1 "Faye obe wɔ di kobokote batie nlofo ni?

Fan-nyu obe wɔ di kafɛ̀ nlofo ni abi nɔɔ?

2 Fanka awɛntɛ nwu ninaase di obe wɔ manwɛ ni nkpa?

Faye obe wɔ manlofo ni?

3 Manfuu kaasɔ manlofo abi lɛma;

kolofo lɛma dibuo nnaase.

4 Abi lɛma mmuɔ, anwɛ osie di apoo kamɛ;

abi nwu ndie ansifi, ansinkple aawa.

5 "Owe ninta kuɔ suoto osiɛko?

Owe ninfukuti okũ nɔɔ?

6 Latɔɔ ɔfaafuu fɛ leyo nɔɔ,

kasɔ fududu fɛ kasiɛkɔ nɔɔ.

7 Am-ma kudu ko ninkpe ni di okpoo;

annu kpatɛ afafaa.

8 Annaamiɛ sɛfa kaweekɔ nɔɔ di akpenkpe,

anwolaa lɛsaa lele ninle lɛkɔnle.

9 "Kɔkɔ̀ kamatuna alɛ ɔɔbasumu fɔ?

Abasiɛ di leyo lɛfɔ ku kakyɛ?

10 Fabafuo nwɔ onii ɔkaasa ku lɛnwa le nimbɛ ni sekplo?

Abafuu sɛtaata se di sɛmaa lɛfɔ?

11 Fabatika nwɔ anu ta osie kplɛ nɔɔ oso?

Fabadiɛ ɔkpɛ lɛfɔ nutũle nwu fantɔɔ?

12 Fabafuo nwɔ disi otika alɛ abayɔ kamɔɔ lɛfɔ anwako

amasiisa ka di kakpaa lɛfɔ?

13 "Klɛkumi mpɛ afoko ku suoto lɛyɔɔ,

kafɔɔ blafuo ɔkaatɛɛ ku kɔkyɛnyi afoko ku selonkoo.

14 Anfa afuɔ nɔɔ antɛ kaasɔ,

anta nya anfila di ɔtɛnsia kamɛ,

15 an-yee alɛ kɔkpaa kabibiɛ nya

ee lepoo bɔkɛɛ owo kanafu nya.

16 Ankpakpayi abi nɔɔ, fɛ diele ale nwɔ ale;

aaklesĩ alɛ diabuo nwɔ kasakasa,

17 diekye Yaa diɛtɔɔ ninumbe

ee atɔɔ lɛsaatofo nwaa lewo.

18 Kafɔɔ nse eefukuti selonkoo nɔɔ alɛ ootoso yi,

am-ma pɔnkɔ ku siɛtɛ nɔɔ.

19 "Afɔ niɛta pɔnkɔ osie nɔɔ nwu,

ee feetĩi simu nɔɔ kamaa ku sinwini?

20 Afɔ nintɔɔ an-yefe fɛle letroee,

fanta difu mpɛ nwɔ ku lɛkanta nɔɔ onwu ɔkpa nwu?

21 Anfuu kasɔ ku osie, an-nya suoto lɛyɔɔ di osie nɔɔ suoto,

anlolaa suoto antaka kakpɛ.

22 Am-ma lɛyɛkɛ, annyɛkɛ lɛsalɛsaa;

sinunsɔ ninkpɛ nwɔ di kapamii suoto.

23 Kɔtaa nfifielesa ɔfankyi nɔɔ,

lɛkplɔ kafɔɔ nlɔlɔfɔ nwɔ ninfe.

24 Anfuu kasɔ di suoto lɛyɔɔ kanya;

annfuo oyila kloklo nse dikyukyoo lɛfɛ.

25 Di dikyukyoo kanya didie, ambuɛ alɛ, ‘Ɛhɛ̃ɛ!’

An-nu kakpɛ ofũfũ di kakyonkɔ,

kakpɛ kanyabayilatɛ lɛfaa ku kakpɛ kaku.

26 "Kakyɛ nflɛlɛtɛ di ninumbe lɛfɔ kanya,

anfukuti afoko nɔɔ ankyɔɔ kala-kasɔ?

27 Di kanya lɛfɔ didiki di klikpo nflɛlɛtɛ ansifi osi fanfa,

annaabla leyo nɔɔ di katakalekɔ nwu?

28 Kasiɛkɔ nɔɔ ninle katakalekɔ osi, nfa ansiɛ ku kakyɛ nɛ;

afuɔ sɛkyɛɛfɛ sebo ninle kawofakɔ nɔɔ.

29 Nfa andie anaamiɛ alesaa nɔɔ nɛ;

anu nɔɔ ntofo nya di kakyonkɔ.

30 Abi nɔɔ nkonko di ntɔ suoto,

nfũ kafɔɔ beelo ni babɔkɛɛ yi, nfa anwɛ nɛ."