1 Ninfɛ di ɔka lalɛɛ banɔɔfo bamuu di Yuda ku Yerusalem aasiisa nɛ. 2 Ni aakata aasifi SAATE nwu olekatakɔ ku Yuda batii, Yerusalem batii, olebatatɛ ku Yaa ɔlaababuɛtɛtɛ nɛ- batii bamuu, diayɔ ni di babisɔ dialaadu ni baanɔɔfo. Ni aaka Kanya Ninii Kukũ nwu baanya ni di SAATE nwu olekatakɔ sɛlaa simuu aakpee di atoko lɛma nɛ. 3 Ninfɛ di ɔka layila di lɛkpaka ɔlɔɔkɔ aase kanya ninii lese lɛbla di SAATE nwu anu- alɛ abatikanko SAATE nwu, anklee afiofa nɔɔ, anle sɛlaa nɔɔ, ankyɛ di sisuku nɔɔ ku otu nɔɔ omuu ku ɔkla nɔɔ omuu, alɛ ootika difuɔ di kanya ninii sɛlaa se bɛɛkpana ni di kukũ ko mmle kamɛ. Ninfɛ di batii nwu bamuu laka suoto lɛma simu ntam baata kanya ninii nwu nɛ.

4 Ni di ɔka latɔkɔ oletatɛ-nɔɔfo Hilkia ku olebatatɛ ba ninwa ni sɛɛmaa nɔɔ n-yoko banyuntɛ alɛ badiki asaa ya amuu bɛɛbla bɛɛta ni Baal ku afiɔ-sanko Asera ku osi asaa nwu amuu di SAATE nwu olekatakɔ kamɛ nɛ. Ni aafĩɛ asaa nwu di Yerusalem sɛmaa di Kidron Ɔtaata afe kamɛ, aalɛ ntɔ nwu aasifiko Betel nɛ. 5 Aadiɛ bafiɔtɛ olebatatɛ nwu di Yuda baka ladiki alɛ batɔɔfiɛ ni olufui di ntakalekɔ nwu di Yuda sekpoo ku nse niɛmana ni Yerusalem siekyi nii- mba ninfiɛ ni olufui manta ni Baal, kufĩ ku kɔwɛntɛ, awɛntrɛbi ku osi asaa nwu amuu. 6 Aakyisa Asera afiɔ-sanko nwu owoso di SAATE nwu olekatakɔ aalaatɛ di Kidron Ɔtaata di Yerusalem sɛmaa aafĩɛ nwu ninfa. Aakuɔ nwu kuabla muɛmuɛ, ni aayɔ mpu nwu aawiwii di batii bamuu sɛkya suoto nɛ. 7 Aabibiɛ kafɔɔ nfiofa basɔnɔbakpeetɛ basuɔtɔ ayo ya niawɛ ni di SAATE nwu olekatakɔ ku lɛba le di basanko nloso ni abula manta ni Asera afiɔ-sanko nwu.

8 Ni di Yosia lalɛɛ olebatatɛ bamuu aakyeko Yuda sekpoo nwu aawako, ni aabibiɛ ntakalekɔ nwu, diayɔ ni di Geba dialaadu ni Beerseba, aba ya di olebatatɛ nwu lafiɛ ni olufui. Aabibiɛ nfiofa nwu di n-yoko- di kayoko ka nikofe ni okpoo kplɛ nwu kanyayilatɛ, Yosua Kayoko ka ninkpe ni di okpoo kplɛ nwu kayoko ɔmɛntukyɛ nɛ. 9 Nu di ntakalekɔ nwu olebatatɛ ditabla ɔkpɛ di SAATE nwu oleɔta akyikye suoto di Yerusalem yi, baale bloblo wɔ di lɛnyankasaa diesi ni ku olebatatɛ wo lɛma.

10 Ɔka Yosia kafɔɔ labibiɛ lɛba le bɔɔlɛɛ ni Tofet ya niawɛ ni di Ben Hinom Ɔtaata, nioso kuonwii ditasinfuo obisuɔtɔbi ee obisankobi nɔɔ ɔyɔ ɔta ole di ɔtɔ kamɛ ɔta Molek. 11 Aabibiɛ bapɔnkɔ ba di Yuda baka lakleklesa baata ni kufĩ di SAATE nwu olekatakɔ nwu kayokontũ. Baayila ni di kaflɔnkɔ ka niakaako ni onɔɔfotii onwii manlɛɛ ni Natan-Melek leyo. Ninfɛ di Yosia lafiɛ bakeke ba di bapɔnkɔ nnanfi ni baakleklesa baata ni kufĩ nɛ.

