1 Di dii bamba, Yaa batɔkyɛntɛ lawa babadiki suoto baatuo SAATE nwu, Satana kafɔɔ lawa ku mma aabadiki suoto aatuo nwɔ. 2 Ni di SAATE nwu lakaalɛ Satana alɛ, "Ɔfɛ feekye?"

Satana ladiki kanya, aatɔkɔ SAATE nwu alɛ, "Lɛkyɛ lɛlaakyikyii kasɔ suoto, lɛkyɛ lefe ka sitũ ku sɛmaa." 3 Ninfɛ di SAATE nwu lakaalɛ Satana alɛ, "Feenyunyu kpɛmblatɛ nii Yob? Kuonwii nnaa kaasɔ suoto ate ni fɛle nnwɔɔ; ate tinini anaa ni ole kuonwii, otii wɔ ninyɛkɛ ni Yaa eekyidi ni okpile. Eekple akle ditininii nɔɔ nwu, nu feekpee mi falɛ nnaawɔɔsɔɔ anambla ni lɛsalɛsaa."

4 Ni di Satana ladiki kanya alɛ, "Suoto kukũ diɛta ni suoto kukũ!" "Otii kamayɔ lɛsaa biala ninkpe nwɔ ni anta di nkpa nɔɔ mmu. 5 Kafɔɔ diki kɔnɛɛ lɛfɔ faakpanko suoto nɔɔ ku akufi nɔɔ, nwaako abakpaani fɔ di anu lɛfɔ." 6 Ni di SAATE nwu latɔkɔ Satana alɛ, "Kulɛ, asi fɔ ninnɛɛ, kafɔɔ tandiki lɛnɛɛ faakpanko otii omu nkpa."

7 Nioso Satana lakyɛ di SAATE nwu anu aasifi, ni aalaatika nkɔ kpile di Yob suoto nɛ. Diayɔ ni di nkpaasɔ nɔɔ dialaase di nsintɛɛ nɔɔ. 8 Ninfɛ di Yob layɔ dibukii kakyɛɛ aatoofiɛlɛ suoto ku nka, di obe wɔ aasiɛ ni di ntɔ̀ kamɛ nɛ.

9 Ni di ɔsɔfɔ lakaalɛ nwɔ alɛ, "Feekple fakle okle tininitɛ ole lɛfɔ nwu? Kpaani Yaa, faakpi!"

10 Ninfɛ di Yob ladiki kanya alɛ, "Fɔɔkakatɛ fɛle ɔsanko buutɛ. Dibiene lete buafũ munkyeko Yaa nfũ, diele ku dibuo?" Di n-ya mmle kamɛ, Yob ditabla okpile di nnwɔ aabuɛ nii.

11 Obe wɔ di Yob basiɛwo batiɛ ba niale ni Elifas wɔ niale ni Teman otii, Bildad wɔ niale ni Suhi otii ku Sofar wɔ niale ni Naama otii, lanu ni ɔlaa wɔ omuu niawa ni di suoto nɔɔ yi, ni baadie di ayo lɛma, baalaakyaka baabla kanya kanwii alɛ bɔɔkyɛ manaasɛɛsɔɔ mankpee nwɔ kɔnɛɛ kaafutu nɛ. 12 Obe wɔ baanyɔɔ ni di kakyonkɔ, sebe fiɛ baatofo nwɔ; ni baakye kasɔ baatoowi osie kanya, baabɛbɛɛ akpeele-wua lɛma, baakpete kɔtɛ di asi lɛma nɛ. 13 Ninfɛ baataba kaasɔ ku nnwɔɔ ayi akuɛnsĩ ku nkyɛ nkuɛnsĩ nɛ. Kuonwii ditafuo nwɔ ɔlaa kuonwii ɔtɔkɔ, diekye baanya dibuo kplɛ le aatɔɔnya nii.