1 "Yob lɛɛ, nse foomiɛ, kafɔɔ owe nimakpee fɔ kanya?

Ɔmɛ klekletɛ fabamunikĩisa anu fankyɔɔ?

2 Ɔblɔ nlo buutɛ,

sɛsɔfɔwo ɔkpɛ kafɔɔ nlo nnwɔ ninan-ye ni lɛsaa.

3 Ami omu ntɔɔnya buutɛ kose odu,

kafɔɔ kakui nwu baakpaani leyo nɔɔ.

4 Kanyu lekyo di babi nɔɔ suoto,

mambibiɛ ma di kakankɔ di dikitɛ nnaa nii.

5 Kɔka kleetɛ nle alesaa ya eekyeko ni kofe nɔɔ,

bia man-yɔ nya di siwuu kamɛ,

otukɔnsɔ kleetɛ kafɔɔ n-ta lɛsaawɛ nɔɔ.

6 Diekye dikpile ninkɔntɔ diakye kɔtɛ kamɛ,

ee dibuo ditaa kaasɔ.

7 Kafɔɔ beelofo otii bɛɛta dibuo

nwaako fɛ mmle di lɛtɔmbula nflɛlɛtɛ ninfe ni osi.

8 "Nse fɛ ami dile, ntabawolaa Yaa;

nin-yɔ ɔlaa nii ntɛ nwɔ di anu.

9 Ambla asaa ya manaanu ni kasɔ,

asaa ya niɛbla ni ɔkpɛ manaafuo ni ɔka.

10 Nnwɔɔ ninta kanto nnɔɔ ankpete kaasɔ;

anta afe nwɛ ntu.

11 An-yɔ mba niɛwakosa ni suoto kasɔ antika di osi,

antakatɛsa mba kafɔɔ ninkowi ni katoo.

12 Anlalaasa asaa balalaasatɛ asibu,

di mmle di nnɛɛ lɛma dilaakpanko ni nle bɛɛtɛ ni ɔbla.

13 Nnwɔɔ nimufũ banumbentɛ di asibu kpile lɛma suoto,

antĩi kafɔɔ mba nialɛ beebe ni anu asaa kpile ɔbla osuku wla.

14 Ditunu nwa ma di suoto ku kakũ;

kakũ kafɔɔ mampɛpɛɛ nnɛɛ fɛ mmle ninte ni ku kakyɛ.

15 Nnwɔɔ nindiki mba diefĩ ni ankyeko kapamii di nnya lɛma;

andiki ma ankyeko mba sikpe ni osie nnɛɛ.

16 Nkpo oso bapiitɛ nkpe osuku onyu,

amumu ole kafɔɔ kamadiɛ.

17 "Suoto siyɔɔ otii wɔ di Yaa nlolaa ni;

nioso tansĩ Nnwɔ Ninleke ni letoko nanfi.

18 Diekye nnwɔɔ nintika batii nkɔ, kafɔɔ ankple annii mi;

ampila batii, kafɔɔ kɔnɛɛ nɔɔ ninkple kunyɔɔsa ɔfiɛ nɛ.

19 Abadiki fɔ ankyeko ɛlaa akuɔ be nietũ fɔ ni kamɛ;

di okuɛnsinle okpile kuonwii dilɔbatũ fɔ.

20 Di kɔka obe kamɛ abadiki fɔ di kukpi kamɛ,

di kakpɛ kamɛ kafɔɔ, ɔlɔbata kapamii katofo fɔ.

21 Abadiki fɔ di ɔkplalomii wɔ ninkpɔnɔfɔsa ni batii nnɛɛ,

tanyɛkɛ kafɔɔ nse asaa ɔlalaa lɛwa.

22 Fɔɔwa kawɔɔ ku kɔka ɔbama,

nioso flɔbayɛkɛ babɔkɛɛ yakaya kaasɔ suoto.

23 Diekye kofe lɛfɔ afuɔ dilɔbakpee fɔ kubuɛ,

babɔkɛɛ yakayaka kafɔɔ kamasiɛ di atoko ɔkyɛ ole ku afɔ.

24 Fabatofo falɛ ɔlaa kuonwii nnaa di lɛkpaayo lɛfɔ;

nse fɛɛka lɛsaawɛ lɛfɔ, kuninwii dilɔbayu.

25 Fabanya falɛ babi lɛfɔ kamapɔ,

banantii lɛfɔ kafɔɔ fɛle kasɔ sɛfa.

26 Fababe fankpasɔ fiɛ fababuo di ɔkya kamɛ,

fɛle mmle mannii ni kamɔɔ di ofiɛlɛbee kamɛ.

27 "Butɔɔsɔ nle mmle buonyu, buɔnya bulɛ nwaako dile.

Nioso nu nwu, faayɔ nwu fablako suoto lɛfɔ ɔkpɛ."