1 Osuɔtɔ onwii di Yaa ɔlaababuɛtɛtɛ dikudi kamɛ ɔsɔfɔ lawi aalɛɛ Elisa alɛ, "Ɔsa nii wɔ ninle ni kpɛmblatɛ lɛfɔ ntookpi, faye kafɔɔ falɛ an-yɛkɛ SAATE nwu. Kafɔɔ kanunua otii wɔ asiko ni koto nfɛ kɔwa basuɔtɔbi nɔɔ banyɔ ɔkpaa fɛ balanle nɔɔ."

2 Ni di Elisa ladiki kanya alɛ, "Lɛ kafuo fɔ ɔkyakaako? Tɔkɔ mi, obe lɛsaa fakpe di leyo lɛfɔ?"

Ni di ɔsanko nwu labuɛ alɛ, "Kpɛmblatɛ lɛfɔ nnaa lɛsalɛsaa saa, diediki nnɔnyi kɛɛkɛɛ."

3 Ninfɛ di Elisa labuɛ alɛ, "Tɔɔkyɛ faalaakyi fakaalɛ bawo lɛfɔ bamuu baata fɔ ataase fukuti. Tankaalɛ kafuii lete. 4 Nni kamaa, buo leyo kamɛ faasɛɛ kokloo fakpee afɔ omu ku babisuɔtɔbi lɛfɔ banyɔ nwu. Faanyɛɛnɛ nnɔnyi nwu fakpete di ataase nwu amuu kamɛ, nse lewo ntooyii, kyisa ni fase di ɔlɔɔkɔ."

5 Ninfɛ aadiɛ Elisa aalaasɛɛ kayoko aakpee nnwɔɔ omu ku babisuɔtɔbi nɔɔ nɛ. Baayɔ ataase nwu baawako nwɔ, ni aatookpete nnɔnyi nwu kaamɛ nɛ. 6 Obe wɔ di ataase nwu amuu ntooyii nii, ni di ɔsanko nwu latɔkɔ obisuɔtɔbi nɔɔ alɛ, "Yɔ lɛbamba fawakoe."

Ni aadiki kanya alɛ, "Lɛtaase kuninwii diesimbu." Ninfɛ di nnɔnyi nwu ladiɛ osoo nɛ.

7 Ni di ɔsanko nwu lakyɛ aalaatɔkɔ Yaa otii nwu nɛ, ni aatɔkɔ ɔsanko nwu alɛ, "Tɔɔkyɛ faalaasunsũ nnɔnyi nwu mmuu faayɔ fata ato lɛfɔ. Afɔ ku babisuɔtɔbi lɛfɔ biyɔ nle niebu ni binyu suoto lee."

8 Dii ninwii Elisa lakyɛ Sunem. Ɔsanko onwii di kɔnɛɛ nkpe ni lawɛ ninfa, ni aatɔkɔ nwɔ alɛ asiɛ aale alesaa nɛ. Nioso obe lele ɛɛkyɛ nfa, ansiɛ ninfa anle alesaa. 9 Ni di ɔsanko nwu latɔkɔ ɔsa alɛ, "N-ye nlɛ osuɔtɔ wɔ mmle ninwa ni ɔkyɛ loo nle Yaa otii klekle. 10 Ta butofo leyo biibii di lɛkya loo osi butɔɔ, buose mpa, opunu, lekpomii ku kandiɛ butɔɔ. Ni aasiɛ ninfa, obe lele ɛɛwa ɔkyɛ loo."

11 Dii ninwii di Elisa lawa nii, aakata aakyɛ leyo nɔɔ nwu aalaate ninfa. 12 Ni aatɔkɔ kpɛmblatɛ nɔɔ Gehasi alɛ, "Lɛɛ Sunem ɔsanko nwu fatɛɛ." Nioso aalɛɛ nwɔ, ni di ɔsanko nwu labayila di Elisa anu nɛ. 13 Ni di Elisa latɔkɔ Gehasi alɛ, "Kaalɛ ɔsanko nwu falɛ, ‘Diobuo fɔ ta awo oso. Nunua be lɛsaa buɔbla buta fɔ? Buafuo ɔka ee kakpɛ kanyayilatɛ ɔkakatɛko di disi lɛfɔ?’ "

Ni di ɔsanko nwu ladiki kanya alɛ, "Nkpe leyo di batii nii bamu kamɛ."

14 Ninfɛ di Elisa lakaalɛ alɛ, "Be nfɛ baafuo nwɔ ɔbla ɔta?"

Ni di Gehasi labuɛ alɛ, "Nwaako, anaa obisuɔtɔbi kuonwii, ɔsa nɔɔ kafɔɔ ntoobe."

