1 "Nkpa nii kɔkpɛ mi oyududu;

nioso kamadiki ɔlaa nii ntɛ kaayi

ninkakatɛ kafɔɔ di ɔkla nii ninyinyi kamɛ.

2 Kamatɔkɔ Yaa nlɛ: Tanlo mi lɛpɔɔ,

kafɔɔ tɔkɔ mi sɛlaa se fɛɛyɔ ni di suoto nii.

3 Diesiɛko fɔ alɛ faamiina mi,

fansĩ nnɛɛ lɛfɔ ɔkpɛ,

di obe wɔ foomumuna ni sɛma di bakpiletɛ sɛsaabla suoto?

4 Batii anu ninkpe fɔ?

Fɔɔnya fɛ mmle di batii nnya ni?

5 Ayi lɛfɔ nte fɛle batii ale

ee alɛɛ lɛfɔ nte fɛle otii ale,

6 alɛ faawolaa ni ɔtanlolaa ɔbla nii

fankpɛnkpɛ ni kafɔɔ sikpile nii-

7 kuntɛ faye falɛ ninkpi lɛpɔɔ

alɛ kuonwii kafɔɔ dilaafuo mi ni ofũ di kɔnɛɛ lɛfɔ?

8 "Nnɛɛ lɛfɔ niewola mi, ni diebla mi.

Ni foomunikĩi kanunua fanwɔɔsɛɛ?

9 Nyuma falɛ faabla mi fɛle kɔtɛ.

Fabakplesa mi fambla kudù nunua?

10 Fatanyɛɛnɛ mi fawii fɛle nnyɛɛtu,

faabla mi kafɔɔ fɛle nnyɛɛtu be nienii ni,

11 faayɔ suoto sina ku kukũ faatĩi mi,

faaloso mi akufi ku nkyasakɔ faakyasa?

12 Faatɛɛ nkpa, faatuo mi kafɔɔ lɛbɔmbɔ,

osie lɛfɔ kafɔɔ nnyu ninwuna nii disi.

13 "Kafɔɔ nnya nle mmle fɛɛyɔ feekookaa ni di otu lɛfɔ kamɛ

n-ye nlɛ nle mmle niale fɔ disibu nɛ:

14 Nse lɛbla okpile, fantoonyu mi

alɛ faananfi mi kootoko.

15 Nse lekpi lɛpɔɔ- n-yɔɔsa!

Bia nse ole mi nkpe, ninfuo disi nii otakatɛsa,

diekye sinunsu nkpɛ mi,

ntofo kafɔɔ dibuo nii.

16 Nse lɛtakatɛsa disi nii katoo yi, fannaayu mi fɛle kyata,

fankple fambla asiensaa lɛfɔ kafɔɔ di suoto nii.

17 Fanwako kamaabayilatɛ fɔle di suoto nii,

fanta kafɔɔ ɔblɔ lɛfɔ ntaka katoo di suoto nii;

bakpɛtɛ fɔle lɛfɔ kafɔɔ ntaka di suoto nii obe lele.

18 "Ni obe oso feediki mi di olofofɔtɔ kamɛ?

dilɛ ditɛɛ alɛ kakpi fiɛ di ninu lewo nnyɛɛ.

19 Nse fɛ ntanwa kayi diidii yi,

ee bayɔ mi di kalofokɔ basifiko ɔkya kamɛ!

20 Ayi nii kɛɛkɛɛ nwu diiloo oloo?

Kyɛ fadiɛ mi, alɛ kawɛ suoto lɛyɔɔ kɛɛkɛɛ,

21 fiɛ ninsifi lɛba le manamasinkple bawa ni,

di ditunu ku kukpi kunyii tunutunu kasɔ,

22 di kakyɛ tunutunu kasɔ,

di kukpi kunyii tunutunu di asaa lɛkpɔkpɔtɔ ni kamɛ

bia di nfũ di lɛkpa nɔɔ nte ni fɛle ditunu."