BAKA 2 15

Yuda Ɔka Asaria

1 Di Israel ɔka Yeroboam alɛɛ afosi-anyɔ-dikuɛsinle kamɛ yi, ni di Amasia obisuɔtɔbi, Asaria, Yuda ɔka lakye kasɔ aatoole sɛka nɛ. 2 Lefosi alɛɛ akuɔ aafũ fiɛ aabale ɔka. Ni aale sɛka di Yerusalem alɛɛ afosi-anɔɔ-anyɔ nɛ. Ɔya leyooto niale Yekolia, aakye ni Yerusalem nɛ. 3 Aabla lɛsaa le niasiɛko ni di SAATE nwu anu, fɛ mmle di ote Amasia labla nii. 4 Kafɔɔ batabibiɛ ntakalekɔ nwu; ni di batii lakple baalaatɔɔta sele, baatɔɔfiɛ olufui ninfa nɛ.

5 SAATE nwu lata ofiɛ sɛɛle lapɛ ɔka Asaria dialaase di dii le aakpi nii, ni aablasa suoto aasiɛ di leyo bamba nɛ. Ninfɛ di ɔka obisuɔtɔbi, Yotam latoonyu lɛkayo, aayila kafɔɔ di batii nwu kanya di kasɔ nwu suoto nɛ.

6 Di Asaria sɛka ole sɛsaabla bamba ku n-ya amuu aabla nii, bɛɛkpana nya di Yuda baka sekofolaa kukũ kamɛ. 7 Ni di Asaria latɛ ɔnyɛɛ ku bate nɔɔ, ni baakookaa nwɔ di ɔlɔɔkɔ lɛma di Dawid Okpoo kplɛ kamɛ nɛ. Ni di obisuɔtɔbi nɔɔ Yotam layila nwɔ kaanya fɛ ɔka nɛ.

Israel Ɔka Sakaria

8 Di Yuda ɔka Asaria alɛɛ afosi-atiɛ-lɛnɛnle kamɛ yi, ni di Yeroboam obisuɔtɔbi, Sakaria labale Israel ɔka di Samaria, ni aale sɛka awɛntɛ akuɔ nɛ. 9 Aabla okpile di SAATE nwu anu, fɛ mmle di bate nɔɔ labla nii. Atadiɛ sikpile se di Nebat obisuɔtɔbi, Yeroboam labla nii, nse aata Israel labla nii.

10 Yabes obisuɔtɔbi, Salum lakũ kanwumbe di Sakaria suoto. Aadieko nwɔ di batii nɔɔ anu, aalo nwɔ, ni aayila nwɔ kaanya fɛ ɔka nɛ. 11 Bɛɛkpana Sakaria sɛka ole sɛsaabla bamba di Israel baka sekofolaa kukũ kamɛ. 12 Nioso SAATE nwu ɔlaa wɔ aatɔkɔ ni Yehu lawa kaanya alɛ: "Banantii lɛfɔ kamasiɛ di Israel lɛkakpomii suoto ninaadu kɔna naafa suoto."

Israel Ɔka Salum

13 Yabes obisuɔtɔbi, Salum labale ɔka di Yuda di ɔka Usia*15.13 Nnwɔɔ mankple manlɛɛ Asaria nɛ alɛɛ afosi-atiɛ-lɛnaasinle kamɛ. Ni di Salum lale sɛka di Samaria kɔwɛntɛ kunwii nɛ. 14 Ninfɛ di Gadi obisuɔtɔbi, Menahem ladie di Tirsa aakata aakyɛ Samaria nɛ. Ni aalaadieko Yabes obisuɔtɔbi, Salum di Samaria, aalo nwɔ, ni aayila nwɔ kaanya fɛ ɔka nɛ.

15 Salum sɛka ole sɛsaabla bamba ku kanwumbe ka katũ aale ni yi, bɛɛkpana nya di Israel baka sekofolaa kukũ kamɛ.

16 Di obe nwu kamɛ Menahem ladie di Tirsa aalaadieko Tifsa ku otii biala niasiɛ ni di okpoo kplɛ nwu kamɛ ku mba di sɛlɔɔkɔ ninwu, ta baasĩ ni n-yoko lɛma ɔsɛkɛtɛ ɔta ma ni oso. Ni aawɔɔsa Tifsa okpoo nwu, aabɛbɛɛ bamɛlakatɛ bamuu amɛ nɛ.

Israel Ɔka Menahem

17 Di Yuda ɔka Asaria alɛɛ afosi-atiɛ-lɛnaasinle kamɛ, Gadi obisuɔtɔbi, Menahem labale Israel ɔka, ni aale sɛka di Samaria alɛɛ lefosi nɛ. 18 Aabla okpile di SAATE nwu anu. Di sɛka ole nɔɔ simuu kamɛ, atadiɛ sikpile se di Nebat obisuɔtɔbi, Yeroboam labla nii, nse aata Israel labla nii.

