1 Naaman lale kakpɛ kanyayilatɛ di Siria ɔka bakpɛtɛ kamɛ. Aale otii kplɛ di saate nɔɔ anu, baatɔɔ dibu nwaa, diekye SAATE nwu lata Siria lelenkee diafe ni di suoto nɔɔ. Aale kpɛtɛ sientɛ, kafɔɔ aatɔɔfiɛ ɔfiɛ sɛɛle.

2 Di obe onwii kamɛ, Siria batii lakyɛ baalaamufũ okpeele sɛlanle di Israel, ni aatoosumu Naaman ɔsɔfɔ nɛ. 3 Ni di okpeele nwu latɔkɔ saate-sanko nɔɔ alɛ, "Nse fɛle saate nii kamakyɛ Yaa ɔlaabuɛtɛtɛ wɔ ninkpe ni di Samaria nfũ! Nse atabakya nwɔ ɔfiɛ sɛɛle nɔɔ nwu."

4 Ni di Naaman lakyɛ aalaatɔkɔ saate nɔɔ ɔlaa wɔ di ɔsankobi nwu niakye ni Israel labuɛ ni nɛ. 5 Ninfɛ di Siria ɔka ladiki kanya alɛ, "Dikpe nii fɛɛkyɛ, kamata Israel ɔka kukũ." Nioso Naaman lasifi, aaklee koto fututu onutũ bakilo alafa atiɛ-afosi-ana, koto sɛɛle bakilo afosi-akuɛnsĩ ku abula sɛkpa lefosi. 6 Kukũ ko aaklee aakyɛnko ni Israel ɔka labuɛ alɛ: "Di kukũ ko mmle kanya, lekpee kpɛmblatɛ nii Naaman ɔkyɛ lɛfɔ nlɛ kya nwɔ ɔfiɛ sɛɛle nɔɔ nwu."

7 Di Israel ɔka lakaɔka kukũ nwu, ni aabɛbɛɛ akpeele wua nɔɔ aabuɛ alɛ, "Yaa nle? Kafuo otii olo, nkple nsɛnkɛsɔɔ? Be oso di otii wɔ mmle nkpee mi otii alɛ nkya nwɔ ɔfiɛ sɛɛle nɔɔ? Nyu mmle oomiɛ alɛ adieko mi ni kalɔ̀!"

8 Obe wɔ di Elisa, Yaa otii nwu lanu alɛ Israel ɔka ntɔɔbɛbɛɛ ni akpeele wua nɔɔ yi, ni aatɔɔ kanya ka mmle alɛ: "Be oso fɛɛbɛbɛɛ akpeele wua lɛfɔ? Ta osuɔtɔ nwu awa ɔkyɛ nii, ni abatofo alɛ Yaa ɔlaabuɛtɛtɛ nkpe di Israel." 9 Nioso Naaman lasifi ku bapɔnkɔ nɔɔ ku bakeke ba di bapɔnkɔ nnanfi nii, baalaayila di Elisa leyo kayoko. 10 Ni di Elisa lakpee tɛkyɛntɛ aalaatɔkɔ Naaman alɛ, "Tɔkyɛ faalaafoto suoto lɛfɔ sikuɛnsĩ di Yordan okle kamɛ, nse suoto lɛfɔ ntookple di akpa ninsĩ, ni fababla klekle."

11 Kafɔɔ Naaman lasifi ku ɔblɔ ni aabuɛ alɛ, "Ami lanyu nlɛ, nwaako abadie anwa ɔkyɛ nii amayila anlɛɛ Saate, Yaa nɔɔ leyooto, anlɔlɔfɔ kɔnɛɛ nɔɔ di aba nwu suoto, ankya mi ɔfiɛ sɛɛle nii nwu. 12 Sɛɛ Abana ku Farpar sekle di Damasko diɛlɛ silenke Israel ntu biala? Naafuo mi okpe di suoto nii sibla klekle?" Nioso aamunikĩi aasifi ku ɔblɔ.

13 Ni di Naaman bakpɛmblatɛ lakyɛ baalaakaalɛ nwɔ alɛ, "Teete nii, nse fɛ Yaa ɔlaabuɛtɛtɛ nwu ntɔkɔ fɔ alɛ bla lɛsaa kplɛ lewo, nse faabla ni? Ni lɛ nfɛ, nse ɛɛtɔkɔ fɔ alɛ, ‘Foto suoto faaklekle’?" 14 Nioso aasoo aakyɛ aalaakpee suoto nɔɔ di Yordan okle sikuɛnsĩ, fɛ mmle di Yaa otii nwu latɔkɔ nwɔ nii. Ni di suoto nɔɔ lakple di akpa ninsĩ, siabla klekle fɛle okosopo suoto nɛ.

15 Ninfɛ di Naaman ku bakpɛmblatɛ nɔɔ bamuu lakple baasifi Yaa otii nwu nfũ nɛ. Ni di Naaman layila di Elisa anu aabuɛ alɛ, "Kanunua nfɛ n-ye nlɛ Yaa nnaa di kayi kamuu kamɛ, diediki di Israel lete. Lekoto nunua, fũ akyɛsaa ya mmle di kpɛmblatɛ lɛfɔ ɔkyɛ."

