1 Osuɔtɔ onwii lawɛ di Us kasɔ suoto, leyooto nɔɔ niale Yob. Osuɔtɔ wɔ mmle ditawɛ ole kuonwii, aate kafɔɔ tinini; aayɛkɛ ni Yaa, aakyidi ni okpile kafɔɔ. 2 Aawɛ babisuɔtɔbi bakuɛnsĩ ku babisankobi batiɛ, 3 aawɛ kafɔɔ bafoso nkpe nkuɛnsĩ, kapu bapɔnkɔ nkpe ntiɛ, banankyue alafa anɔɔ ku bapɔnkɔ ba nintuka ni atoo alafa anɔɔ, aawɛ kafɔɔ bakpɛmblatɛ kpinwu. Nnwɔɔ niale saawɛntɛ kplɛ di Kufĩ katunkɔ batii bamuu kamɛ nɛ.

4 Babisuɔtɔbi nɔɔ ntɛ obe mantũ sipunu di ayo lɛma, manlɛɛ babilɛma-sankobi batiɛ nwu mamale, mannyi ku mma. 5 Nse opunu otumbee nwu ntoofe yi, Yob nkpee mankyɛ manaakleklesa ma suoto. Di kolesɛtũ anta ɔfiɛ asaaɔta oleɔta anta obiala lɛma, ku disibu alɛ, "Loobia babi nii lɛbla okpile, bɛɛkpaani Yaa di situ lɛma kamɛ." Nle mmle niale Yob ɔsaabla obe lele nɛ.

6 Dii ninwii Yaa batɔkyɛntɛ lawa baabadiki suoto baatuo SAATE nwu, Satana kafɔɔ lakyɛ ku mma. 7 Ni di SAATE nwu lakaalɛ Satana alɛ, "Ɔfɛ feekye?"

Satana ladiki kanya, aatɔkɔ SAATE nwu alɛ, "Lɛkyɛ lɛlaakyikyii kasɔ suoto, lɛkyɛ lefe ka sitũ ku sɛmaa."

8 Ninfɛ di SAATE nwu lakaalɛ Satana alɛ, "Feenyunyu kpɛmblatɛ nii Yob? Kuonwii nnaa kaasɔ suoto ate ni fɛle nnwɔɔ; ate tinini anaa ni ole kuonwii, otii wɔ ninyɛkɛ ni Yaa eekyidi ni okpile."

9 Ni di Satana ladiki kanya alɛ, "Kasakasa di Yob nyɛkɛ Yaa?" 10 "Diele kɔba feekpee feekyisa nwɔ ku leyo nɔɔ batii ku lɛsaa biala ninkpe nwɔ ni? Feewii nnɛɛ nɔɔ kamɛ ɔkpɛ lɛtɔtrɔ, alɛ bafoso ku banankyue nɔɔ lɛkyaka kasɔ nwu. 11 Kafɔɔ diki kɔnɛɛ lɛfɔ faakpanko lɛsaa biala ninkpe nwɔ ni, alɛ nwaako, aakpaani fɔ di anu lɛfɔ."

12 Ni di SAATE nwu latɔkɔ Satana alɛ, "Kulɛ, ni lɛsaa biala ninkpe nwɔ ni nsi fɔ ninnɛɛ, kafɔɔ tandiki lɛnɛɛ faakpanko otii omu nɔɔ."

Ninfɛ di Satana lakyɛ di SAATE nwu anu aasifi nɛ.

13 Dii ninwii, di obe wɔ di Yob babisuɔtɔbi ku babisankobi latoole, baatoonyi ni di obilɛma-suɔtɔbi nɔɔfole leyo yi, 14 tɔkyɛntɛ onwii lawa Yob nfũ aabatɔkɔ nwɔ alɛ, "Banankyue letoofuu kasɔ, babɔkɛɛ ba nintuka ni atoo kafɔɔ letoowee sɛfa di ɔlɔɔkɔ lɛma, 15 ni di Saba batii lɛbadieko ma, beemufũ ma beesifiko nɛ. Beelo bakpɛmblatɛ nwu ku kapamii, lete nii ninle nnwɔ nietoso ni nlɛ kɔbatɔkɔ fɔ ni nɛ!"

16 Obe wɔ eekple ayɛ ɔɔkakatɛ nii, tɔkyɛntɛ bamba lawa aababuɛ alɛ, "Yaa ɔtɔ lɛkpa kuokye kolo kuɔbafiɛ bafoso ku bakpɛmblatɛ nwu, lete nii ninle nnwɔ nietoso ni nlɛ kɔbatɔkɔ fɔ ni nɛ!"

17 Obe wɔ ayɛ ɔɔkakatɛ nii, tɔkyɛntɛ bamba lawa aababuɛ alɛ, "Kaldea batii lɛbla kayu akudi atiɛ bɛɛbatuka babɔkɛɛ lɛfɔ ba nintuka ni atoo beesifiko. Beelo bakpɛmblatɛ nwu ku kapamii, lete nii ninle nnwɔ nietoso ni nlɛ kɔbatɔkɔ fɔ ni nɛ!"

18 Obe wɔ ayɛ ɔɔkakatɛ nii, nfanwu, tɔkyɛntɛ bamba lawa aababuɛ alɛ, "Babisuɔtɔbi ku babisankobi lɛfɔ letoole, beetoonyi di obilɛma-suɔtɔbi nɔɔfole leyo, 19 ni di nfanwu, kɔfɛɛfɔ siene kunwii lekye ɔfaafuu kuɔbafɛ leyo nwu ayokɔ ana. Diebiɛ diɛpɛ ma, ni beekpi nɛ, lete nii ninle nnwɔ nietoso ni nlɛ kɔbatɔkɔ fɔ ni nɛ!"

20 Ta nle mmle oso, Yob lataka aabɛbɛɛ akpeele-wua nɔɔ, aakpaasu disi. Ninfɛ aase katũ kaasɔ aapɛ ɔlaa 21 aabuɛ alɛ,

"Lɛkyɔtɔ ladie di yaami olofofɔtɔ kamɛ,

lɛkyɔtɔ kafɔɔ kamakple nsifi.

SAATE nwu niɛta, SAATE nwu kafɔɔ niekple eefũ;

baatansa SAATE nwu leyooto."

22 Di n-ya mmle amuu yi, Yob ditabla okpile alɛ ɔɔtɛ Yaa kolò alɛ atalolaa abla.