1 "Fabafuo lefiatan* odiki ku dadiwa

ee fanii ɔkplalomii nɔɔ ku okũ fantɛ?

2 Faafuo okũ ɔyɔ otũ ofenko di onwu nɔɔ

ee fandufu kayɛɛ nɔɔ ku dadiwa?

3 Abakple antootikiti fɔ lekoto alɛ nyɔɔ nyaami?

Abakakatɛko fɔ ku sɛlɔ buɛɛ?

4 Ababla kanya ninii ku afɔ

alɛ afɔ fafũ nwɔ fɛ ɔlanle lɛfɔ di nkpa nɔɔ mmuu kamɛ?

5 Faafuo nwɔ ɔbla fɛle kansiɛ wɔ beese ni,

ee fankpee nwɔ kɔnyɛnɛ fanta basankobi lɛfɔ?

6 Asaabasunsũtɛ kamafuo nwɔ ɔkyɛlɛnsa ofũ lɛsaa bamba?

Babasɛ nwɔ manta di asaabayatɛ kamɛ?

7 Faafuo ɔkyɔɛ ɔyɔ odufu suoto kukũ nɔɔ

ee fadufu disi nɔɔ ku lɛkplɔ le mantofo ni kɔkpaku?

8 Nse fɛɛyɔ kɔnɛɛ feetika nwɔ di suoto yi,

fabatofo mmle abatũkunsa fɔ nii, diidii kafɔɔ flɔbasinkple fabla!

9 Akpakpa falɛ foomufũ nwɔ, sɛlaa sile;

ɔnya nɔɔ lete nle lɛyɛkɛsaa.

10 Sɛkambi otii kuonwii nnaa abafuo nwɔ ni otũkunsa.

Ni owe nfɛ nikafuo ɔtaka oyila mi di suoto?

11 Owe ninkpe ɔlaa di suoto nii, alɛ dikpeni lɛta koto?

Lɛsaa biala di kolo kalɔ ale mi ale.

12 "Namadiɛ ɔkakatɛ di nkpaa nɔɔ suoto,

osie nɔɔ ku mmle di letembi nɔɔ kɔlɛ ni onyu.

13 Owe nimafuo osi akpeele nɔɔ odiki ɔtɛ?

Owe nimatɛɛtɛɛ nwɔ ku pɔnkɔ disiɛsaa?

14 Owe dikle okɔnsɔ ambɛ nwɔ kanya,

an-nyu anyɛɛ yɛkɛle nwu anfenko?

15 Kubiafunsaa sèle ntika di kamaa nɔɔ,

beetika nya baawo kpinkpĩ;

16 dibiala lɛtɛ dikaako lewo nɔɔ

alɛ kɔfɛɛfɔ dilaabuo di obo lɛma.

17 Bɛɛkyasa nya di bawo suoto kpinkpĩ;

bakaa baawo, nioso blaafuo ɔblá.

18 Osiɛntɛ nɔɔ mmunaa ɔtɔ;

anu nɔɔ nsesee fɛle olesɛ kufĩ.

19 Ɔtɔ sɛkplalomii ndie sinkye kanya nɔɔ;

atɔmbula nkpakpaa ante.

20 Kɔyɔ n-fɛ di anwunfie nɔɔ,

fɛ mmle kundie ni di dibukii le nikofuu ni di sekpoku ɔtɔ kalɔ.

21 Owiidi nɔɔ nkpee akaa ɔtɔ,

ɔtɔ abembe ndie ankye kanya nɔɔ.

22 Osie nsi di simu nɔɔ;

difu ninleko nwɔ katũ.

23 Suoto sina nɔɔ abɔtɔ lɛkya kpa;

site kekleke sinamakpa nii.

24 Lɛkankpɛɛ nɔɔ nkpe osie fɛ difuɔnkpaa,

dikpe osie fɛ okuɔlɛ.

25 Nse ɛɛtaka eeyila, basientɛ n-yɛkɛ;

mankple nkpaamaa fiɛ andiki kɔkpaa.

26 Kapamii ee lɛkplɔ ee ɔkyɔɛ ee lɛkplɔ kaanale

le nindu nwɔ ni nimbla nwɔ lɛsalɛsaa.

27 An-nya lɛbɔɔsa fɛle ɔpɛmii

kupa kafɔɔ fɛle owoso buule.

28 Kɔtaa ninntɔɔ aatoso;

kutiabi nte nwɔ fɛle sɛsɔ.

29 Kawosoku nte nwɔ fɛle ɔpɛmii;

akplɔ diwi sɛlɔ ntɔɔ am-ma.

30 Kafutusɔ nɔɔ nle dibukii nkyɛ blɛblɛ,

andiɛ nnafukpaa antika di apatapta kamɛ fɛle kakpaa.

31 Anta nkyofokɔ nfuu fɛle ɔkakutu wɔ ninkofuu nii,

ambakaa lekpo fɛle nnɔnyi nikofuu di dibukii kamɛ.

32 Andiɛ osuku wɔ ninsesee ni antɛ sĩ sɛɛmaa nɔɔ;

otii owo kamanyu alɛ kakyofokɔ nwu nkpe sinwini fututu.

33 Lɛsalɛsaa kuninwii kaasɔ suoto diɛkyɛkyɛ ku nnwɔɔ-

bɔkɛɛ wɔ ninanyɛkɛ nii.

34 An-nyu mba ninkanta ni bamuu nyakatãa;

nnwɔɔ ninle ɔka di mba bamuu ninkanta ni suoto nɛ."