1 Ninwuna nii ntooloo,

ayi nii ntoobudi kakuu,

ɔkya nfɛ nsoko mi.

2 Nwaako bamantɛ lɛmana mi beekyi;

dikpeni anu nii letika di ablɔfiɛsaa lɛma suoto.

3 "Oo Yaa, tɛɛ asaa ya feetika fɛɛtɛ ni.

Owe bamba nfɛ nimayila kamaa antɛɛ?

4 Feetĩi asibu lɛma osuku di lɛsɔnu kamɛ;

nioso flɔbata ma lelenkee.

5 Nse otii lediki basiɛwo nɔɔ ɛɛta eefũ koto yi,

babi nɔɔ anu kamabiɛ.

6 "Yaa ntɔɔyɔ mi ɛɛbla okyonsanu ɛɛta otii biala,

otii wɔ anu di batii kotufa sita mankpete nii.

7 Anu nii nfɛ nte tutufuu ku sɛnyaami owi;

suoto nii simuu ntɔɔbla fɛle kunyii.

8 Diɛbla batininitɛ ɔkpɛ di nle mmle suoto,

mba ole ninkpe ni lɛtaka bayɛ di mba ninan-ye ni Yaa suoto.

9 Kafɔɔ, tininitɛ kamakyɛ di sisuku nɔɔ suoto,

mba kafɔɔ nnɛɛ nieklekle ni kamawɛ osie mankyakaa.

10 "Kafɔɔ biwa, bamuu lee, bikple biwa!

Namawɛ numbentɛ di kamɛ lee.

11 Ayi nii ntoofe, asaa ya lɛtɛ ni ɔbla ntɔɔlalaa,

nkpo kafɔɔ di otu nii abiesaa nte nɛ.

12 Batii ba mmle lemunikĩisa kakyɛ bɛɛbla kakũ;

di ditunu kamɛ mambuɛ alɛ, ‘Lɛkpa ntɔɔtɛɛtɛɛ.’

13 Nse kafa ka konyu osuku nta ni ninle ɔkya,

ni nse lɛtɛ atensaa nii di ditunu kamɛ,

14 nse lɛtɔkɔ dibiɔ nlɛ, ‘Afɔ ninle teemi,’

kunnwɔɔ kafɔɔ, ‘Yaami’ ee ‘Obiloo-sankobi,’

15 ni ɔfɛ nfɛ di osuku onyu nii nkpe?

Owe nikanya osuku onyu owo antɛɛ?

16 Osuku onyu nii nwu kamasoo kunkyɛ kukpi n-yoko?

Bubakyɛ kɔkpaa kunwii munsoo munsifi kudu kamɛ?"