1 "Obe oso di Nnwɔ Ninlenke ni diɛtɛ obe ata lɛkanko?

Obe oso di mba nin-ye nwɔ ni konyu ayi nwu osuku kasakasa?

2 Batii nkpa amɛke;

mankpà babɔkɛɛ ba beeyu nii.

3 Man-yɔ bakuɛbi babɔkɛɛ ba nintuka ni atoo,

manfũ kafɔɔ kpisɔfɔ nankyuie-suɔtɔ ninnɛɛ di asaa ya asiko ni kanya.

4 Mantukusa mba diefĩ ni mankyisa di osuku,

mannyinka kafɔɔ bapiitɛ bamuu kaasɔ, ninta ma manaawofa.

5 Bapiitɛ nkyi manaabla ɔkpɛ lɛma mambie alesaa

fɛle bakùɔ di ɔfaafuu;

kasɔ kosole nta babi lɛma alesaa manle.

6 Manaasɛsɛɛ atita ya beediɛ bɛɛtɛ ni di afe

manaayɔ kafɔɔ awosobi di batii kpile awosobi afe kamɛ.

7 Abula nnaa ni oso, akyɔtɔ mante ku kakyɛ;

lɛsalɛsaa nnaa ma baatĩi ni suoto di lɛwɔɔfɔ obe.

8 Abokote kanto nlo ma,

ta banaa ni kasiɛkɔ oso afuɔnkpaa kalɔ mansiɛ.

9 Manklee kuɛbi obi manfũ di lɛnyɛɛ katũ,

manfũ piitɛ obifɔɔle di koto ko asiko ni kanya.

10 Ta aklesaa nnaa ni oso, akyɔtɔ di bapiitɛ nkyɛ;

mantuka kamɔɔ, kafɔɔ akà nklee ma.

11 Manka nnɔfɔ di asaasa kamɛ,

man-wa nta di nta kawankɔ, kafɔɔ otukɔnsɔ nklee ma.

12 Mba nikokpi ni atunnii kodie ankye okpoo kplɛ nwu,

mba niefũ ni nkɔ kɔfaa mammiɛ lɛkyaako.

Kafɔɔ Yaa ninanfiko kuonwii ɔlaa.

13 "Batii bawo nkpe beekyidi ni lɛkpa,

manan-ye ni sisuku nini,

ee bakyɛ ni di nfenkɔ nini.

14 Batii lotɛ nwu ntaka nse kale ntooloo,

anlo piitɛ ku nnwɔ diefĩ ni;

an-yu ku kakyɛ fɛle yu.

15 Osuɔtɔ sɔnɔkpeetɛ anu nsoko kɔtɔɔfɔ;

annyu alɛ, ‘Ninu kuninwii dilɔbanyɛɛ,’

ni an-yɔ lɛsaa antĩi anu nɔɔ nɛ.

16 Di ditunu kamɛ yi, batii mbiɛ ayo mambuo,

kafɔɔ mansɛɛ suoto lɛma mankpee ku kakũ;

bloomiɛ alɛ babla lɛsalɛsaa ku lɛkpa.

17 Diekye bamuu lɛma, nkyɛntɛɛ ninle olesɛ lɛma;

mambla basiɛwo ku ditunu kamɛ ayɛkɛsaa.

18 "Kafɔɔ afuuta bale di ntu osi;

bɛɛkpaani kasɔ nlekɔ lɛma,

di mmle di otii kuonwii dilaakyɛ ni awosobi afe.

19 Fɛ mmle di difila ku kayi kosole nta atubakani nyinakĩile n-yɛ ni yi,

nkpo di ɔkya kafɔɔ nta mba niɛbla ni sikpile n-yɛ nɛ.

20 Olofofɔtɔ n-yee ma,

kunwɔɔ kafɔɔ nkonko di suoto lɛma;

mansinnyuma batii kpile,

kafɔɔ mambudi ma fɛle kowoso.

21 Manle di ɔlɛma ku ɔsanko wɔ ninaa ni obi suoto,

mammbla sifutulɛ baata kpisɔfɔ.

22 Kafɔɔ Yaa, nnanfi batii kplɛ di osie nɔɔ kanya;

nu baatɔɔwɛ kayilakɔ yi, banaa osuku onyu di nkpa kamɛ.

23 Anta ma mantɛ ɔnyɛɛ di ololaa disiɛbi kamɛ,

kafɔɔ anu nɔɔ ntika di sisuku lɛma suoto.

24 Diekye obe kakuu mantakatɛsa ma katoo, nse batoosifi;

manwakosa ma kasɔ, ni mansiisa ma fɛle batii bule nɛ;

mambudi ma fɛle kamɔɔ asi.

25 "Nse nle mmle diete nkpo, owe nimatika mi sɛlaa ku afunu,

antɛ sɛlaa nii kaasɔ alɛ siediɛ lɛsalɛsaa?"