1 Ninfɛ di Yob ladiki kanya alɛ:

2 "Ɔmɛmbe bibabla mi amumu,

mimbibiɛ mi kafɔɔ ku sɛlaa minnaase?

3 Lefosi simu bitootutufa mi;

sinunsɔ dilɔkpɛ ye alɛ biedieko mi.

4 Nse nwaako dile alɛ ninlolaa mbla yi,

ni lete nii ole di okpile nwu nle.

5 Nse nwaako bibatakatɛsa suoto lee katoo minlenkee mi

min-yɔ kafɔɔ suoto nii kasɔ ɔwakosa min-yila mi di suoto yi,

6 ni bitofo bilɛ Yaa niɛbla mi okpile

ni ɛɛyɔ asawu nɔɔ ɛɛmanasa mi eekyisa nɛ.

7 "Nu lafaa nlɛ, ‘Bɛɛbla mi okpile!’ yi, kuonwii ditatuna;

nu lakaalɛ lɛkyakaako, ɔlaa wɔ ninte ni nkpo ditawɛ.

8 Yaa lɛsɛɛ mi osuku, nioso namafuo ofe;

ɛɛyɔ sisuku nii ɛɛtɛ di ditunu kamɛ.

9 Atootekete dibu di suoto nii

eetekete kafɔɔ lɛkakoto di disi nii.

10 Ananfi mi antɛ kaasɔ di ɔfankyi biala ninaadu obe wɔ ntoosifi nii;

atooklee osuku onyu nii eesifi fɛle kowoso.

11 Ɔblɔ kɔfiɛ nwɔ di suoto nii;

ɔɔka mi ankpee di balo nɔɔ kamɛ.

12 Bakpɛtɛ nɔɔ lɛtaka ku osie;

beetofo oyoyiɛ beekyisa mi

ni bɛɛbla kasiɛkɔ bɛɛmana akpanta nii beekyi nɛ.

13 "Atɔɔblasa babiloo-suɔtɔbi di suoto nii;

baklopo nii ntookpukuti di suoto nii.

14 Asaa nii baletɛ ntoosifi;

basiɛwo nii ntooyee mi.

15 Bafɔɔ nii ku bakpɛmblatɛ-suɔtɔ nii konyu mi fɛ ɔfɔɔ;

boonyu mi fɛ otii wɔ manan-ye nii.

16 Lɛlɛɛ kpɛmblatɛ nii, kafɔɔ aatuna,

nu latikiti nwɔ lekoto ku kanya nii kamu.

17 Owiidi nii kokpete ɔsɔfɔ nii;

ofũfũ nfɛ nle nta babiloo-suɔtɔbi bamu.

18 Bia basuɔtɔbi bisɔ kɔma mi;

nse lɛkyɔɔ, mamma mi.

19 Kɔkpɛ oyududu nta basiɛwo nii nwaa;

mba nimbɔmbɔ ni ntɔɔtaka di suoto nii.

20 Ntooklee lɛbla suoto kukũ ku akufi;

kɛɛkɛɛ niebu se lekpi.

21 "Binyɛɛ nyaami, basiɛwo nii, binyɛɛ nyaami,

diekye Yaa kɔnɛɛ ntɔɔpɛ mi.

22 Obe oso bitikankoe fɛ mmle di Yaa mbla ni?

Suoto sina nii diipɔ ye?

23 "Oo, nse alɛ fɛ bamufũ sɛlaa nii se mmle batɛ,

alɛ baakpana sĩ di kukũ suoto,

24 alɛ baayɔ lɛbɔɔsaa mandiki sĩ mantika di kakankyikyɛ suoto,

ee bapɛ sĩ batika di difuɔnkpaa dinaa ni kaloo!

25 N-ye nlɛ Dikitɛ nii nkpe nkpa,

ni di kayɛntɛkɔ abataka anyila di kasɔ suoto.

26 Ni nse batɔɔwɔɔsa suoto nii kukũ beeloo,

kafɔɔ di suoto sina nii kamɛ yi, kamanya Yaa;

27 ami omu kamanyɔɔ

ku anu nii amu- ami omu, diele otii bamba.

Mmle dikle ni otu nii ɔkɔnsɔ di kamɛ nii!

28 "Nse biebuɛ bilɛ, ‘Lɛ kanya bubatikanko nwɔ,

di ɔlaa omu odu nsi ni di nnɛɛ nɔɔ,’

29 aye bamu biyɛkɛ kapamii nwu;

diekye ɔblɔ kamawako letoko nanfi ku kapamii,

ninfɛ bibatofo kafɔɔ bilɛ lɛkanko nkpe nɛ."