BAKA 2 2

SAATE Nwu Lakpaa Eliya Aasifiko Osi

1 Obe wɔ di SAATE nwu lamiɛ alɛ ɔɔkpaa ni Eliya di kakitikɔ kamɛ ansifiko ni osi yi, Eliya ku Elisa lakyɛ di osuku baakye Gilgal. 2 Ni di Eliya latɔkɔ Elisa alɛ, "Siɛ ninfũ; SAATE nwu lekpee mi kɔtɔ di Betel."

Kafɔɔ Elisa labuɛ alɛ, "Nwaako di SAATE nwu nkpe ni nkpa di afɔɔ fakpe ni nkpa, namadiɛ fɔ." Nioso baasoo baasifi Betel.

3 Ni di Yaa ɔlaababuɛtɛtɛ dikudi di Betel ladie baabakaalɛ Elisa alɛ, "Faye falɛ SAATE nwu kamakpaa saate lɛfɔ di ɔkyɛ lɛfɔ ansifiko miɛ?"

Ni di Elisa ladiki kanya alɛ, "Yii, n-ye, kafɔɔ bitambuɛ nwu ole."

4 Ninfɛ di Eliya latɔkɔ nwɔ alɛ, "Siɛ ninfũ, Elisa; SAATE nwu lekpee mi kɔtɔ di Yeriko."

Ni aadiki kanya alɛ, "Nwaako di SAATE nwu nkpe ni nkpa di afɔɔ fakpe ni nkpa, namadiɛ fɔ." Nioso baasifi Yeriko.

5 Ni di Yaa ɔlaababuɛtɛtɛ dikudi di Yeriko ladie baabakaalɛ Elisa alɛ, "Faye falɛ SAATE nwu kamakpaa saate lɛfɔ di ɔkyɛ lɛfɔ ansifiko miɛ?"

Ni di Elisa ladiki kanya alɛ, "Yii, n-ye, kafɔɔ bitambuɛ nwu ole."

6 Ninfɛ di Eliya latɔkɔ nwɔ alɛ, "Siɛ ninfũ; SAATE nwu lekpee mi kɔtɔ di Yordan."

Ni aadiki kanya alɛ, "Nwaako di SAATE nwu nkpe ni nkpa di afɔɔ fakpe ni nkpa, namadiɛ fɔ." Nioso banyɔ lɛma baakyɛ baasifi.

7 Ninfɛ di Yaa ɔlaababuɛtɛtɛ afosi-anɔɔ dikudi lakyɛ baalaayila di kakyonkɔ, baakyɔɔ anu lɛba le di Eliya ku Elisa layila ni di Yordan okle nɛ. 8 Ni di Eliya ladiki akpeele nɔɔ, aakakatu nya, ni aayɔ nya aapɛ di ntu nɛ. Ninfɛ di ntu nwu lasɛ diafe oletanɛɛkyɛ ku ɔmɛntukyɛ, ni di banyɔ lɛma nwu lawaalɛ di kasɔ kosole suoto baafe nɛ.

9 Obe wɔ baawaalɛ baaloo nii, Eliya latɔkɔ Elisa alɛ, "Tɔkɔ mi, obe kafuo fɔ ɔbla ɔta fiɛ baakpaa mi mankyeko ɔkyɛ lɛfɔ?"

Ni di Elisa ladiki kanya alɛ, "Tɛɛ nwɛ ninwuna lɛfɔ nwu nkpo sɛnyɔ nɔɔ."

10 Ninfɛ di Eliya ladiki kanya alɛ, "Lɛsaa siene fɛɛkaalɛ nɛ. Kafɔɔ nse fɛɛnyɛɛ di obe wɔ bɔɔkpaa mi di ɔkyɛ lɛfɔ mansifiko ni yi, ni kubale fɔ ole- nse diele nkpo flɔbawɛ."

11 Obe wɔ bakyɛ bɔɔkakatɛ nii, nfanwu keke wɔ di bapɔnkɔ nnanfi ni ɔtɔ ku bapɔnkɔ ɔtɔ ladie, ni kuablasa banyɔ lɛma nwu ntɛɛ, ni di Eliya lasifi osi di kakitikɔ kamɛ nɛ. 12 Elisa lanya nle mmle, ni aafaa aabuɛ alɛ, "Teete nii! Teete nii! Israel bakeke ku bapɔnkɔ basiɛtɛ!" Ni di Elisa ditasinnyɔɔ nɛ. Ninfɛ di Elisa lamufũ akpeele nɔɔ amu aabɛbɛɛ nɛ.

