1 Ninfɛ di Elihu labuɛ alɛ:

2 "Aye banumbentɛ, binu mi sɛlaa;

aye bakũyentɛ, bikyɔɔ mi atoko.

3 Diekye kotoko nkyɔɔ sɛlaa atoko kunnyu

fɛ mmle di ɔkplalomii n-tu alesaa kunnyu nii.

4 Bita bulolaa bunyu nle ninkyɛkyɛ diɛta ni awo bamu;

bita bamuu loo butofo nle ninlɛ ni.

5 "Yob kobuɛ alɛ, ‘Ole mi nkpe,

kafɔɔ Yaa lesĩ lɛbɛ ɔyɔ ɔtɛɛ.

6 Kuntɛ ole mi nkpe yi,

bɔɔnyɛɛ fɛ laatɛ;

kuntɛ nimbla okpile yi,

lɛkplɔ nɔɔ letika mi kakɔ ka ninankpi nii.’

7 Omɛntiikle ninte fɛle Yob,

an-nyi ni sɛma fɛle mmle mannyi ni ntu?

8 Manko sikpilebablatɛ ninkyɛ;

nnwɔɔ ku bakpiletɛ nimbla onwii.

9 Diekye ambuɛ alɛ, ‘Dibiene kuninwii nindie diata otii

nse oomiɛ alɛ abuo Yaa anu.’

10 "Nioso aye lɛsɔnubanutɛ, bikyɔɔ mi atoko.

Dikyɛ lookyo alɛ Yaa kabla dikpile,

alɛ Nnwɔ Ninlenke ni kabla okpile.

11 Yaa nta otii koto di nle ɛɛbla ni suoto;

anta nle niesiɛko ni nle ɛɛbla ni n-wa nwɔ di suoto.

12 Diele lɛsaa biene alɛ Yaa kabla okpile,

alɛ Nnwɔ Ninlenke ni kamasĩ onukwale ole.

13 Owe nialɛ ayila kaasɔ kanya?

Owe niɛyɔ nwɔ eese di kayi kamuu kanya?

14 Nse ɔtɛ antɛ alɛ

ooklee ninwuna ku owiidi nɔɔ andiki,

15 nse batii bamuu ntabakpi

di otii nkple ansifi kudù kamɛ.

16 "Nse fakpe lɛsɔnu yi, ni nu nnwɔ mmle;

kyɔɔ kotoko faanu ɔlaa wɔ kobuɛ ni.

17 Otii wɔ niekyidi ni onukwale kafuo tunletɛ ole?

Fabalo tininitɛ ku Sientɛ nwu lɛpɔɔ?

18 Diele nnwɔɔ ninle Nnwɔ nintɔkɔ ni baka alɛ, ‘Biele lɛsalɛsaa,’

banɔɔfotii kafɔɔ alɛ, ‘Batii kpile bile,’

19 anaanyu ni banɔɔfo di anu,

anaatunako ni basaawɛntɛ kafɔɔ di bapiitɛ suoto,

ta bamuu lɛma nnɛɛ nɔɔ ɔkpɛ kule ni oso?

20 Manfuoa mankpi, di nkyɛntɛɛ;

batii ntũtũkũ, ni kunloo ma nɛ;

mandiki basientɛ di otii, kɔnɛɛ diesi ni kaamɛ.

21 "Anu nɔɔ ntika di batii sisuku suoto;

an-nya lɛkpakyala biala lɛma.

22 Katunutunukɔ ee ditunu tunutunu nnaa,

di lɛba le di sikpilebablatɛ kawofa nii.

23 Dieefĩ Yaa alɛ oowolaa batii kamɛ ankyɛnko sitũ,

alɛ baawa lɛkankɔ di anu nɔɔ.

24 Ambibiɛ basientɛ ananwolaa ni kamɛ,

an-yɔ babamba anse di n-yilakɔ lɛma.

25 Diekye antɛ ablasaa lɛma nsũ,

antakatɛsa ma an-yu ku kakyɛ ni man-wɔɔ nɛ.

26 An-nanfi ma kooto ta asaa kpile lɛma ɔbla oso,

di lɛba le di otii biala kanya ma nii,

27 diekye beekyi beediɛ nwɔ otikanko,

banaa ni kafɔɔ dibu bɛɛta ni sisuku nɔɔ kusinwii.

28 Manta bapiitɛ kaku n-wa anu nɔɔ,

alɛ aanu mba diefĩ ni kaku.

29 Kafɔɔ nse eelokanana, owe nikafuo nwɔ lɛpɔɔ olo?

Nse eewofasa anu nɔɔ, owe nimafuo nwɔ ɔnya?

Kafɔɔ ayɛ di nnle ku batii kanya kyɛkyɛ,

30 alɛ alaata otii wɔ ninan-ye ni Yaa ale sɛka,

di mmle anaakyɔɔ ni batii akyĩ.

31 "Nse fɛle otii lɛtɔkɔ Yaa alɛ,

‘Lekpi lɛpɔɔ, kafɔɔ namasimbla okpile.

32 Tuo mi lɛsaa le ninamafuo ni ɔnya;

nse ninlolaa mbla, namasinkple mbla nkpo.’

33 Ni Yaa kata fɔ letota di ɔlaa lɛfɔ nwu kanya

di obe wɔ feesĩ fanankyi ni di sikpile nwu suoto?

Dikpe ni feenyu nwu ole, diele ami;

nioso tɔkɔ mi lɛsaa le faye ni.

34 "Batii ba ninkpe ni lɛsɔnu kobuɛ alɛ,

banumbentɛ ba ninu mi ni ntɔkɔ mi alɛ,

35 ‘Yob nkakatɛ di lɛsaatofo diesi nii;

sɛlaa nɔɔ nnaa lɛsɔnu.’

36 Oo, alɛ basɔ Yob balaadunko kayɛntɛkɔ,

ta mmle oodiki ni kanya fɛle otii kpile oso!

37 An-yɔ ɔtaka-oyila ankyakaa di sikpile nɔɔ suoto;

ɔɔpɛ anɛɛkya nɔɔ di sɛma kanya ankpee kaamɛ loo,

ambuɛ sɛlaa nɔɔ ankyakaa antaka anyila di Yaa suoto."