19 Ninfɛ di Asiria ɔka Pul*15.19 Nnwɔɔ mankple manlɛɛ Tiglat Pileser nɛ lataka di kasɔ nwu suoto, ni di Menahem latɔɔ koto fututu bakilo nkpe afosi-atiɛ-bana alɛ Pul katɔɔ lɛkyakaako ankpee nwɔ osie alɛ sɛka kalekɔ nɔɔ kayila kpinkpĩ. 20 Menahem lafũ koto ko mmle di Israel. Osuɔtɔ saawɛntɛ biala lakũ koto fututu afosi-anɔɔ alɛ baayɔ manta Asiria ɔka. Nioso Asiria ɔka ladie, atasinsiɛ di kasɔ nwu suoto.

21 Di Menahem sɛka ole sɛsaabla bamba ku n-ya amuu aabla nii yi, bɛɛkpana nya beekpee di Israel baka sekofolaa kukũ kamɛ. 22 Ni di Menahem latɛ ɔnyɛɛ ku bate nɔɔ nɛ. Ninfɛ di obisuɔtɔbi nɔɔ Pekahia layila nwɔ kaanya fɛ ɔka nɛ.

Israel Ɔka Pekahia

23 Di Yuda ɔka Asaria alɛɛ afosi-anɔɔ kamɛ, ni di Menahem obisuɔtɔbi, Pekahia labale Israel ɔka di Samaria, ni aale sɛka alɛɛ anyɔ nɛ. 24 Ni di Pekahia labla okpile di SAATE nwu anu nɛ. Atadiɛ sikpile se di Nebat obisuɔtɔbi, Yeroboam labla nii, nse aata Israel labla nii. 25 Ninfɛ di ɔnɔɔfotii nɔɔfo nɔɔ onwii, Remalia obisuɔtɔbi, Peka lakũ kanwumbe di suoto nɔɔ nɛ. Aakpaa Gilead bakpɛtɛ afosi-anɔɔ aaklee, ni baalaalo Pekahia ku Argob ku Arie di lɛkayo katanikokɔ kamɛ di Samaria nɛ. Nioso Peka lalo Pekahia, ni aayila nwɔ kaanya fɛ ɔka nɛ.

26 Pekahia sɛka ole sɛsaabla bamba ku n-ya amuu aabla nii yi, bɛɛkpana nya beekpee di Israel baka sekofolaa kukũ kamɛ.

Israel Ɔka Peka

27 Di Yuda ɔka Asaria lɛlɛɛ afosi-anɔɔ-lɛnyɔɔfa kamɛ, ni di Remalia obisuɔtɔbi, Peka labale Israel ɔka di Samaria, ni aale sɛka alɛɛ afosi-anyɔ nɛ. 28 Ni aabla okpile di SAATE nwu anu nɛ. Atadiɛ sikpile se di Nebat obisuɔtɔbi, Yeroboam labla nii, nse aata Israel labla nii.

29 Di Israel ɔka Peka obe kamɛ, Asiria ɔka Tiglat-Pileser lafũ Iyon, Abel Bet Maaka, Yanoa, Kedes ku Hasor. Aafũ Gilead ku Galilea, di Naftali kasɔ kamuu nkyakaa nii, ni aakpaa batii nwu bamuu aasifiko Asiria nɛ. 30 Ninfɛ di Ela obisuɔtɔbi, Hosea lakũ kanwumbe di Remalia obisuɔtɔbi, Peka suoto nɛ. Aadieko nwɔ, aalo nwɔ, ni aayila nwɔ kaanya fɛ ɔka, di Usia obisuɔtɔbi, Yotam lɛlɛɛ nɔɔ afosi-anyɔ kamɛ nɛ.

31 Di Peka sɛka ole sɛsaabla bamba ku n-ya aabla nii yi, bɛɛkpana nya beekpee di Israel baka sekofolaa kukũ kamɛ.

Yuda Ɔka Yotam

32 Di Remalia obisuɔtɔbi, Israel ɔka Peka lɛlɛɛ nyɔɔfa kamɛ yi, ni di Usia obisuɔtɔbi, Yotam lakye kasɔ aatoole sɛka di Yuda nɛ. 33 Alɛɛ afosi-anyɔ-anɔɔ aafũ fiɛ aabale ɔka, ni aale sɛka di Yerusalem alɛɛ lefosi-akuɔ nɛ. Ɔya leyooto niale Yerusa, Sadok obisankobi aale. 34 Aabla lɛsaa le niasiɛko ni di SAATE nwu anu, fɛ mmle di ote Usia labla nii. 35 Kafɔɔ batabibiɛ ntakalekɔ nwu; ni di batii lakple baalaatɔɔta sele, baatɔɔfiɛ olufui ninfa nɛ. Yotam lase SAATE nwu olekatakɔ Katoo kasɔ Kayoko nwu letofo.

36 Di Yotam sɛka ole sɛsaabla bamba, ku n-ya aabla nii yi, bɛɛkpana nya di Yuda baka sekofolaa kukũ kamɛ. 37 (Di ayi nwu nkpo kamɛ, SAATE nwu lakye kasɔ aatookpee Siria ɔka, Resin ku Remalia obisuɔtɔbi, Peka alɛ bataka bayila di Yuda suoto.) 38 Ni di Yotam latɛ ɔnyɛɛ ku bate nɔɔ, ni baakookaa nwɔ ku mma di Dawid Okpoo kplɛ kamɛ, kuale ni ote okpoo kplɛ. Ni di obisuɔtɔbi nɔɔ Ahas layila nwɔ kaanya fɛ ɔka nɛ.