1 SAATE nwu latɔkɔ Yob alɛ:

2 "Nnwɔ nikɔnanfiko ni Nnwɔ Ninlenke ni ɔlaa kamalolaa nwɔ?

Ta nnwɔ nikɔtɛ ni Yaa kolo adiki nwɔ kanya nfɛ!"

3 Ninfɛ di Yob ladiki kanya aatɔkɔ SAATE nwu alɛ:

4 "Ninsiɛko- lɛ nfɛ di ami kadiki fɔ kanya?

Kɔnɛɛ nii letika di kanya nii.

5 Ninwii lakakatɛ, kafɔɔ kanya didiki nnaa mi-

lɛkakatɛ lɛnyɔfa, kafɔɔ namasinkakatɛ."

6 Ninfɛ di SAATE nwu lakakatɛko Yob di kakitikɔ kamɛ alɛ: 7 "Yila kpinkpĩ fɛle osuɔtɔ;

kamakaalɛ fɔ ɔlaa,

faadiki mi kanya.

8 "Fɔɔtɛ lɛka tinini nii kaasɔ?

Foolo mi lɛpɔɔ, fanta suoto lɛfɔ lɛbɛ?

9 Fakpe kɔnɛɛ fɛle Yaa kole okle,

sɛlɔ lɛfɔ kafɔɔ kafuo okpududuu fɛle sele nwɔ?

10 Ni yɔ dibu ku sɛlɛ fata suoto lɛfɔ,

faakpee suoto lɛfɔ dibu ku akasaa.

11 Diki ɔblɔ lɛfɔ yakayaka nwu fatuo,

nyu otii biala ninkanta ni, faawakosa nwɔ kasɔ,

12 nyu otii biala ninkanta ni faawakosa nwɔ kasɔ,

bibiɛ batii kpile nwu di nfũ bayɛ ni.

13 Siisa bamuu lɛma fakookaa di kudu kamɛ;

tĩi anu lɛma di ɔkya kamɛ.

14 Ni ami omu kamafũ nkpee

nlɛ koletanɛɛ lɛfɔ kumu kafuo fɔ nkpa ofũ.

15 "Nyu lekpo kamɛ bɔkɛɛ kplɛ nwu,

lɛbla nwɔ ni ku afɔ,

anwee ni sɛfa fɛle nankyue.

16 Ɔnyɛɛ wɔ akpe ni di kataduu nɔɔ,

ku osie wɔ ninsi ni di kafutu nɔɔ sina kamɛ!

17 Ɔkà nɔɔ nwanwanyi fɛle kowoso ko manlɛɛ ni sida;

beeloso atĩ nɔɔ sikũ bɛɛkyasa.

18 Akufi nɔɔ nle fɛle kupa wɔ di situu nte nii,

nkpaa nɔɔ akufi kafɔɔ fɛle abɔɔsaa sewoso.

19 Nnwɔɔ ninle ɔkasale di Yaa asaa ya aabla ni kamɛ nɛ,

kafɔɔ Blatɛ nɔɔ kafuo nwɔ ɔkyɛ ɔkyɛ ku kapamii nɔɔ.

20 Anwɛ alesaa ankyeko akpenkpe osi,

lepoo kamɛ babɔkɛɛ kafɔɔ nkpee kɔkyɔ di ɔlɔɔkɔ ninya.

21 Anklɛ ante di lekpo sɛfa kalɔ,

anwofa di lɛnwaakɛ kamɛ di lɛfɔ.

22 Lekpo sɛfa dibùu nwu ntĩi nwɔ di kunyii lɛma;

awoso kaanale di okle-lɔɔkɔ lɛmana nwɔ eekyi.

23 Nse okle kɔkpɛ osie kanya yi, difu nimpɛ nwɔ;

kuntɛ Yordan okle leyii kuɔbadu kanya nɔɔ yi, andiki atoko ansiɛ.

24 Otii owo kafuo nwɔ omufũ ninnu dituɛ,

ee antɛ nwɔ okũ andufu onwu nɔɔ?