1 Elihu lakple aakakatɛ alɛ:

2 "Tɛsuotokoe kɛɛkɛ, ni kamatuo fɔ

nlɛ sɛlaa kpinwu nkpe kamabuɛ ni di Yaa disi.

3 N-wɛ lɛsaatofo nii nkyeko kakyonkɔ;

kamayɔ lɛbɛ nta Blatɛ nii.

4 Fũ fanu falɛ sɛlaa nii diele sɛlaa-ku-afunu;

nnwɔ ninkpe ni lɛsaatofo nwaa nkpe di ɔkyɛ lɛfɔ.

5 "Yaa lemuɔ alenke, kafɔɔ an-nyu batii nyakatãa;

akpe osie, anyila kpinkpĩ di disitikasaa nɔɔ suoto.

6 Annta batii kpile basiɛ nkpa,

kafɔɔ anta mba nikonu ni dibuo lɛbɛ lɛma.

7 Annkyisa anu nɔɔ di batininitɛ suoto;

ansiɛsa ma di akpomii suoto ku baka

antakatɛsa ma katoo dinaa ni kaloo.

8 Kafɔɔ nse beekpee batii anyɛnɛ,

di dibuo lenii ma diɛtɛ yi,

9 antɔkɔ ma lɛsaa le bɛɛbla nii-

alɛ bɛɛbla okpile di suoto ɔtakatɛsa kanya.

10 Yaa nta ma mannu kɔkà,

andiki ma kanya alɛ badiɛ sikpile lɛma ɔbla.

11 Nse beenu nwɔ ɔlaa, beesumu nwɔ,

ni babasiɛ di lɛlɛ kamɛ di ayi lɛma bule kamɛ,

alɛɛ lɛma kafɔɔ di atoko ɔkyɛ ole kamɛ.

12 Kafɔɔ nse baanu,

ni babawɔɔ di kapamii kanya

mankpi kafɔɔ di lɛsaatofo diesi ni kaamɛ.

13 "Mba ninan-yɛkɛ ni Yaa nnya ɔblɔ di situ lɛma kamɛ;

bia nse eekpee ma sɛkpɛnkyɛ yi, mannwi baakaalɛ lɛkyakaako.

14 Mankpi di sekosopo lɛma obe kamɛ,

di nfiofa basɔnɔbakpeetɛ basuɔtɔ kamɛ.

15 Kafɔɔ mba diobuo nii, andiki ma di dibuo lɛma kamɛ;

ankakatɛ anta ma di ninyinyi lɛma kamɛ.

16 "Yaa kodiki fɔ ankyeko nimiina kamɛ

anwako lɛba le niɛblɛfɛ ni di ole kuonwii nnaa nii,

anta suoto n-yɔɔ fɔ ku alesaa biene kpinwu di opunu lɛfɔ suoto.

17 Kafɔɔ nunua batɔɔyɔ lɛkanko kplɛ le niesiɛko ni bakpiletɛ nwu beetika fɔ di suoto;

lɛkanko ku lɛpɔɔ okpi ntɔɔwa fɔ di suoto.

18 Lolaafanyu falɛ otii kuonwii diɛkyɔnkyɔ fɔ ku lɛsaawɛ;

tanta ditunu kamɛ asaa kplɛ ofũ lamunikĩisa fɔ aafuusa.

19 Lɛsaawɛ lɛfɔ

ee bia osie lɛfɔ omuu okyiini

kafuo fɔ oklee alɛ falaasiɛ di nimiina kamɛ?

20 Tannyu kakyɛ osuku,

alɛ faawududusa batii fandiki di ayo lɛma.

21 Lolaafanyu, tamunikĩi fakyɔɔ okpile anu,

nnwɔ feenyu falɛ kulɛ kulenke ni dibuo.

22 "Yaa lɛtaka katoo di osie nɔɔ kamɛ.

Owe ninle asaatuotɛ fɛle nnwɔɔ?

23 Owe nintuo nwɔ sisuku se aafe ni,

ee antɔkɔ nwɔ alɛ, ‘Fɛɛbla lɛsaa lalaale’?

24 Nyuma faatansa ɔkpɛ nɔɔ,

nnwɔ di batii ntɔɔtansa ni di sinu ɔsa kamɛ.

25 Batii bamuu ntɔɔnya nwu;

batii nnyu nwu di kakyonkɔ.

26 Nyu mmle di Yaa lemuɔ ni- alenke ni lɛsɔnu loo!

Alɛɛ nɔɔ lɛpɔ nlenke n-ya baawolaa ni kamɛ.

27 "Nnwɔɔ ninkplesa ntu lɛlɛsɛ lɛlɛsɛ ansifiko osi,

ninkyi nimbla ni kanto ninkple ni seklenyii;

28 alokonkyɛ nta kanto nnɔɔ

yoo ankpete di batii suoto.

29 Owe nimanu kasɔ di mmle di Yaa mblɛfɛsa ni alokonkyɛ,

ku mmle ankpududuu ankyeko ni akpanta nɔɔ kasɔ onu?

30 Nyu mmle ansamiisa ni ɔplalaa amunaa nɔɔ ankyisa ni suoto,

antĩi ni kafɔɔ lekpo nkyofokɔ.

31 Osuku wɔ mmle suoto akle nnle oonyu,

anta batii alesaa kpinwu nɛ.

32 An-yiisa nnɛɛ nɔɔ pɔ ku ɔplalaa amunaa,

ni andiki nwɔ kanya kunkplalaa di nsũ katɛkɔ ninwu nɛ.

33 Okpududuu nɔɔ n-yie lɛkya di afɛɛfɔ ya nikɔwa ni suoto;

bia babɔkɛɛ ntofo alɛ ɔɔwa.