1 Ninfɛ di Yaa ɔlaababuɛtɛtɛ dikudi nwu latɔkɔ Elisa alɛ, "Nyu, lɛba le munsi ni ku afɔ lɛsii wo obiibii. 2 Ta bukyɛ Yordan di obiala loo alaamiɛ lɛkpaka; faata wo buɔbla lɛba di nfa nkpo busiɛ."

Ni di Elisa labuɛ alɛ, "Bikyɛ."

3 Ninfɛ di onwii lɛma labuɛ alɛ, "Lekoto flootikanko bakpɛmblatɛ lɛfɔ?"

Ni di Elisa ladiki kanya alɛ, "Kamakyɛ." 4 Ni aatikanko ma nɛ.

Nioso baakyɛ Yordan baalaakyako awoso obudi ɔtɛ. 5 Di onwii lɛma latoobudi ni kowoso kunwii yi, ni di lɛbɔɔsaa kafɛ disi nwu lakpa diabuo di okle kamɛ nɛ. Ni aafaa aabuɛ alɛ, "Ao, saate nii, ɔnyanyi lanyanyi ka lo!"

6 Ni di Yaa otii nwu lakaalɛ nwɔ alɛ, "Ɔfɛ kɛɛkpa keebuo?" Obe wɔ aatuo nwɔ ni lɛba nwu, ni di Elisa labudi kawesee aafuki aakpee ninfa, ni di kafɛ lɛbɔɔsaa nwu latika diasaka di ntu nwu osi nɛ. 7 Ni di Elisa latɔkɔ nwɔ alɛ, "Tekete ka." Ninfɛ di osuɔtɔ nwu lananfi kɔnɛɛ nɔɔ aayɔ ka nɛ.

8 Ninfɛ di Siria ɔka latɔɔkpɛko Israel nɛ. Ni baakpee ni asi baawo ku banɔɔfotii nɔɔ baaloo nii, ni aatɔkɔ ma alɛ, "Kamabla kasikɔ nii di lɛba le ku lɛba le."

9 Ni di Yaa otii nwu lata Israel ɔka kanya alɛ, "Lolaa fanyu ku lɛba nwu ofe, diekye Siria batii kosoo manfe nfa." 10 Nioso Israel ɔka lawolaa lɛba le di Yaa otii nwu labuɛ nii. Di obe, di obe kamɛ Elisa ntɔkɔ Israel ɔka, di mmle aalolaa suoto nɔɔ annyu ni di aba nwu suoto.

11 Nle mmle latɛ diafiɛ Siria ɔka ɔblɔ. Ni aalɛɛ banɔɔfotii nɔɔ aasiisa, aakaalɛ ma alɛ, "Bitɔkɔ mi, owe loo nin-yɛ Israel ɔka kamaa?"

12 Ni di ɔnɔɔfotii nɔɔ onwii labuɛ alɛ, "saate nii, kuonwii loo, kafɔɔ Elisa, Yaa ɔlaabuɛtɛtɛ nwu ninkpe ni di Israel ntɔkɔ Israel ɔka sɛlaa se tutuutu fambuɛ ni di letenyo lɛfɔ kamɛ."

13 Ni di Siria ɔka ladiki kanya alɛ, "Bikyɛ biɛlaawolaa nfũ asi ni, ninkpee batii baalaamufũ nwɔ." Ni baakple baabatɔkɔ nwɔ alɛ: "Akpe di Dotan." 14 Ninfɛ aakpee bapɔnkɔ ku bakeke ba di bapɔnkɔ nnaanfi ni ku bakpɛtɛ siene nfa nɛ. Baakyɛ ku kakyɛ baalaamana okpoo kplɛ nwu baakyi.

15 Obe wɔ di Yaa otii nwu kpɛmblatɛ onwii lataka ni kaleesɛ ku kuyitatũ, ni aanya bakpɛtɛ ku bapɔnkɔ ku bakeke ba di bapɔnkɔ nnaanfi ni lamana okpoo kplɛ nwu baakyi. Ni di kpɛmblatɛ nwu labuɛ alɛ, "Ao, saate nii, be bubabla?"

16 Ni di Yaa ɔlaabuɛtɛtɛ nwu ladiki kanya alɛ, "Mba ninkpe ni ku awo mpɔ balenke mba ninkpe ni ku mma."

17 Ni di Elisa lapɛ ɔlaa alɛ, "Oo SAATE, tikiti nwɔ anu alɛ aanya." Ninfɛ di SAATE nwu latikiti kpɛmblatɛ nwu anu, ni aanyu nii, aanya alɛ akpenkpe nwu layii ku bapɔnkɔ ku ɔtɔ bakeke ba di bapɔnkɔ nnanfi ni bamuu lamana Elisa baakyi nɛ.

18 Di balo lasoo baatɔɔwa nwɔ ni katũ, Elisa lapɛ ɔlaa aata SAATE nwu alɛ, "Ta batii ba mmle anu abiɛ." Nioso SAATE nwu lata anu labiɛ ma, fɛ mmle di Elisa lakaalɛ nii.