12 Ni aakpakpaa ɔleɔta akyikye ya di Yuda baka lasesee ni di lɛkyá le niakaako ni Ahas osi leyo, ku oleɔta akyikye ya di Manase lapɛ ni di SAATE nwu olekatakɔ nflɔnkɔ nwu nnyɔ nɛ. Aakpakpaa nya ninfa, aabibiɛ nya wɔkyɔwɔkyɔ, ni aayɔ mpu nwu aawii di Kidron Ɔtaata nɛ. 13 Ɔka Yosia kafɔɔ labibiɛ ntakalekɔ nwu niawɛ ni di Yerusalem kufĩ katunkɔ di Kalalaa Lekpenkpe kala kasɔ- nnya nkpo di Israel ɔka Solomon lapɛ aata ni Sidon batii afiɔ-sanko Astoret diyududusaa nwu ku Moab batii afiɔ Kemos diyududusaa nwu, ku Amon batii afiɔ Milkom* diyududusaa nwu. 14 Yosia labibiɛ afiɔtii nwu aabubudi Asera sewoso, ni aatĩi aba lɛma nwu ku batii akufi nɛ.

15 Bia di oleɔta akyikye ya di Betel, katakalekɔ ka di Nebat, obisuɔtɔbi Yeroboam labla ni, aata Israel batii labla ni okpile- bia oleɔta akyikye ya ku katakalekɔ ka aabibiɛ nii. Aafiɛ katakalekɔ nwu, aakuɔ ka aabla mpu, ni aafiɛ Asera owoso kafɔɔ nɛ. 16 Ninfɛ di Yosia lanyunyu aafenko, obe wɔ aanya ni sɛkya se niate ni ninfa di lekpenkpe nwu ɔlɔɔkɔ yi, ni aata baadiki akufi nwu di sɛkya nwu kamɛ, ni aafiɛ nya di oleɔta akyikye suoto aakpɔnɔfɔsa nya, di SAATE nwu ɔlaa kanya, fɛ mmle di Yaa otii nwu labuɛ ni sɛlaa se mmle aatɛ nii nɛ.

17 Ni di ɔka lakaalɛ alɛ, "Obe ninle ninyumafuɔ nwu kɔnya ni?"

Ninfɛ di okpoo kplɛ nwu batii labuɛ alɛ, "Diotuo Yaa otii wɔ niakye Yuda aawa aabakakatɛ aayila ni di Betel oleɔta akyikye suoto nɛ. Asaa ya mmle nwu nkpo fatɔɔbla fɛɛta nya nɛ."

18 Ni di Yosia labuɛ alɛ, "Bidiɛ nya ate, kuonwii atankpee akufi nɔɔ kubuɛ." Nioso baadiɛ Yaa otii nwu akufi ku n-ya niale ni Yaa ɔlaabuɛtɛtɛ wɔ niakye ni Samaria akufi late.

19 Fɛ mmle aabla ni di Betel yi, Yosia lakpakpaa nya, ni aakpɔnɔfɔsa nfiɔfa nwu di ntakalekɔ be mmuu di Israel baka latofo ni di Samaria sekpoo kamɛ baayɔ baakpee ni SAATE nwu ɔblɔ. 20 Ni di Yosia lalo olebatatɛ bamuu ba di ntakalekɔ nwu di oleɔta akyikye suoto, aafiɛ batii akufi di suoto lɛnya nɛ. Ninfɛ aakple aasifi Yerusalem nɛ.

21 Ni di ɔka latɔkɔ batii nwu bamuu alɛ: "Bile SAATE nwu Okpi Diisi Ofe Dii nwu, fɛ mmle bɛɛkpana ni di Kanya Ninii Kukũ ko mmle kamɛ." 22 Diayɔ ni di obe wɔ kamɛ di Batunletɛ ba nialeko ni Israel katũ ee di Israel baka ku Yuda baka obe kamɛ yi, batale Okpi Diisi Ofe Dii le mmle okle banya. 23 Kafɔɔ di Ɔka Yosia lɛlɛɛ lefosi-nɛnle kamɛ yi, baale Okpi Diisi Ofe Dii le mmle baata SAATE nwu di Yerusalem.

