1 Di ayi nwu nkpo kamɛ, Hesekia labuo ofiɛ, aaloo ni okpi. Ni di Amos obisuɔtɔbi, Yesaya, Yaa ɔlaabuɛtɛtɛ lakyɛ ɔkyɛ nɔɔ aalaatɔkɔ nwɔ alɛ, "Nnya ɔlaa wɔ di SAATE nwu kobuɛ ni: Lolaa leyo lɛfɔ kamɛ asaa fatɛ, diekye fɔɔwa ɔbakpi; flɔbataka di ofiɛ."

2 Ninfɛ di Hesekia lamunikĩisa anu aakyɔɔ oyoyiɛ, ni aapɛ ɔlaa aata SAATE nwu aabuɛ alɛ, 3 "Oo SAATE, nyuma mmle lakyɛ ni ku onukwale di anu lɛfɔ ku otu wɔ niawo ni nimu, labla lɛsaa le kafɔɔ nialɛ ni di anu lɛfɔ." Ninfɛ di Hesekia lawi kaku blɔblɔblɔ nɛ.

4 Fiɛ di Yesaya ladie ni di kaflɔnkɔ nwu ntɛɛntɛɛ yi, SAATE nwu ɔlaa lawa kuata Yesaya alɛ: 5 "Kple faalatɔkɔ Hesekia, batii nii tunletɛ falɛ, ‘Nnya ɔlaa wɔ di SAATE nwu, teete lɛfɔ Dawid Yaa nwu kobuɛ ni alɛ: Ntoonu fɔ ɔlaa ɔpɛ, lɛnya kafɔɔ nnumɛɛ lɛfɔ; kamakya fɔ ofiɛ. Diɛyɔ ni kanunua, di dii tiɛfa suoto fabakata fankyɛ SAATE nwu olekatakɔ. 6 Ni kamakyakaa fɔ alɛɛ lefosi-anɔɔ di nkpa lɛfɔ suoto. Kamadiki fɔ ku okpoo kplɛ wɔ mmle nkyeko Asiria ɔka nnɛɛ. Kamayila okpoo kplɛ wɔ mmle kamaa, ta leyooto nii ku kpɛmblatɛ nii Dawid leyooto oso.’ "

7 Ninfɛ di Yesaya labuɛ alɛ, "Bikuɔ abuɛ leboo." Ni baabla nkpo, baayɔ baatika di didiesaa nwu, ni aawɛ ofiɛkya nɛ. 8 Ni di Hesekia lakaalɛ Yesaya alɛ, "Obe nimale dituosaa alɛ SAATE nwu kamakya mi ofiɛ, ntaka nkyɛ SAATE nwu olekatakɔ di dii tiefa suoto diɛyɔ ni di nunua?"

9 Ninfɛ di Yesaya ladiki kanya alɛ, "Nnya SAATE nwu dituosaa diɛta fɔ ni alɛ, SAATE nwu kamabla di ɔlaa wɔ eebuɛ ɛɛtɛ ni kanya: Kunyii kukpukuti kunkyɛ sitũ, nkpaa didiki lefosi, sɛɛ kunkyɛ sɛmaa nkpaa didiki lefosi?"

10 "Ni di Hesekia labuɛ alɛ, "Ɔlaa kakuu kule kuɔta alɛ, kunyii lɛkyɛ sitũ nkpaa didiki lefosi, ninlenkee alɛ kuakyɛ sɛmaa nkpaa didiki lefosi." 11 Ninfɛ di Yaa ɔlaabutɛtɛ Yesaya lalɛɛ SAATE nwu nɛ, ni di SAATE nwu lata kunyii lakpukuti kuakyɛ sɛmaa nkpaa didiki lefosi be aasoo aakyɛ ni di Ahas nkyodiɛ suoto nɛ.

12 Di obe nwu nkpo kamɛ Babel ɔka Merodak-Baladan, niale ni Baladan obisuɔtɔbi lakyesee Hesekia akũ ku lɛkyɛsaa, diekye aanu Hesekia ofiɛ. 13 Hesekia lafũ batɔkyɛntɛ nwu, ni aatuo ma asaa ya amuu niate ni di asaa nɔɔ katɛkɔ ayo kamɛ nɛ- koto fututu, koto sɛɛle, asaa kɔnɔkɔnɔ, nnɔnyi biene- akpɛsaa nɔɔ ku lɛsaa biala niate ni di asaa katɛkɔ nɔɔ. Lɛsalɛsaa kuniwii nnaa di lɛkayo nɔɔ ee di sɛka kalekɔ nɔɔ kamuu kamɛ di Hesekia ditatuo ma nii.

14 Ninfɛ di Yaa ɔlaabuɛtɛtɛ Yesaya lakyɛ Ɔka Hesekia nfũ aalaakaalɛ alɛ, "Be di basuɔtɔ nwu lebuɛ, ɔfɛ kafɔɔ beekye?"

Ninfɛ di Hesekia ladiki kanya alɛ, "Beekye kasɔ fanfa, beekye Babel bɛɛwa."

15 Ni di Yaa ɔlaabuɛtɛtɛ nwu lakaalɛ alɛ, "Be lɛsaa bɛɛnya di lɛkayo lɛfɔ?"

Ni di Hesekia ladiki kanya alɛ, "Bɛɛnya lɛsaa biala di lɛkayo nii kamɛ, lɛsalɛsaa nnaa di asaa nii katɛkɔ ninantuo ma nii."

16 Ninfɛ di Yesaya latɔkɔ Hesekia alɛ, "Nu SAATE nwu ɔlaa: 17 Obe kamawa babatuka ni lɛsaa biala di lɛkayo lɛfɔ ku n-ya amuu di bate lɛfɔ lekookaa ni diɛbadu ni miɛ, mansifiko Babel. Lɛsalɛsaa dilababu, SAATE nwu niebuɛ. 18 Banantii lɛfɔ bawo, afɔ omu ntɔ babi ba babalofo manta fɔ nii, babakpaa ma mansifiko, manaakple asaa banyuntɛ di Babel ɔka lɛkayo."

19 Ninfɛ di Hesekia ladiki kanya alɛ, "SAATE nwu ɔlaa wɔ feebuɛ ni nlɛ." Diekye aanyu alɛ, "Atoko ɔkyɛ ole ku katĩtĩi dilɔbawɛ di nkpa nii osiɛbee kamɛ."

20 Di sɛsaabla bamba di Hesekia sɛka ole kamɛ, asaa ya amuu aafuo ni ɔbla ku mmle aabla ni ntu lɛpanta ku ntu osuku odiki niata alɛ ntu lawa ni okpoo kplɛ nwu yi, bɛɛkpana nya di Yuda baka sekofolaa kukũ kamɛ. 21 Ni di Hesekia latɛ ɔnyɛɛ ku bate nɔɔ nɛ. Ni di obisuɔtɔbi nɔɔ Manase layila nwɔ kaanya fɛ ɔka nɛ.