1 Di obe kpinwu sɛmaa, di lɛlɛɛ tiɛfa kamɛ, Saate nwu ɔlaa lawa kuata Elia alɛ: "Kyɛ faalaadiki suoto fatuo Ahab, ni kamata kanto nnɔɔ di kasɔ nwu suoto." 2 Nioso Elia lakyɛ aalaadiki suoto aatuo Ahab.

Kɔka kanya latɛ kuawɛ osie di Samaria, 3 ni di Ahab lalɛɛ Obadia wɔ niale ni lɛkayo nɔɔ nyuntɛ nɛ. (Obadia lale ofũ onutɛ nwaa di Saate nwu kamɛ. 4 Di obe nwu Yesebel latoolo ni Saate nwu Yaa ɔlaababuɛtɛtɛ yi, Obadia layɔ Yaa ɔlaababuɛtɛtɛ kɔlafa aalaawofasa di efuɔntuu ɛnyɔ kamɛ. Afosi-anɔɔ di obiala kamɛ, ni aatɔɔta ma alesaa ku ntu nɛ.) 5 Ni di Ahab latɔkɔ Obadia alɛ, "Tɔɔkyɛ faalaafenfe di kasɔ nwu suoto ku ntu ntaakɔ ku sɛtaata simuu. Loobia bubawɛ sɛfa sewo munta bapɔnkɔ ku babɔkɛɛ ba ninte ni fɛ bapɔnkɔ nwee di mmle baawɛ ni nkpa, di mmle munamalo ni babɔkɛɛ loo kuonwii." 6 Nioso baasɛ kasɔ nwu babakyi nii, Ahab lafe di kakyɛ kanwii, Obadia kafɔɔ lafe di kakyɛ bamba.

7 Di Obadia lakyɛ ni di osuku, ni di Elia lakyakako nwɔ nɛ. Obadia latofo nwɔ, ni aawakasɔ aase katũ kaasɔ aabuɛ alɛ, "Saate nii Elia, nwaako afɔ omu dile?"

8 Ni aadiki kanya alɛ, "Yii, tɔɔkyɛ faalaatɔkɔ saate lɛfɔ falɛ, ‘Elia ntɔɔwa nfũ.’ "

9 Ni di Obadia lakaalɛ alɛ, "Ɔmɛnkpile lɛbla, fiɛ fɔɔyɔ kpɛmblatɛ lɛfɔ fankpee di Ahab nnɛɛ falɛ alo mi? 10 Nwaako di Saate , Yaa lɛfɔ nkpe ni nkpa, kale ee sɛka kalekɔ kukanwii nnaa di saate nii diikpee otii alɛ alaawolaa fɔ nii. Nse kafɔɔ kale ee sɛka kalekɔ kawo lebuɛ alɛ fanaa ninfa yi, anta ma manka ntam alɛ baanya fɔ. 11 Kafɔɔ nunua nfɛ fɔɔtɔkɔ mi falɛ ntɔɔkyɛ ni saate nii nfũ ninaatɔkɔ nwɔ nlɛ, ‘Elia ntɔɔwa nfũ.’ 12 Nin-ye nfũ di Saate nwu Ninwuna kamakpaa fɔ ansifiko nii, nse lesifi lediɛ fɔ. Nse lɛkyɛ lɛlaatɔkɔ Ahab, fiɛ anaanya fɔ, ni Ahab kamalo mi. Kafɔɔ ami kpɛmblatɛ lɛfɔ ntoosumu Saate nwu diayɔ ni bia sekosopo nii obe kamɛ. 13 Saate nii, fadinu lɛsaale labla ni, di obe wɔ di Yesebel latoolo ni Saate nwu Yaa ɔlaababuɛtɛtɛ? Layɔ Saate nwu Yaa ɔlaababuɛtɛtɛ kɔlafa lawofasa di efuɔntuu ɛnyɔ kamɛ, afosi-anɔɔ di obiala kamɛ, lata ma kafɔɔ alesaa ku ntu. 14 Ninfɛ di nunua fɔɔtɔkɔ mi falɛ ntɔɔkyɛ ninaatɔkɔ saate nii nlɛ, ‘Elia ntɔɔwa nfũ nɛ.’ Abalo mi!"

15 Ni di Elia labuɛ alɛ, "Di Saate wɔ Ninlenke ni nkpe ni nkpa, nnwɔ kosumu nii, nwaako kamadiki suoto nii ntuo Ahab miɛ."

16 Nioso Obadia lakyɛ aalaakyakako Ahab aatɔkɔ nwɔ, ni di Ahab lakyɛ aalaakyakako Elia nɛ. 17 Obe wɔ di Ahab lanya ni Elia, ni di Ahab lakaalɛ nwɔ alɛ, "Afɔ Israel kudu-kpeetɛ, afɔ nɛ?"