19 Ninfɛ di Elisa latɔkɔ ma alɛ, "Diele nfũ ninle osuku, diele nfũ kafɔɔ ninle okpoo kplɛ nwu. Bitikankoe, kamakpaa ye nkyɛnko otii wɔ biowolaa ni nfũ." Ni aakpaa ma aasifiko Samaria nɛ.

20 Baabuo ni okpoo nwu baaloo nii, Elisa labuɛ alɛ, "SAATE, tikiti bakpɛtɛ ba mmle anu alɛ baanya." Ninfɛ di SAATE nwu latikiti ma anu, ni baanya alɛ nfɛ bakpe di Samaria nɛ.

21 Di Israel ɔka lanya ma nii, ni aakaalɛ Elisa alɛ, "Nlo ma? Teete nii, nlo ma?"

22 Ni aadiki kanya alɛ, "Tanlo ma. Fabalo batii ba feemufũ ni ku kapamii ee kɔtaa lɛfɔ kumu? Se ma alesaa ku ntu, baale, baanyi baakple basifi saate lɛma nfũ." 23 Nioso Israel ɔka latũ opunu kplɛ aata ma. Baale, baanyi baaloo nii, aadiki ma osuku, ni baakple baasifi saate lɛma nfũ nɛ. Nioso Siria bakpɛtɛ ladiɛ Israel kasɔ nwu odieko.

24 Di obe owo kamaa, Siria ɔka Ben-Hadad lasiisa bakpɛtɛ nɔɔ bamuu, ni baakata baakyɛ baalaamana Samaria baakyi nɛ. 25 Kɔka kplɛ kunwii latɔɔkpɛ di okpoo kplɛ nwu; ɔmana okyi nwu latɛ diaklɛ oso diata alɛ baatoosunsũ bɔkɛɛ wɔ nintuka ni atoo disi ninwii, koto fututu afosi-anɛ, ablonuma mbi kɔlafa onutũ kafɔɔ lafũ koto fututu anɔɔ.

26 Di Israel ɔka latoofe ni di oyoyiɛ nwu ɔlɔɔkɔ, ɔsanko onwii lafaa aalɛɛ nwɔ aatɔkɔ alɛ, "saate nii ɔka, kyakaakoe!"

27 Ni di ɔka ladiki kanya alɛ, "Nse SAATE nwu diɛkyakaako fɔ, ni ɔfɛ kamawɛ lɛkyakaako nta fɔ?" Di asaa kapɛkɔ? Di nta kawankɔ? 28 Ninfɛ aakaalɛ ɔsanko nwu alɛ, "Be ɔlaa kule?"

Ni di ɔsanko nwu ladiki kanya alɛ, "Ɔsanko wɔ mmle latɔkɔ mi alɛ, ‘Yɔ obisuɔtɔbi lɛfɔ fawako buowee miɛ, kɔsɛɛ kafɔɔ bubawee obisuɔtɔbi nii.’ 29 Nioso buawa obisuɔtɔbi nii buawee. Kaleesɛ latɔkɔ nwɔ nlɛ, ‘Yɔ obisuɔtɔbi lɛfɔ fawako buowee nwɔ,’ kafɔɔ ɛɛyɔ nwɔ eekookaa."

30 Obe wɔ di ɔka nwu lanu ni ɔsanko nwu sɛlaa yi, ni aabɛbɛɛ akpeele wua nɔɔ nɛ. Aakyɛ ni di oyoyiɛ nwu ɔlɔɔkɔ, batii nwu lanya alɛ aanyukũ leboko, aatɛ akpeele nɔɔ kasɔ. 31 Ni di ɔka nwu labuɛ alɛ, "Yaa anaanfi mi kootoko, bia ata diwɛ osie nwaa, nse Safat obisuɔtɔbi, Elisa disi lekple diɛsɔ di amuusi nɔɔ miɛ!"

32 Obe nwu Elisa lasiɛ di leyo nɔɔ, banɔɔfo nɔɔ kafɔɔ lasiɛ ku nnwɔɔ. Ninfɛ di ɔka lakpee otii aale nwɔ katũ nɛ. Kafɔɔ di tɔkyɛntɛ nwu lababuo nii, Elisa ntɔɔtɔkɔ banɔɔfo nɔɔ alɛ, "Bilɔɔnya mmle di batii-lotɛ nwu kokpee ni otii alɛ ababudi mi ni disi? Binyu, nse tɔkyɛntɛ nwu lɛwa yi, bisɛɛ kokloo, biɛsɛɛ ni bikpee nwɔ. Diele saate nɔɔ nnafukpaa ninkpi nwɔ kamaa nɛ?"

33 Obe wɔ aakple aatɔɔkakatɛ nii, ni di tɔkyɛntɛ lasoo aawa ɔkyɛ nɔɔ nɛ. Ni di ɔka labuɛ alɛ, "Dibuo le mmle lekye SAATE nwu nfũ. Be oso kakple nsoko SAATE nwu?"