1 Ninfɛ di Sofar, Naama otii nwu ladiki kanya alɛ:

2 "Disibu nii le nikokpee mi ni kubuɛ kɔtɛɛ ndiki kanya

diekye ntɔɔkpɔkpɔtɔ osie kanya.

3 Lenu ɔlaa osĩ ɔta wɔ niɛtɛ mi ni kaasɔ,

ni di lɛsɔnu nii lɛtɛɛ alɛ ndiki kanya nɛ.

4 "Nwaako faye mmle diate ni diayɔ ni di saa,

bia di obe wɔ di Yaa labla ni otii aatɛ ni di kasɔ suoto,

5 alɛ batii kpile suoto lɛyɔɔ nle kakuu,

mba ninan-ye ni Yaa lɛpɔ kafɔɔ ninklɛ.

6 Kuntɛ suoto katoo ɔtakatɛsa nɔɔ ndu osi,

di disi nɔɔ kafɔɔ nkpanko alokonkyɛ yi,

7 abakpi dinaa ni kaloo, fɛle nnwɔɔ omu nɔɔ mbi;

mba nintɔɔnyɔɔ ni kamakaalɛ alɛ, ‘Nnwɔɔ mɔ?’

8 Abayɛ fɛle kɔlaafɔ, blɔbasinnyɔɔ,

abayu fɛle kakyɛ odiki otuo.

9 Anu ya nianyɔɔ ni dilɔbasinnyɔɔ;

leyo nɔɔ dilɔbasinnyɔɔ.

10 Babi nɔɔ kamakplesa lɛsaawɛ manta bapiitɛ;

nnɛɛ nɔɔ mmu kamakplesa lɛsaawɛ nɔɔ ninta ma.

11 Sekosopo osie nwu nieyii ni akufi nɔɔ kamɛ

kamanate ku nnwɔɔ di kudu kamɛ.

12 "Kuntɛ asaa kpile ɔbla lɛmɛnɛmɛnɛ kanya nɔɔ,

anwofasa nya di ɔkplalomii nɔɔ kalɔ,

13 kuntɛ oloofuo nya odiɛ ɔbla

eekple akle nya kafɔɔ di kanya nɔɔ yi,

14 ni alɛsaa nɔɔ kamakplakpla di kafutu nɔɔ kamɛ;

abakple asaanwu adii di kamɛ nɔɔ.

15 Abatùfa lɛsaawɛ le aamɛ ni antɛ;

Yaa kamata kafutu nɔɔ nlaa nya antɛ.

16 Abafiɔni asaanwu adii;

kɔwɛɛfɛɛko anyɛɛ nima lo nwɔ.

17 Ɔlɔbale seklenyii nwu,

ku sekle se nikobiɛ sinfe ni ku bablɔ ku nnyɛɛntu be nienii nii.

18 Abakplesa asaa ya suoto diebuo nwɔ ni anta, anamale nya nii;

ɔlɔbale nle ɛɛwɛ eekyeko ni asaa osunsũ nɔɔ suoto.

19 Diekye eenyinka bapiitɛ ɛɛtɛ ma dipii;

eefunfũ ayo ya anantofo nii.

20 "Nwaako ɔlɔbawɛ ɔnyɛɛ ɔtɛ di nle eetika ni anu;

ɔlɔbafuo lɛsaawɛ nɔɔ ololaa ɔtɛ.

21 Lɛsalɛsaa kuninwii ninsimbu aale nii;

nioso lɛsaawɛ nɔɔ dilɔbasinte.

22 Di asaa nɔɔ kpinwu lɛwɛ nwu kamɛ yi, nimiina kamalenkee nwɔ nnɛɛ;

dibuo osie omuu kamawa nwɔ di suoto.

23 Nse atoole, eeyiisa kafutu nɔɔ yi,

Yaa kamasoosa ɔblɔ nɔɔ yakayaka di suoto nɔɔ

ansoosa aklɔklɔlɛ di suoto nɔɔ.

24 Kuntɛ eetoso di lɛbɔɔsaa lɛkpɛsaa kanya yi,

kupa lɛbɔɔsaa lɛkplɔ pĩɔpĩɔ kanya kamatofo nwɔ,

25 Abananfi ni ambɔkɔtɛ di kamaa nɔɔ,

kapĩɔpĩɔkɔ nwu andiki di akɔ̀ɔ nɔɔ kamɛ.

Difu kamamufũ nwɔ;

26 ditunu tunutunu nte disoko lɛsaawɛ nɔɔ.

Ɔtɔ wɔ mananfɛ ni nimafiɛ nwɔ

kunlalaasa asaa ya niebu ni di lɛkpaayo nɔɔ kamɛ.

27 Osi kamadiki sikpile nɔɔ kayi;

kasɔ kamataka di suoto nɔɔ.

28 Di Yaa ɔblɔ dii nwu suoto yi,

atukɛ ntu kamatuka leyo nɔɔ asaa ninsifiko.

29 Nkpo ninle nkpa be di Yaa lɛta ni bakpiletɛ nɛ,

atesaa ya di Yaa lɛbla ɛɛta ma nii."