18 Ni di Elia labuɛ alɛ, "Ninkpee kudu di Israel, kafɔɔ afɔ ku teefɔ leyo batii niadiki kudu. Aye nintoosĩ Saate nwu afiofa, biɛkyɛ bitikanko Baal. 19 Nunua lɛɛ Israel batii bamuu baabakyakakoe di Karmel Kobokote osi. Faakpaa Baal ɔlaababuɛtɛtɛ alafa-ana-afosi-anɔɔ nwu ku Asera ɔlaababuɛtɛtɛ alafa-ana nwu fawako, mba ninle ni alesaa di Yesebel opunu suoto."

20 Nioso Ahab lata kanya aafenko di Israel kasɔ kamuu, ni di ɔlaababuɛtɛtɛ nwu labasi di Karmel Kobokote osi nɛ. 21 Ni di Elia lalayila di batii nwu anu, ni aakaalɛ ma alɛ, "Ɔmɛmbe bibakpankpa di ɛlaa ɛnyɔ be mmle nntɛɛ minaase? Nse Saate nwu ninle Yaa, bitikanko nwɔ. Kafɔɔ nse Baal ninle Yaa yi, bietikanko nwɔ."

Kafɔɔ batii nwu ditabuɛ ɔlaa kuonwii.

22 Ninfɛ di Elia latɔkɔ ma alɛ, "Ami ninle Saate nwu, Yaa ɔlaababuɛtɛtɛ wɔ lete niebu ni nɛ, kafɔɔ Baal nkpe ɔlaababuɛtɛtɛ alafa-ana-afosi anɔɔ. 23 Bimiɛ banankyue-suɔtɔ banyɔ bata wo. Ta ma badiki onwii bata suoto lɛma, baata ma balo nwɔ, baabubudi nwɔ pitipiti, baayɔ batika di ntɔɔni suoto, kafɔɔ batankpee mi ɔtɔ. Amii kamabla nankyue-suɔtɔ nwu nyɔɔfa, nin-yɔ nwɔ ntika di ntɔɔni suoto, kafɔɔ nɔmakpee mi ɔtɔ. 24 Ni biɛlɛɛ yaa lee leyooto, ami kafɔɔ kamalɛɛ Saate nwu leyooto. Ni yaa wɔ nimatuna ni ku ɔtɔ yi- nnwɔɔ ninle- Yaa nɛ."

Ninfɛ di batii nwu bamuu labuɛ alɛ, "Nnwɔ feebuɛ ni nlɛ."

25 Ni di Elia latɔkɔ Baal ɔlaababuɛtɛtɛ alɛ, "Bikasa banankyue-suɔtɔ nwu onwii odiki ɔbla, diekye, aye nimpɔ bilenke. Bilɛɛ yaa lee leyooto, kafɔɔ bitankpee ɔtɔ." 26 Nioso baayɔ nankyue-suɔtɔ nwu baata ma ni baabla nkpo nɛ.

Ninfɛ baalɛɛ Baal leyooto, diayɔ ni di oyita dialaadu ni kakũ, baafaa baabuɛ alɛ, "Oo Baal, tuna fata wo!" Kafɔɔ atatuna; kuonwii ditakpee ma kanya. Ni baatũ baakyi oleɔta akyikye ya baapɛ ni nɛ.

27 Di kakũ yi, Elia lakye kasɔ aatɔɔma ma alɛ, "Bifaa osie kanya! Nwaako yaa ale! Loobia oobu disi osie kanya ee anaa kayaa ee eefe osuku. Loobia ɔɔkyɔsĩi, ni dikpeni biɛsɛnkɛsɔɔ." 28 Nioso baafafaa osie kanya, baakyankya bawo ku mpamii ku akplɔ lɛma, fɛ mmle di ɔsaabla lɛma late nii, dialaase di obe wɔ di ntɔ lɛma ladie nii. 29 Kakũ lafe, kafɔɔ baanwini baatoobiá osie kanya, dialaase di obe wɔ manta ni kɔtɔɔfɔ* ole. Kafɔɔ kuonwii ditatuna, kuonwii ditakpee ma kanya, kuonwii ditakyɔɔ ma atoko.

