1 Ninfɛ di Yob ladiki kanya alɛ:

2 "Nse fɛ bakadi ninyinyi nii

ku dibuo nii nimuu kafɔɔ batika di akadisaa suoto!

3 Ditabalenkee lekpo ɔtɛnsia onutũ-

nkpo oso kɔkakatɛ fɛ otii wɔ ninan-ye ni Yaa nɛ.

4 Nnwɔ Ninlenke ni akplɔ n-yɛ di suoto nii,

ninwuna nii konyi kɔfa kpile lɛma nwu;

Yaa lɛyɔ lɛyɛkɛ ɛɛkpɛ mi.

5 Nse bɔkɛɛ wɔ nintuka ni atoo lɛwɛ sɛfa ankple anwi,

ee nankyue nwi nse alesaa n-yɛ di ɔkyɛ nɔɔ?

6 Alesaa ya ninanwɛ ni ɔmɛnɛfɛ kalɛ ole nse mba diesi,

sɛɛ lɛkɔɔkɔfuɔ kafututukɔ nwɛ ɔmɛnɛfɛ?

7 Nsĩ nya ɔkpanko;

diekye alesaa nwu okle ntɛɛ mbuo ɔfiɛ.

8 "Oo, alɛ kawɛ lɛsaale kɔkaalɛ nii,

alɛ Yaa katɛɛ nle konyu ni osuku nta nii,

9 alɛ Yaa katuna ambibiɛ mi,

andiɛ mi nnɛɛ ambudi nkpa nii kakuu!

10 Nse ntabakple nwɛ kɔnɛɛ okpee kaafutu ka mmle nlɛ-

suoto kayɔɔ mi di dibuo yakayaka kamɛ-

alɛ ninsĩ Klekletɛ nwu sɛlaa.

11 "Ɔmɛnsie ninkpe mi, alɛ kakple nnyu osuku?

Ɔmɛ disi otika, alɛ katɛ otu kaasɔ?

12 Nkpe difuɔ osie nwu?

Suoto sina nii, lɛbɔɔsaa sile?

13 Nnaa osie kuonwii kakyakaako ni suoto,

kuonwii kafɔɔ nnaa aadiki mi nii.

14 "Dikpe ni otii wɔ ninaa ni ɔnyɛɛ lɛwɛ lɛkyakaako eekyeko basiɛwo nɔɔ nfũ,

kuntɛ eesĩ Nnwɔ Ninlenke ni ɔyɛkɛ.

15 Kafɔɔ babiloo nle mba manantika ni disi fɛ seklenyii se nimbiɛ sinfe ni lɛkpɔɔlɛkpɔɔ,

fɛ okle seklenyii se nin-yii nii

16 nse ntu be nienii ni lɛnyinakĩi

di atubakani niɛyɛlɛfɛ eetĩi nya nii,

17 kafɔɔ nse koleele ledie sindiɛ ni obiɛ otoofe,

di difila nta sĩ sinsɔɔ ni di aba lɛma.

18 Kapu bapɔnkɔ dikudi ninkyɛ di sisuku lɛma suoto;

mankata mansifi ɔfaafuu nwu manaakpi.

19 Tema kapu bapɔnkɔ dikudi nwu mmiɛ ntu,

Seba asaa basunsuntɛ osuku bakyɛntɛ nwu nnyu osuku.

20 Nnɛɛ lafee ma, diekye baatika anu;

kafɔɔ baalaadu ni nfa, sinunsɔ lakpɛ ma.

21 Aye kafɔɔ biɛɛtɛɛ lɛkyakaako kuninwii nunua;

biɛnya lɛsaa le ninle ni dibuo, ni biɛyɛkɛ nɛ.

22 Ntodibuɛ nlɛ, ‘Bita lɛsaa lewo di disi nii kanya,

ee bidiki koto di lɛsaawɛ lee kamɛ bita,

23 ee bidiki mi di lo nii nnɛɛ,

ee bifũ mi di amumu bablatɛ nnɛɛ’?

24 "Bituo mi asaa, kamalo kanana;

bituo mi nfũ ninanlolaa mbla ni!

25 Nyu mmle di onukwale sɛlaa mbuo ni suoto!

Kafɔɔ be di ɔlaa wɔ biɔnanfi ni kotuo?

26 Biomiɛ bilɛ bilolaa nnwɔ lebuɛ ni,

min-yɔ otii wɔ di ole kuonwii nsinnaa ni ɔlaa fɛ kɔfɛɛfɔ kule?

27 Bia bibawii atrebi di bakuɛbi suoto,

minkpee kɔya kafɔɔ di basiɛwo lee suoto.

28 "Kafɔɔ nunua lekoto binyu mi di anu.

Kamalaa sɛlaa di anu lee?

29 Bidiɛ, bitantafaa;

bikple bise ninyu, diekye dibu nii nsi di nimiina kamɛ.

30 Okpile ole owo nka di anyasibi nii?

Kanya nii dilaatofo dibiene di dikpile ɔbla suoto?