1 Fɛ alɛɛ atiɛ kamɛ, kakpɛ kukanwii ditawɛ di Siria ku Israel ntɛɛ. 2 Kafɔɔ di lɛlɛɛ tiefa kamɛ, Yuda ɔka Yehosafat lasoo aakyɛ aalaanya Israel ɔka. 3 Ni di Israel ɔka latɔkɔ banɔɔfotii nɔɔ alɛ, "Bieye bilɛ Ramot Gilead okpoo kplɛ nwu ole wo kule, ni munɔɔbla lɛsalɛsaa bulɛ buokple munfũ nwu di Siria ɔka nnɛɛ nɛ?"

4 Nioso Ahab lakaalɛ Yehosafat alɛ, "Fabatikankoe munaakpɛko Ramot Gilead?"

Ni di Yohosafat ladiki aatɔkɔ Israel ɔka alɛ, "Nte fɛ mmle fate nii, batii nii fɛ batii lɛfɔ, bapɔnkɔ nii fɛ bapɔnkɔ lɛfɔ." 5 Kafɔɔ Yehosafat lakple aatɔkɔ Israel ɔka alɛ, "Le katũ fawolaa kamɛ di Saate nwu nfũ fiɛ."

6 Nioso Israel ɔka lalɛɛ ɔlaababuɛtɛtɛ aasiisa- baabla fɛ basuɔtɔ alafa-ana- ni aakaalɛ ma alɛ, "Nkyɛ ninaakpɛko Ramot Gilead ɛɛ, sɛɛ ndiɛ?"

Ni baadiki kanya alɛ, "Kyɛ, diekye Saate nwu kamayɔ nwu ankpee di ɔka nnɛɛ."

7 Kafɔɔ Yehosafat lakaalɛ alɛ, "Saate nwu ɔlaabuɛtɛtɛ nnaa ninfũ, buakyɛ munaawolaa ni kamɛ?"

8 Ni di Israel ɔka latɔkɔ Yehosafat alɛ, "Osuɔtɔ onwii lekple eebu, nnwɔɔ ɔkyɛ buafuo Saate nwu kamɛ owolaa okyeko nɛ. Kafɔɔ lekyidi nwɔ, diekye diidii ambuɛ ɔlaa biene kuonwii di suoto nii, kafɔɔ obe lele okpile. Nnwɔɔ ninle Imla obisuɔtɔbi, Mikaia nɛ."

Ni di Yehosafat labuɛ alɛ, "Ɔka atambuɛ ɔlaa nwu."

9 Nioso Israel ɔka lalɛɛ ɔnɔɔfotii nɔɔ onwii aatɔkɔ alɛ, "Laalɛɛ Imla obisuɔtɔbi, Mikaia fawoko kanunua."

10 Ni di Israel ɔka ku Yuda ɔka Yehosafat laklee akasaa lɛma baasiɛ di akakpomii lɛma suoto di kakpaa di Samaria kayoko kanya, di obe wɔ di ɔlaababuɛtɛtɛ bamuu latoobuɛ sɛlaa baatɔɔtɛ ni di anu lɛma. 11 Ninfɛ di Kenaana obisuɔtɔbi, Sedekaia labla abɔɔsaa akya aabuɛ alɛ: "Nnya ɔlaa wɔ di Saate nwu kobuɛ ni alɛ, ‘N-ya mmle fabayɔ fantukusa Siria batii nwu ninaase ni di obe wɔ babawɔɔ ni nɛ.’ "

12 Ɔlaababuɛtɛtɛ bamba nwu bamuu latoobuɛ ɔlaa nwu onwii baatɔɔtɛ. Baatoobuɛ alɛ, "Laadieko Ramot Gilead, fabalɛnkee. Diekye Saate nwu kamayɔ nwu ankpee di ɔka nnɛɛ."