13 Ni aayɔ akpeele wua ya niakpa ni di Eliya suoto, ni aakple aasifi aalaayila di Yordan okle kotoko nɛ. 14 Ninfɛ aayɔ akpeele wua ya niakpa ni di Eliya suoto aapɛ di ntu nwu nɛ. Ni aabuɛ alɛ, "Ɔfɛ nfɛ di SAATE, Eliya Yaa nwu nkpe nunua?" Obe wɔ aapɛ ni ntu nwu ku akpeele nwu, ni diasɛ diafe oletanɛɛkyɛ ku ɔmɛntukyɛ, ninfɛ di Elisa lawaalɛ aafe nɛ.

15 Ni di Yaa ɔlaababuɛtɛtɛ dikudi nwu di Yeriko niatoonyu ni labuɛ alɛ, "Eliya ninwuna nwu ntika di Elisa suoto." Ninfɛ baakyɛ baalaakyakako Elisa, baawakasɔ di anu nɔɔ nɛ. 16 Ni baabuɛ alɛ, "Nyu, bakpɛmblatɛ lɛfɔ nkpe basuɔtɔ sientɛ afosi-anɔɔ. Ta ma bakyɛ baalaawolaa saate lɛfɔ. Loobia SAATE nwu Ninwuna lɛkpaa nwɔ ɛɛlaasiɛsa di kobokote kowo ee ɔtaata owo."

Ni di Elisa ladiki kanya alɛ, "Bitankpee ma."

17 Kafɔɔ baanyinka nwɔ dialaase di obe wɔ di sinunsɔ lakpɛ nwɔ alɛ aasĩ nii. Nioso aabuɛ alɛ, "Bikpee ma." Ni baakpee batii afosi-anɔɔ baalaawolaa nwɔ ayi atiɛ, kafɔɔ batanyɔɔ. 18 Obe wɔ baakple baawa ni Elisa nfũ, aasiɛ ni di Yeriko, ni aatɔkɔ ma alɛ, "Nintɔkɔ ye nlɛ bitankyɛ?"

Elisa Sɛkpɛ Se Niabla Ni Ɔkpɛ

19 Ni di okpoo kplɛ nwu batii latɔkɔ Elisa alɛ, "Nyu, saate loo, okpoo wɔ nlɛ ote, fɛ mmle fɔɔnya nii. Kafɔɔ ntu nwu diɛlɛ, nioso kasɔ asaa dilɔɔlɛ atika abi."

20 Ni di Elisa latɔkɔ ma alɛ, "Biyɔ lɛbɛɛsibii fɔle, biekpete mmba kaamɛ biwakoe." Nioso baayɔ baawako nwɔ.

21 Ninfɛ aakyɛ ntu kataakɔ nwu aalaasa mmba nwu aakpete kaamɛ aabuɛ alɛ, "Nnya ɔlaa wɔ di SAATE nwu kobuɛ ni alɛ: ‘Ntɔɔbla ntu be mmle klenkle. Diidii dilɔbasinta kukpi ee kasɔ nwu asaa asĩ abi otika.’ " 22 Nioso ntu nwu lekple nwaa diɛbadu miɛ dii le mmle, di ɔlaa wɔ di Elisa labuɛ ni kanya.

23 Elisa ladie di Yeriko aakata aasifi Betel. Obe wɔ akyɛ ni di osuku, bakosopo bawo ladie di okpoo nwu baabama nwɔ. Baabuɛ alɛ, "Kata fasifi, afɔ disifinile! Kata fasifi, afɔ disifinile!" 24 Ni aamunikĩi aakyi aanyu ma, ni aakpaani ma di SAATE nwu leyooto kamɛ nɛ. Ninfɛ di bakiti banyɔ ladie di lepoo baababɛbɛɛ bakosopo nwu afosi-ana-banyɔ nɛ. 25 Ni aasifi Kamel Kobokote osi, ninfɛ aadie ninfa aakple aasifi Samaria nɛ.