15 Ninfɛ di Elisa labuɛ alɛ, "Lɛɛ ɔsanko nwu." Nioso aalɛɛ ɔsanko nwu, ni aabaayila di kayoko kanya nɛ. 16 Ni di Elisa labuɛ alɛ, "Lɛlɛɛmba nuakpa okle, fabaklee obisuɔtɔbi di nnɛɛ lɛfɔ."

Ni aasĩ aabuɛ alɛ, "Oowo, saate nii, Yaa otii! Tankyɔnkyɔ kpɛmblatɛ lɛfɔ."

17 Kafɔɔ ɔsanko nwu labalaka lɛmɛ, ni di lɛlɛɛ le niakyi diawa ni di obe nwu tutuutu kamɛ ɔsanko nwu lalofo obisuɔtɔbi, fɛ mmle di Elisa latɔkɔ nwɔ ni nɛ.

18 Obisɔ nwu labamuɔ, dii ninwii aadie aakyɛ ote nfũ, di bafiɛlɛtɛ ɔkyɛ. 19 Ni di obisɔ nwu latɔkɔ ote alɛ, "Letoole nii! Letoole nii!" Ninfɛ di ote latɔkɔ kpɛmblatɛ onwii alɛ, "Kpaa nwɔ fakyɛnko ɔya." 20 Di kpɛmblatɛ nwu lakpaa nwɔ aakyɛnko ni ɔya kamaa, osuɔtɔbi nwu latika di nkpaa nɔɔ diaadu kakũ, ni aakpi nɛ. 21 Ni di ɔsanko nwu lakata aalaayɔ obisɔ nwu aatika di Yaa otii nwu mpa suoto, ni aasɛɛ kayoko aadie nɛ.

22 Ni aalɛɛ ɔsa aatɔkɔ alɛ, "Lekoto kyesee mi kpɛmblatɛ lɛfɔ onwii ku bɔkɛɛ wɔ nintuka ni atoo onwii ninkyɛ Yaa otii nwu nfũ wla ninkple nwa."

23 Ni di ɔsa lakaalɛ nwɔ alɛ, "Be oso fɔɔkyɛ ɔkyɛ nɔɔ miɛ? Diele Kɔwɛntɛ Fɔle kule ee Lɛnyɛɛtɛyi dile."

Ni di ɔsanko nwu alɛ, "Nnwu kulɛ."

24 Ninfɛ di ɔsanko nwu lata baatakatɛsa nwɔ baasiɛsaa di bɔkɛɛ wɔ nintuka ni atoo suoto, ni aatɔkɔ kpɛmblatɛ nɔɔ alɛ, "Sɔ buosifi; tankyɛnkoe buɛɛ dilaase di obe wɔ lɛtɔkɔ fɔ ni." 25 Nioso aadie aawa Yaa otii nwu nfũ di Karmel Kobokote.

Obe wɔ di Yaa otii nwu lanya ni ɔsanko nwu kaakyonkɔ, ni di osuɔtɔ nwu latɔkɔ kpɛmblatɛ nɔɔ Gehasi alɛ, "Nyu lo! Nnya Sunem ɔsanko nwu! 26 Toso falaakyakako nwɔ, faakaalɛ nwɔ falɛ, ‘Sikpe fɔ osie? Sikpe ɔsa lɛfɔ osie? Sikpe obi lɛfɔ osie?’ "

Ɔsanko nwu ladiki kanya alɛ, "Lɛsaa biala nlɛ."

27 Obe wɔ di ɔsanko nwu ladu ni Yaa otii nwu nfũ di kobokote osi, ni aawakasɔ aamufũ nwɔ ninkpaa nɛ. Ni di Gehasi labatukusa ɔsanko nwu nɛ. Kafɔɔ Yaa otii nwu labuɛ alɛ, "Diɛ nwɔ! Asi di nimiina siene kamɛ, kafɔɔ SAATE nwu lɛyɔ ni eewofasa mi, aatɔkɔ mi kafɔɔ lɛsaa le oso ɛɛbla ni nkpo."

28 Ni di ɔsanko nwu lakaalɛ nwɔ alɛ, "Saate nii, lɛkaalɛ fɔ obi? Ntatɔkɔ fɔ nlɛ, ‘Tankyɔnkyɔ mi’?"

29 Ninfɛ di Elisa latɔkɔ Gehasi alɛ, "Yɔ akpeele wua lɛfɔ fakpee, faatika ofiamɛ lɛfɔ, faayɔ ɔkyɛnwoso nii di kɔnɛɛ lɛfɔ faatoso. Otii lele fɛɛkyakako, tansɛɛsɔɔ. Otii lele kafɔɔ niɛsɛɛsa fɔ, tantuna. Yɔ ɔkyɛnwoso nii nwu fatika di osuɔtɔbi nwu anu."