13 Ni di tɔkyɛntɛ wɔ niakyɛ aalalɛɛ ni Mikaia latɔkɔ nwɔ alɛ, "Nyu, ɔlaababuɛtɛtɛ bamba nwu kobuɛ lelenkee mantɛ fɛ otii onwii manta ɔka. Nioso ta ɔlaa lɛfɔ kukaatɛɛ ku olema, faakakatɛ diɛkyɛkyɛ nwɔ."

14 Kafɔɔ Mikaia labuɛ alɛ, "Nwaako di Saate nwu lɛnya akpe ni nkpa, kamatɔkɔ nwɔ ɔlaa wɔ lete di Saate nwu lɛtɔkɔ mi nii."

15 Obe wɔ aababuo nii, ɔka nwu lakaalɛ nwɔ alɛ, "Mikaia, bukyɛ bulaakpɛko Ramot Gilead ɛɛ, sɛɛ ndiɛ?"

Ni aadiki kanya alɛ, "Laakpɛko Ramot Gilead, fabalɛnkee. Diekye Saate nwu kamayɔ nwu ankpee di ɔka nnɛɛ."

16 Ni di ɔka lakaaalɛ nwɔ alɛ, "Sɛsɛ ninta fɔ faka ntam fatɔkɔ mi falɛ onukwale lete fababuɛ di Saate nwu leyooto kamɛ?"

17 Ninfɛ di Mikaia labuɛ alɛ, "Lanya Israel omuu lɛsasami bakpete di akpenkpe nwu osi fɛle bafoso ba ninaa ni kpatɛ. Ni di Saate nwu labuɛ alɛ, ‘Batii ba mmle nnaa saate. Bita obiala lɛma atɔɔkyɛ leyo di atoko ɔkyɛ ole kamɛ.’ "

18 Ninfɛ di Israel ɔka latɔkɔ Yehosafat alɛ, "Ntatɔkɔ fɔ nlɛ diidii ambuɛ lɛsaa biene kuninwii di suoto nii, kafɔɔ dikpile lete?"

19 Ni di Mikaia lakple aabuɛ aakyakaa alɛ, "Nioso nu Saate nwu ɔlaa: Lanya Saate nwu nsi di lɛkakpomii nɔɔ suoto, di osi bakpɛtɛ bamuu n-yɛ beekyi nwɔ ni di oletanɛɛkyɛ nɔɔ ku ɔmɛntukyɛ nɔɔ. 20 Ninfɛ di Saate nwu labuɛ alɛ, ‘Owe nimakyɔnkyɔ Ahab ankyɛ anaadieko Ramot Gilead, anaawɛ kukpi nɔɔ ninfa?’ 

"Otii onwii kobuɛ mmle, ɔbamba kafɔɔ kobuɛ ɔbamba. 21 Yɛntɛyɛntɛ, ninwuna ninwii ladie diawa sitũ, diabayila di Saate nwu anu diabuɛ alɛ, ‘Ami kamakyɛ nnaakyɔnkyɔ nwɔ.’

22 Ni di Saate nwu lakaalɛ alɛ, " ‘Di ɔmɛnsuku suoto?’ 

Ni diabuɛ alɛ, " ‘Kamadie nkyɛ ninaale sɛlaa ku afunu ninwuna di Ahab ɔlaababuɛtɛtɛ bamuu n-nya kamɛ.’

Ninfɛ di Saate nwu labuɛ alɛ, " ‘Fabalenkee nwɔ ku kakyɔnkyɔ. Tɔɔkyɛ faalaabla nkpo.’

23 "Nioso, kanunua, Saate nwu ntɔɔyɔ sɛlaa ku afunu ninwuna eekpee di ɔlaababuɛtɛtɛ lɛfɔ bamuu n-nya kamɛ. Saate nwu ntoobuɛ alɛ ɔlaa kpile kamawa fɔ di suoto."

