1 Ninfɛ di Yob ladiki kanya alɛ:

2 "Ntoonu sɛlaa kpinwu fɛle nse mmle okle;

dibuo kɔnɛɛ okpee kaafutu bakpeetɛ bile bamuu lee!

3 Kɔfɛɛfɔ lɛkakatɛ lɛfɔ kyɔnkyɔlɔ nwu dilɔbase diidii?

Obe nikokpee fɔ kubuɛ oso fɔɔkakatɛ nkpo?

4 Ami kafɔɔ kafuo ɔkakatɛ fɛle aye okle,

nse fɛle aye nin-yɛ di kayilakɔ nii yi,

ntabafuo sɛlaa biene obuɛ ɔtaka oyila di suoto lee,

ntũkunsa disi nii nkpee ye.

5 Kafɔɔ kanya nii kamakpee ye osie;

anyasibi nii kamakpee ye kɔnɛɛ kaafutu ninta otu nte ye.

6 "Kafɔɔ nse lɛkakatɛ, ninyinyi nii nwu kanya ninwakasɔ;

nse lɛmaasa kanya kafɔɔ, dibuo nwu ninsifi.

7 Oo Yaa, nwaako fatɔɔta ɔnyɛɛ leloo mi;

fatɔɔwɔɔsa leyo nii nimuu.

8 Fatoonii mi- ni ditookple kamaadiyilasaa nɛ;

lekoso nii kɔtaka katoo, nin-yɔ ɔlaa di suoto nii.

9 Yaa nnya ɔblɔ ankpeekoe, ambɛbɛɛ mi di ɔblɔ nɔɔ kamɛ,

anwee anyɛɛ nɔɔ ankpee mi;

anta lo nii nfiɛ anu nɔɔ antika di suoto nii.

10 Batii mbɛ n-nya lɛma mamma mi;

mampɛ mi nnɛɛ di atokosi ku ɔblɔ kanya

mansi kanya kafɔɔ di suoto nii.

11 Yaa ntɔɔyɔ mi eekpee di batii kpile nnɛɛ,

ni eefuki mi eekpee di bakpiletɛ sɛnɛɛfɔɔ kamɛ nɛ.

12 Asaa amuu lalɛ mi ɔtɔɔkyɛ, kafɔɔ aapɛ mi kaasɔ;

aamufũ mi siimu, ni aabibiɛ mi nɛ.

Eediki anu nɔɔ eetika di suoto nii;

13 akplɔ bataatɛ nɔɔ lɛmana mi beekyi.

Eedufu akɛɛ nii, anannya ni nyaami,

ni eediki kalokalo nii eekpete kaasɔ nɛ.

14 Ankusa anwa suoto nii fɛle kpɛtɛ;

antitika mi nkɔ di suoto.

15 "Ntɔɔkaa leboko letĩi suoto nii kukũ,

lɛyɔ osie nii kafɔɔ lekookaa di kudù kamɛ.

16 Anu nii lɛsɛɛ ta kaku owi oso,

Ditunu tunutunu lɛmana anu nii diekyi;

17 kafɔɔ nnɛɛ nii lekyidi kudu okpee

ɔlaa ɔpɛ nii kafɔɔ lɛkpa kamɛ.

18 "Oo kasɔ, tantĩi ntɔ nii;

tanta ɔlaa ɔpɛ nii latɛ ɔnyɛɛ diidii!

19 Bia kanunua kamaayilatɛ nii nfɛ nkpe di osi;

nnwɔ ninkpɛ antɛɛ ni nkpe kaatoo.

20 Nnwɔ ninkpanaa mi ni nle siɛwo nii,

anu nii kowi kaku anta Yaa;

21 alɛ aayila di otii disi antikiti Yaa lekoto

fɛ mmle di otii ntikiti ni lekoto anta ni siɛwo nɔɔ.

22 "Alɛɛ asɛɛ lete nimafe

fiɛ kamakyɛ osuku wɔ manankple nii.