1 "Nle mmle nta otu nii mpɛ

kunkpa di kasiɛkɔ ninwu.

2 Binu! Binu dikpududuu nɔɔ sɛlɔ,

amumuɛ ya nikodie ankye ni kanya nɔɔ kamɛ.

3 Yaa ndiki ɔplalaa amunaa nɔɔ osuku ankpete di kolo kumuu kalɔ,

an-yɔ nwu ankyesee kasɔ n-yɛntɛlekɔ nwu.

4 Nni kamaa nimunaa nɔɔ sɛlɔ ndie;

ankpududuu ku sɛka nɔɔ sɛlɔ.

Nse sɛlɔ nɔɔ kanya ledie yi,

ansintĩi lɛsalɛsaa osuku.

5 Yaa sɛlɔ nkpududuu di sisuku se niɛbla ni ɔkpɛ;

ambla asaa kplɛ ya ninlenke ni lɛsɔnu loo.

6 Ambuɛ antɔkɔ atubakani alɛ, ‘Nɔ́ɔ fakpete kaasɔ suoto,’

antɔkɔ kafɔɔ kanto diwiiwii alɛ, ‘Bla kanto kplɛ.’

7 Di mmle di batii ba bamuu ɛɛbla ni katofo ni ɔkpɛ nɔɔ mantɛ ni nsũ,

anta otii biala ndiɛ ɔkpɛ nɔɔ ɔbla.

8 Babɔkɛɛ nnaawofa;

manka di ayo lɛma kamɛ.

9 Afɛɛfɔ kplɛ ndie di kasiɛkɔ nɔɔ,

lɛwɔɔfɔ nkye kɔfɛɛfɔ ko ninfɛ ni kamɛ.

10 Yaa owiidi nta ntu nnii,

sekle kplɛ kafɔɔ nkple afuɔ.

11 An-yɔ ntu antitika di alokonkyɛ suoto;

ansamiisa ɔplalaa amunaa nɔɔ anfenko kaamɛ ninya.

12 Di Yaa osuku otuo kanya ankyɛ ankyi

kasɔ kamuu anu

ambla lɛsaa lele ɛɛtɔkɔ nya alɛ abla.

13 Yaa nwako alokonkyɛ nwu alɛ abananfi batii kootoko,

ee abata ntu di kasɔ nɔɔ suoto, antuo kafɔɔ lɛbɔmbɔ nɔɔ.

14 "Yob, nu ɔlaa wɔ mmle;

yila, faabu disi di Yaa sɛkpɛ se niɛbla ni ɔkpɛ suoto.

15 Faye mmle di Yaa mumunikĩisa ni alokonkyɛ sisuku,

anta ni ɔplalaa nɔɔ mmunaa ni?

16 Faye mmle di alokonkyɛ mbla ansaka ni di kolo,

sɛkpɛ se niɛbla ni ɔkpɛ di nnwɔ ninkpe ni lɛsaatofo nwaa kɔbla ni?

17 Afɔ wɔ di akpeele nfila fɔ ni di suoto lɛfɔ

di kasɔ nte ni kloklo di kala-kasɔ kɔfɛɛfɔ kalɔ,

18 fabafuo ɔkyakaa di suoto nɔɔ mimblɛfɛsa kolo

ko ninkpe ni osie fɛ awɛwɛ ya bɛɛyɔ lɛbɔɔsaa bɛɛblɛ ni?

19 "Tɔkɔ wo ɔlaa wɔ buɔtɔkɔ ni Yaa;

bulɔbafuo ɔlaa loo ɔyɔ ɔtɛ di anu nɔɔ, ta ditunu loo oso.

20 Batɔkɔ nwɔ alɛ komiɛ nlɛ nkakatɛ?

Otii owo kamatɔkɔ alɛ bamɛ nwɔ?

21 Kanunua otii kuonwii dilɔbafuo kufĩ onyu,

di mmle kunkpa ni di kolo

nse kɔfɛɛfɔ ntoofiɛ alokonkyɛ klekle kuofenko sɛmaa.

22 Abakye katoo-kasɔ anwa di koto sɛɛle sɛlɛ kamɛ;

Yaa kɔwa di sɛka ole lɛkyɛ kanya.

23 Bulɔbafuo Nnwɔ Ninlenke ni ɔtɛɛtɛɛ, ɛɛtaka katoo di osie kamɛ;

di lɛkanko nwaa ku ɔsaabla tinini nɔɔ kamɛ yi, annyinka batii.

24 Nioso batii n-yɛkɛ nwɔ,

diekye akpe dibu ɛɛta mba bamuu niebe ni anu di situ kamɛ."