30 Ninfɛ di Elia latɔkɔ batii nwu bamuu alɛ, "Biwa ɔkyɛ nii ninfũ." Ni baawa ɔkyɛ nɔɔ, ni aalolaa Saate nwu oleɔta akyikye ya niabibiɛ ni nɛ. 31 Ni di Elia layɔ afuɔ lefosi-anyɔ, ninwii diata ni kɔna biala niakye ni Yakob kamɛ. Nnwɔ di Saate nwu ɔlaa lawa kuata ni alɛ, "Leyooto lɛfɔ nimale ni Israel." 32 Elia layɔ afuɔ nwu aapɛ oleɔta akyikye di Saate nwu leyooto kamɛ. Ni aakutu okplo kplɛ nikaklee ni ntu fɛ bakpokiti kplɛ batiɛ aakyisa oleɔta akyikye nwu nɛ. 33 Ni aakpee ntɔɔni nwu, aabubudi nankyue-suɔtɔ nwu pitipiti aayɔ aatika di ntɔɔni nwu suoto nɛ. Ninfɛ aatɔkɔ ma alɛ, "Biyiisa ɛpɔɔlɔ ɛna ku ntu, biɛnyɛɛnɛ mi bikpete di asaaɔta nwu ku ntɔɔni nwu suoto."

34 Ni aabuɛ alɛ, "Bikple bibla nkpo," ni baakple baabla nkpo nɛ.

Aakple aadiki kanya alɛ, "Bibla nkpo ditiɛfa," ni baabla nkpo ditiɛfa nɛ. 35 Ntu nwu lasoo diamana oleɔta akyikye nwu diakyi, bia diayii sɛkplo nwu.

36 Di oleɔta obe nwu kamɛ yi, Yaa ɔlaabuɛtɛtɛ Elia lanafu aawa sitũ, ni aapɛ ɔlaa alɛ: "Oo Saate , Abraham, Isak ku Israel Yaa, ta batofo miɛ alɛ afɔ ninle Yaa di Israel, ni di ami nle kpɛmblatɛ lɛfɔ, ni lɛbla asaa ya mmle amuu di kanya lɛfɔ didiki kamɛ nɛ. 37 Tuna fatɛɛ, Oo Saate , tuna fatɛɛ, di batii ba mmle batofo alɛ afɔ, O Saate , ninle Yaa, nni oso fookple famunikĩisa situ lɛma fanwako nɛ."

38 Ninfɛ di Saate nwu ɔtɔ lakpa kuabafiɛ oleɔta nwu, ntɔɔni, afuɔ ku kɔtɛ nwu, kuasɔɔsa kafɔɔ ntu nwu di okplo nwu kamɛ.

39 Di batii nwu bamuu lanya ni nle mmle yi, baase ntũ kaasɔ baabuɛ alɛ, "Saate nwu- nnwɔɔ ninle Yaa nɛ! Saate nwu- nnwɔɔ ninle Yaa nɛ!"

40 Ninfɛ di Elia latɔkɔ ma alɛ, "Bimumfũ Baal ɔlaababuɛtɛtɛ. Bitanta kuonwii lasifi!" Baamufũ ma, ni di Elia lata baasooko ma baasifiko Kison Ɔtaata, ni aalaalo ma ninfa nɛ.

41 Ni di Elia latɔkɔ Ahab alɛ, "Tɔɔkyɛ, faalaale, faanyi, diekye kanto kplɛ kɔkpanko suoto." 42 Nioso Ahab lasifi aalaale, aanyi, kafɔɔ Elia lakata aasifi Karmel Kobokote nsintɛɛ, aalaawakasɔ, ni aayɔ anu nɔɔ aakpee di akunkyi nɔɔ kamɛ nɛ.

43 Ni aatɔkɔ kpɛmblatɛ nɔɔ alɛ, "Kyɛ faalaanyu lekpo nwu lɛkyɛ." Ni aakata aakyɛ aalaanyu nɛ.

Ni aabuɛ alɛ, "Lɛsaalɛsaa nnaa ninfa."

Sikuɛnsĩ di Elia labuɛ alɛ, "Kple fakyɛ faalaanyu."

44 Ni di dikuɛsinle, kpɛmblatɛ nwu labuɛ alɛ, "Lelokonkyɛ biibii fɛ otii kɔnɛɛ kɔtaka kankye lekpo nwu."

Nioso Elia latɔkɔ nwɔ alɛ, "Tɔɔkyɛ faalaatɔkɔ Ahab falɛ, ‘Ninii babɔkɛɛ lɛfɔ di keke suoto, faasoo fasifi fiɛ di kanto atĩi fɔ osuku.’ "

45 Di obe nwu kamɛ, kolo ku alokonkyɛ niawɔfɔ, afɛɛfɔ niataka, kanto kplɛ lasoosa. Ni di Ahab lasiɛ keke nɔɔ aasifi Yesreel okpoo kplɛ nɛ. 46 Ni di Saate nwu osie labuo di Elia suoto, ni asosoosa akpeele nɔɔ aakpee di ofiami nɔɔ, aatoso aale Ahab katũ aafe di osuku aasiifi Yesreel okpoo kplɛ nɛ.