24 Ninfɛ di Kenaana obisuɔtɔbi, Sedekia lakyɛ aalaapɛ Mikaia kɔnɛɛ kootokosi aakaalɛ nwɔ alɛ, "Ɔmɛnsuku suoto di ninwuna nwu di Saate nwu kamɛ lafe fiɛ aadie mi kaamɛ aabakakatɛ aata fɔ?"

25 Ni di Mikaia ladiki kanya alɛ, "Fabanya di dii le fabalaawofa ni di leyo le kamɛ kamɛ."

26 Ninfɛ di Israel ɔka labuɛ alɛ, " Bikpaa Mikaia biekplesa nwɔ bisifiko Amon okpoo kplɛ nwu nyuntɛ ku ɔka obisuɔtɔbi, Yoas ɔkyɛ, 27 biɛtɔkɔ ma bilɛ, ‘Nnya ɔlaa wɔ di ɔka kobuɛ ni alɛ: Biyɔ otii wɔ mmle bitɛ di leyo katenkɔ, bitantɔɔ kafɔɔ lɛsalɛsaa dilenkee bloblo ku ntu, dilaase di obe wɔ kamakple ni buɛɛ.’ "

28 Ni di Mikaia labuɛ alɛ, "Nse feekple fɛɛwa buɛɛ yi, ni Saate nwu ditakakatɛ afenko di suoto nii." Ninfɛ aabuɛ aakyakaa alɛ, "Aye batii ba mmle bamuu, bitɛ sɛlaa nii nsũ!"

29 Nioso Israel ɔka ku Yuda ɔka Yehosafat lakyɛ baalaadieko Ramot Gilead. 30 Ni di Israel ɔka latɔkɔ Yehosafat alɛ, "Kamakyɛ kakpɛ kamɛ ku akpeele ya manamatofo mi nii, kafɔɔ afɔ klee akasaa lɛfɔ." Nioso Israel ɔka lakpee akpeele bamba, aamunikĩisa suoto, ni aasifi kakpɛ kamɛ nɛ.

31 Ni di Siria ɔka latɔkɔ bakeke nɔɔ ba di bapɔnkɔ nnanfi ni bakpɛtɛ kanyabayilatɛ afosi-atiɛ-banyɔ alɛ, "Bitankpɛko kuonwii, ɔnɔɔfo ee obisɔ, diediki Israel ɔka." 32 Obe wɔ di bakeke nwu bakpɛtɛ kanyabayilatɛ lanya ni Yehosafat, baabuɛ alɛ, "Nwaako nnya Israel ɔka." Nioso baamunikĩi alɛ bɔɔkpɛko nwɔ, kafɔɔ obe wɔ di Yehosafat lafaa ni kakpɛ nɔɔ lɛfaa yi, 33 ni di bakeke nwu bakpɛtɛ kanyabayilatɛ lanya alɛ ditale Israel ɔka, ni baadiɛ nwɔ otikanko nɛ.

34 Kafɔɔ otii onwii lataa kɔtaa nɔɔ ko, ni kualaatofo Israel ɔka di akpɛsaa nɔɔ sebo nwu nɛ. Ni di ɔka nwu latɔkɔ keke nɔɔ kantɛ alɛ, "Munikĩi faaka mi fadieko di kakpɛkɔ kamɛ. Diekye batootika mi kakɔ." 35 Dii nwu kale kamuu kakpɛ kanya lawɛ osie, ni baamufũ ɔka nwu baaklee di keke nɔɔ nwu kamɛ, aakyɔɔ ni Siria batii anu nɛ. Kakɔ nɔɔ nwu ntɔ lasoo diate di keke nwu kasɔ, ni aakpi ku kɔtɔɔfɔ nwu nɛ. 36 Di kufĩ nfɛ kɔmɛɛ nii, kanya ladie di Israel bakpɛtɛ nwu kamɛ kaafenko alɛ: "Osuɔtɔ biala asifi okpoo nɔɔ; osuɔtɔ biala asifi kasɔ nɔɔ!"

