa ku nnɛɛ nɔɔ lete. 36 Ni baalaatɔkɔ Yehu nɛ, ni aabuɛ alɛ, "Nle mmle ninle ɔlaa wɔ di SAATE nwu lakakatɛ aafenko ni di kpɛmblatɛ nɔɔ Elia, Tisbi otii nwu suoto nɛ: Di Yesreel kasɔ suoto di baweewee kamawee Yesebel suoto sina. 37 Yesebel suoto kamate fɛle aku ya ninte ni kaasɔ di Yesreel kasɔ, di mmle di kuonwii dilɔbabuɛ ni alɛ, ‘Nnya Yesebel.’ "