30 Kafɔɔ obisɔ nwu ɔya labuɛ alɛ, "Nwaako, di SAATE nwu lɛnya akpe ni nkpa, di afɔɔ fakpe ni nkpa, namadiɛ fɔ." Nioso Elisa lataka aatikanko ɔsanko nwu.

31 Gehasi lale katũ aalaayɔ ɔkyɛnwoso nwu aalaatika di obisɔ nwu anu, kafɔɔ atakpanko suoto ee atuna. Nioso Gehasi lakple aasifi aalaakyakako Elisa aatɔkɔ nwɔ alɛ, "Osuɔtɔbi nwu diɛsɛnkɛ."

32 Di Elisa labuo ni leyo, aanya obisɔ nwu lekpi ate di atensaa nɔɔ suoto ninfa. 33 Ni di Elisa labuo kamɛ, aasɛɛ kokloo aakpee banyɔ lɛma nwu, ni aapɛ ɔlaa aata SAATE nwu nɛ. 34 Ninfɛ di Elisa lafuu di obisɔ nwu suoto di mpa suoto nɛ. Aayɔ kanya nɔɔ aase di kanya nɔɔ, anu nɔɔ di anu nɔɔ, nnɛɛ nɔɔ di nnɛɛ nɔɔ. Aananfi ni suoto nɔɔ aatika nwɔ ni di suoto yi, obisɔ nwu lafila. 35 Ninfɛ di Elisa lataka aakyɛ aatoofenfe di leyo nwu kamɛ, aakple aalaafuu nwɔ di suoto di mpa nwu nɛ. Nfanwu osuɔtɔbi nwu niasiɛntɛ sikuɛnsĩ ni aatikiti anu nɔɔ nɛ.

36 Ninfɛ di Elisa lalɛɛ Gehasi aatɔkɔ alɛ, "Lɛɛ Sunem ɔsanko nwu fatɛɛ." Ni aalɛɛ nwɔ nɛ. Di ɔsanko nwu lawa nii, Elisa latɔkɔ nwɔ alɛ, "Kpaa obisuɔtɔbi lɛfɔ." 37 Ɔsanko nwu labuo leyo, ni aawakasɔ aamufũ Elisa nkpaa aase katũ kaasɔ nɛ. Ninfɛ di ɔsanko nwu lakpaa obisuɔtɔbi nɔɔ aadieko nɛ.

38 Ni di Elisa lakple aasifi Gilgal di kɔka latɔɔkpɛ ni di kasɔ nwu suoto nɛ. Obe wɔ di ɔlaababuɛtɛtɛ latookpee ni asi baawo ku nnwɔɔ yi, ni aatɔkɔ kpɛmblatɛ nɔɔ alɛ, "Yɔ dibukii kplɛ fatika di ɔtɔ faawa alesaa awo fata basuɔtɔ ba mmle."

39 Onwii lɛma ladie aakyɛ kofe alɛ ɔɔlaamiɛ sɛfa anwako, ni aanya lepoo kamɛ awosobi nɛ. Ni aatɛsɛ akuuku awo aayiisa akpeele wua nɔɔ kamɛ aawako nɛ. Aayie nii, aabɛbɛɛ nya aakpete di alesaa dibukii nwu kamɛ, nu di otii kuonwii ditatofo lɛsaa le diale nii. 40 Ni aadiki alesaa nwu aase basuɔtɔ nwu nɛ. Kafɔɔ baakyako ni alesaa nwu ole, ni baafaa baabuɛ alɛ, "O Yaa otii, kukpi nsi di dibukii nwu kamɛ!" Nkpo oso batafuo nya ole.

41 Ni di Elisa labuɛ alɛ, "Bitɛɛ nnaafũ nwo." Ni aayɔ aakpete di dibukii nwu kamɛ aabuɛ alɛ, "Bisɛ nya bita batii nwu baale." Ni di lɛsaakpile kuninwii ditasinsiɛ di dibukii nwu kamɛ nɛ.

42 Osuɔtɔ onwii lakye Baal Salisa aawa, aawako Yaa otii nwu bloblo akudi afosi-anyɔ baayɔ akpaa kosole kasale baafiɛ nii ku atitabi fɔle bakotoku bawo. Ni di Elisa labuɛ alɛ, "Yɔ nya fata batii nwu bale".

43 Ninfɛ di kpɛmblatɛ nɔɔ nwu labuɛ alɛ, "Lɛ nfɛ kayɔ n-ya mmle nse batii kɔlafa ba mmle?"

Kafɔɔ Elisa ladiki kanya alɛ, "Yɔ nya fata batii nwu bale. Diekye nnya ɔlaa wɔ di SAATE nwu kobuɛ ni alɛ: ‘Babale, awo nkple ambu kafɔɔ.’ " 44 Ninfɛ aayɔ aase ma nɛ. Ni baale, awo lakple aabu, di SAATE nwu ɔlaa kanya nɛ.