37 Nioso ɔka nwu lakpi, ni baakpaa nwɔ baawako Samaria baabakookaa nwɔ ninfa nɛ. 38 Baafoto keke nwu di ntu lɛpanta ninwii di Samaria, (di lɛbale di basɔnɔkpeetɛ nkpe ni ntu). Ni di Baweewee labayanya ntɔ nɔɔ nwu, fɛ mmle di Saate nwu ɔlaa labuɛ ni nɛ.

39 Di Ahab sɛka ole sɛsaabla bamba, di n-ya aabla ni amuu nkyaka nii, lɛkayo le aatofo alolaa ni ku to anyɛɛ, sekpoo kplɛ se aatofo seyoyiɛ aakyisa nii, bɛɛkpana nya di Israel baka sekofolaa kukũ kamɛ. 40 Ahab latɛ ɔnyɛɛ ku bate nɔɔ. Ni di obisuɔtɔbi nɔɔ Ahasia layila nwɔ kaanya fɛ ɔka nɛ.

41 Ni di Israel ɔka lɛlɛɛ naafa kamɛ yi, Asa obisuɔtɔbi, Yehosafat labale Yuda ɔka nɛ. 42 Yehosafat lafũ alɛɛ afosi-atiɛ-anɔɔ fiɛ aabale ɔka. Ni aale sɛka di Yerusalem alɛɛ afosi-anyɔ- anɔɔ nɛ. Ɔya leyooto niale Asuba, Silhi obisankobi aale. 43 Aakyɛ di ote Asa sisuku kanya, atadiɛ sĩ aatɛ; aabla nle niasiɛko ni di Saate nwu anu. Kafɔɔ atakyisa ntakalekɔ nwu, ni di batii lakple baalaatɔɔta sele, baatɔɔfiɛ olufui ninfa nɛ. 44 Yehosafat kafɔɔ lasiɛ di atoko ɔkyɛ ole kamɛ ku Israel ɔka.

45 Di Yehosafat sɛka ole sɛsaabla bamba, asaa ya aafũ ni leyooto ku nkpɛ be aakpɛ nii, bɛɛkpana nya di Yuda baka sekofolaa kukũ kamɛ. 46 Aawɔɔsa nfiofa basɔnɔbakpeetɛ basuɔtɔ ba niabu ni di kasɔ nwu ninfa, bia di ote Asa sɛka olebee sɛmaa. 47 Di Yehosafat obe nwu kamɛ ɔka ditawɛ di Edom; okpoo nyuntɛ niatoo nyu nwu.

48 Ninfɛ di Yehosafat lata baabla seklo se nimatɔɔkyɛ ni Ofir manaatootuka ni koto sɛɛle nɛ. Kafɔɔ diidii sitakyɛ di ntu osi- diekye sialalaa di Esion Geber. 49 Di obe nwu kamɛ Ahab obisuɔtɔbi, Ahasia latɔkɔ Yehosafat alɛ, "Ta batii nii batikanko batii lɛfɔ di ntu osi," kafɔɔ Yehosafat lasĩ.

50 Ninfɛ di Yehosafat latɛ ɔnyɛɛ ku bate nɔɔ nɛ, ni baakookaa nwɔ ku mma di Dawid okpoo kplɛ kamɛ nɛ. Ni di obisuɔtɔbi nɔɔ Yehoram layila nwɔ kaanya fɛ ɔka nɛ.

51 Di Yuda ɔka Yehosafat lefosi lɛlɛɛ-kuɛsinle kamɛ yi, Ahab obisuɔtɔbi, Ahasia labale Israel ɔka di Samaria. Aale sɛka di Israel suoto alɛɛ anyɔ. 52 Aale sikpile di Saate nwu anu, diekye aakyɛ di ote ku ɔya sisuku kanya ku Nebat obisuɔtɔbi, Yeroboam sisuku kanya, aata Israel labla okpile. 53 Aatɔ, aasumu Baal, ni aakpee Saate , Israel Yaa nwu ɔblɔ, fe mmle di ote labla ni okle.