16 Ni di Yaa ɔlaabuɛtɛtɛ ladiki kanya alɛ, "Nwaako, di SAATE nwu lɛnya akpe ni nkpa, nnwɔ kosumu nii, namafũ lɛsaa kuninwii." Bia nu di Naaman lanyinka nwɔ yi, aasĩ.

17 Ninfɛ di Naaman labuɛ alɛ, "Nse floofũ yi, ni lekoto, ta ami, kpɛmblatɛ lɛfɔ akusii kɔtɛ, fɛ mmle kanya di bapɔnkɔ banyɔ kafuo ni otuka. Diekye diidii kpɛmblatɛ lɛfɔ dilɔbasinta ofiɛ asaaɔta ee oleɔta kuonwii ata yaa bamba kuonwii, kafɔɔ SAATE nwu lete. 18 Kafɔɔ SAATE nwu ayɔ lɛsaa le mmle ninwii akyɛ kpɛmblatɛ lɛfɔ: Nse saate nii lebuo Rimon kafiofa alɛ ɔɔwakasɔ aanta nya, ni ɛɛkpɛ di kɔnɛɛ nii suoto, di ami kafɔɔ lɛwakasɔ ninfa- nse lɛwakasɔ di Rimon kafiofa yi, ni SAATE nwu ayɔ nle mmle akyɛ kpɛmblatɛ lɛfɔ."

19 Ninfɛ di Elisa latɔkɔ Naaman alɛ, "Tɔɔkyɛ di atoko ɔkyɛ ole kamɛ."

Nni kamaa, di Naaman lakyɛ ni lɛkɔ kɛɛkɛ, 20 ni di Elisa, Yaa otii nwu kpɛmblatɛ Gehasi labuɛ aatɔkɔ suoto alɛ, "saate nii lasii ɔyɔɔ ɔta Naaman, Siria otii nwu alɛ atafũ ni asaa ya aawako nii. Nwaako, di SAATE nwu lɛnya akpe ni nkpa, kamatoso ntikanko nwɔ ninaafũ lɛsaa lewo di ɔkyɛ nɔɔ."

21 Nioso Gehasi lapɛsɛwa aati Naaman. Obe wɔ di Naaman lanyɔɔ nii, aasoo di keke nɔɔ suoto aalaakyakako nwɔ. Ni di Naaman lakaalɛ nwɔ alɛ, "Mme ɔlaa kuonwii nnaa?"

22 Ni di Gehasi ladiki kanya alɛ, "Ɔlaa kuonwii nnaa, saate nii niekpee mi alɛ, ‘Bakosopo banyɔ di Yaa ɔlaababuɛtɛtɛ dikudi kamɛ ntookye Efraim lekpenkpe kale bɛɛwa ɔkyɛ nii kanunua. Nioso lekoto tɛɛ koto fututu bakilo onutũ afosi-atiɛ- bana ku abula lɛkpa sɛnyɔ.’ "

23 Ni di Naaman labuɛ alɛ, "Nwaako, fũ bakilo afosi-akuɛnsĩ-banɛ." Aanyinka Gehasi alɛ afũ nya, ni aanii koto fututu bakilo afosi-akuɔ-banɛ nwu di bakotoku banyɔ kamɛ ku abula sɛkpa sɛnyɔ nwu nɛ. Ni di Naaman layɔ nya aata bakpɛmblatɛ nɔɔ banyɔ, baatuka nya baale Gehasi katũ nɛ. 24 Di Gehasi lawa ni lekpenkpe nwu, ni aafũ asaa nwu di bakpɛmblatɛ nwu nnɛɛ, ni aablasa nya di leyo nwu suoto aalaatɛ nɛ. Ni aata batii nwu lasifi nɛ. 25 Ninfɛ di Gehasi lakyɛ aalaayila di saate nɔɔ Elisa anu nɛ.

Ni di Elisa lakaalɛ alɛ, "Gehasi, ɔfɛ feekye?"

Ni di Gehasi ladiki kanya alɛ, "Kpɛmblatɛ lɛfɔ diɛkyɛ kaakɔkaakɔ."

26 Kafɔɔ Elisa latɔkɔ nwɔ alɛ, "Sɛɛ ninwuna nii ditasiɛko fɔ di obe wɔ di osuɔtɔ nwu lasoo ni di keke nɔɔ suoto aabakyakako fɔ ni? Obe wɔ mmle kamɛ dikaatɛ fanfũ koto ee fanfũ abula, nnɔnyi awoso, nnɔnyi awoso afe, bafoso, banankyue ee bakpɛmblatɛ-suɔtɔ ku bakpɛmblatɛ-sanko? 27 Nioso Naaman ɔfiɛ sɛɛle nwu kamaka di suoto lɛfɔ ku banantii lɛfɔ suoto dinaa ni kaloo." Ninfɛ di Gehasi lakyɛ di Elisa anu aasifi, ni di ɔfiɛ sɛɛle labla nwɔ suoto fututu fɛ atubakani nɛ.