24 Diɛkyakaa nii, Yosia labibiɛ sɛbɔ mpɛkɔ, bafatɛ ayo, ayo kamɛ afiɔtii, afiɔ ku ayududusaa bamba ya amuu baanya ni di Yuda ku Yerusalem. Nle mmle aabla alɛ sɛsaabla se di kufiofa ko bɛɛkpana ni di kukũ ko di oletatɛ Hilkia lanya ni di SAATE nwu olekatakɔ kawa ni kaanya nɛ. 25 Ɔka kuonwii ditawɛ fiɛ di Yosia lawa ee aawɛ di sɛmaa nɔɔ fɛle nnwɔɔ okle, aasumu ni SAATE nwu fɛ mmle aabla nii- ku otu nɔɔ omuu ku ɔkla nɔɔ omuu ku osie nɔɔ omuu, di mmle di Mose kufiofa kumuu lebuɛ ni kanya.

26 Kafɔɔ SAATE nwu ditadiɛ ɔblɔ yakayaka wɔ aanya ni di Yuda suoto ta asaa ya amuu di Manase labla aakpee ni SAATE nwu ɔblɔ. 27 Nioso SAATE nwu labuɛ alɛ, "Kamatososa Yuda kafɔɔ di anu nii, fɛ mmle latososa ni Israel, ninsĩ kafɔɔ Yerusalem, okpoo kplɛ wɔ ladiki nii, ku olekatakɔ ka mmle suoto labuɛ ni nlɛ, ‘Nfa di Leyooto nii kamate nɛ.’"

28 Di sɛsaabla bamba di Yosia sɛka ole kamɛ ku n-ya amuu aabla ni yi, bɛɛkpana nya di Yuda baka sekofolaa kukũ kamɛ.

29 Obe wɔ di Yosia lale ni ɔka, Egipte ɔka Farao Neko lakata aakyɛ Eufrate Okle aalaakyakaako Asiria ɔka. Ni di Ɔka Yosia ladie aakyɛ aalaakpɛko nwɔ, kafɔɔ Neko lakpɛko nwɔ, ni aalo Yosia di Megiddo nɛ. 30 Ni di Yosia bakpɛmblatɛ layɔ kpi nɔɔ baakpee di keke wɔ di bapɔnkɔ nnanfi ni, baakyeko Megiddo baawako Yerusalem baalaakookaa nwɔ di nnwɔɔ omu nɔɔ ɔkya kamɛ nɛ. Ni di kasɔ nwu batii lamufũ Yosia obisuɔtɔbi, Yehoahas, baapɛ nwɔ ɔfɔɔ, baase nwɔ ɔka di ote kasiɛkɔ nɛ.

31 Yehoahas lafũ alɛɛ afosi-anyɔ-atiɛ fiɛ aabale ɔka, ni aale sɛka di Yerusalem awɛntɛ atiɛ nɛ. Ɔya leyooto niale Hamutal, Yeremia obisankobi aale; aakye ni Libna. 32 Aabla okpile di SAATE nwu anu, fɛ mmle di bate nɔɔ labla nii. 33 Farao Neko lanii nwɔ sɛkpɛnkyɛ aatɛ di Ribla di Hamat kasɔ suoto, di mmle ɔnɔmale ni sɛka di Yerusalem, ni aatika kokpooto, koto fututu bakilo nkpe ntiɛ-alafa-ana ku koto sɛɛle bakilo afosi-atiɛ-bana aata Yuda nɛ. 34 Ni di Farao Neko layɔ Yosia obisuɔtɔbi, Eliakim aase ɔka di ote Yosia kanya, aakyɛlɛnsa Eliakim leyooto alɛ Yehoiakim. Kafɔɔ aakpaa Yehoahas aasifiko Egipte, nfa aakpi nɛ.

35 Yehoiakim lata Farao Neko koto fututu ku koto sɛɛle ko aakaalɛ nii. Ta mmle aafuo ni ɔbla nkpo oso yi, aatika akpooto di kasɔ nwu suoto, aafũ koto fututu ku koto sɛɛle aakyeko batii nwu di kasɔ nwu ɔkyɛ di mmle di osie lɛma late ni kanya.

36 Yehoiakim lafũ alɛɛ afosi-anyɔ-anɔɔ fiɛ aabale ɔka, ni aale sɛka di Yerusalem lefosi lɛlɛɛ ninwii nɛ. Ɔya leyooto niale Sebida, Pedaia obisankobi aale; aakye ni Ruma. 37 Ni aabla okpile di SAATE nwu anu, fɛ mmle di bate nɔɔ labla ni nɛ.