1 Ninfɛ di Yob ladiki kanya aatɔkɔ SAATE nwu alɛ:

2 "N-ye nlɛ faafuo asaa amuu ɔbla;

kuonwii dilaafuo kɔkpaa lɛfɔ didiki ɔlalaasa.

3 Faakaalɛ falɛ, ‘Owe ninle nnwɔ nintĩi ni kɔkà nii osuku alɛ lɛsaatofo diesi ni?’

Nwaako, lakakatɛ di asaa ya suoto ntanu ni kasɔ,

asaa ya niasii ni ɔkpɛ ɔbla ɔtɛɛ ni, alɛ katofo nii.

4 "Faabuɛ falɛ, ‘Kanunua nu, kamakakatɛ;

kamakaalɛ fɔ ɔlaa,

ni fabadiki kanya.’

5 Atoko nii ntoonu lɛkpanko lɛfɔ,

kafɔɔ kanunua anu nii ntɔɔnya fɔ.

6 Nioso lekyidi suoto nii,

lekyisa nkpa di kudu ku ntɔ̀ kamɛ."

7 Di SAATE nwu latɔkɔ ni Yob sɛlaa se mmle kamaa, ni di SAATE nwu latɔkɔ Elifas, Teman otii nwu alɛ, "Ɔblɔ kɔfiɛ mi di afɔ ku basiɛwo lɛfɔ banyɔ nwu suoto. Diekye bitakakatɛ ɔlaa biene di suoto nii, fɛ mmle di kpɛmblatɛ nii Yob labla nii. 8 Nioso biyɔ banankyue bakuɛnsĩ ku akunumuu akuɛnsĩ, biɛkyɛ kpɛmblatɛ nii Yob nfũ biɛlaata ofiɛ asaaɔta bita suoto lee. Kpɛmblatɛ nii Yob kamapɛ ɔlaa anta ye, ami kafɔɔ kamafũ ɔlaa ɔpɛ nɔɔ, alɛ naananfi ye kootoko di sibuu lee nwu kanya. Bitakakatɛ ɔlaa biene di suoto nii fɛ mmle di kpɛmblatɛ nii Yob labla nii." 9 Nioso Elifas, Teman otii nwu, Bildad, Suhi otii nwu ku Sofa, Naama otii nwu labla fɛ mmle di SAATE nwu latɔkɔ ma nii; ni di SAATE nwu lafũ Yob ɔlaa ɔpɛ ɔta nwu nɛ.

10 Di Yob lapɛ ɔlaa aata ni basiɛwo nɔɔ nwu aaloo ni sɛmaa, SAATE nwu lakple aabla Yob saawɛntɛ, ni aatɔɔ asaa ya niawɛ nwɔ ni saa di akyuu anyɔ kanya nɛ. 11 Babilɛma-suɔtɔbi ku babilɛma-sankobi bamuu ku otii biala niatofo nwɔ ni saa, lawa baabaleko nwɔ alesaa di leyo nɔɔ. Baatɔɔ yɔɔsa, baakpee nwɔ kɔnɛɛ kaafutu di dibuo nimuu di SAATE nwu lata diawa nwɔ ni di suoto. Obiala lɛma latɔɔ koto fututu ku koto sɛɛle lɛkɔnii.

12 SAATE nwu lawii Yob lɛtɔtrɔ aalenkee lɛkasale nwu di nkpa nɔɔ osiɛ bule kamɛ. Aawɛ bafoso lefosi-nkpe-nna, kapu bapɔnkɔ nkpe nkuɔ, banankyue-suɔtɔ ba nimbla ni ɔkpɛ di afe kakpe kanwii ku babɔkɛɛ ba nintuka ni atoo kakpe kanwii. 13 Aawɛ kafɔɔ babisuɔtɔbi bakuɛnsĩ ku babisankobi batiɛ. 14 Aatika obisankobi kasale leyooto alɛ, Yemima, ɔnyɔɔfa Kesia, otiɛfa kafɔɔ Keren-Hapuk. 15 Kakɔkaakɔ ditawɛ di kasɔ nwu suoto di basanko lawɛ baalɛ ni sekpeele fɛ Yob babisankobi nwu. Ote lɛma kafɔɔ lata ma atesaa manko babilɛma-suɔtɔbi.

16 Di n-ya mmle sɛmaa, Yob lasiɛ nkpa alɛɛ kɔlafa-afosi-ana; aanya babi nɔɔ ku babi lɛma dialaadu kɔna naafa. 17 Nioso Yob labe nwaa, aakpi di sɛnɔɔfo kamɛ.