1 Di lefosi lɛlɛɛ nɛnle kamɛ, di Nebat obisuɔtɔbi Yeroboam sɛka ole kamɛ yi, Abigya labale Yuda ɔka, 2 ni aale sɛka di Yerusalem alɛɛ atiɛ nɛ. Ɔya leyooto niale Maaka, Abisalom obisankobi aale.

3 Aabla sikpile se simuu di ote labla ni di anu nɔɔ; atayɔ otu nɔɔ omuu aata Saate , Yaa nɔɔ, fɛ mmle di ɔwa nɔɔ Dawid otu late nii. 4 Kafɔɔ, ta Dawid oso Saate , Yaa nɔɔ latɔɔ kandiɛ di Yerusalem, aatɔɔ obisuɔtɔbi aayila nwɔ kaanya fɛ ɔka, aata Yerusalem lawɛ osie. 5 Diekye Dawid labla nle niasiɛko ni di Saate nwu anu, atasĩ kafɔɔ Saate nwu afiofa kukunwii ole di nkpa nɔɔ ayi amuu kamɛ- diediki Uria, Heti otii nwu ɔlaa lete.

6 Kakpɛ lasiɛ di Rehoboam ku Yeroboam ntɛɛ di Abigya nkpa osiɛ obe omuu kamɛ. 7 Di Abigya sɛka ole sɛsaabla bule ku n-ya amuu aabla nii yi, bɛɛkpana nya di Yuda baka sekofolaa kukũ kamɛ. Kakpɛ lasiɛ di Abigya ku Yeroboam ntɛɛ. 8 Ni di Abigya latɛ ɔnyɛɛ ku bate nɔɔ, ni baakookaa nwɔ di Dawid Okpoo Kplɛ nwu nɛ. Ninfɛ di obisuɔtɔbi nɔɔ Asa layila nwɔ kaanya fɛ ɔka nɛ.

9 Di alɛɛ afosi-anyɔ, di Israel ɔka Yeroboam sɛka ole kamɛ yi, Asa labale Yuda ɔka, 10 ni aale sɛka di Yerusalem alɛɛ afosi-ana-ninwii nɛ. Ɔwa nɔɔ sanko leyooto niale Maaka nɛ, Abisalom obisankobi aale.

11 Asa labla nle niasiɛko ni di Saate nwu anu, fɛ mmle di ote Dawid labla nii. 12 Aatososa kafiofa basɔnɔbakpeetɛ basuɔtɔ nwu di kasɔ nwu suoto. Aalɛ kafɔɔ afiɔtii ya amuu di bate nɔɔ labla ni aawii. 13 Aatakatɛ ɔwa nɔɔ sanko Maaka di kayilakɔ nɔɔ fɛ ɔkasanko. Diekye aabla diyududusaa aase afiɔ-sanko Asera owoso. Ni di Asa labudi owoso nwu aatɛ kaasɔ, aafiɛ nwu di Kidron Ɔtaata nɛ. 14 Nu atakpakpaa ntakalekɔ nwu yi, Asa otu omuu latika di Saate nwu suoto di nkpa nɔɔ mmuu kamɛ. 15 Aayɔ koto fututu, koto sɛɛle ku asaa ya di nnwɔɔ ku ote lakleklesa ni baawako Saate nwu olekatakɔ kamɛ.

16 Kakpɛ lasiɛ di Asa ku Israel ɔka Baasa ntɛɛ di sɛka ole lɛma simuu kamɛ. 17 Ni di Israel ɔka Baasa lakata aakyɛ aalaadieko Yuda, aatofo oyoyiɛ aakyisa Rama, aayɔ aatĩi osuku mmle di kuonwii dilɔbafuo ni odie ee abuo di Yuda ɔka Asa kasɔ suoto.

18 Ninfɛ di Asa layɔ koto fututu ku koto sɛɛle kumuu ko niabu ni di Saate nwu olekatakɔ asaa katɛkɔ ku nnwɔɔ omu lɛkayo kamɛ nɛ. Ni aayɔ kũ aata banɔɔfotii nɔɔ baakyɛnko Tabrimon obisuɔtɔbi Ben-Hadad, aale ni Siria ɔka Hesion obisuɔtɔbi, aatoole ni sɛka di Damasko nɛ. 19 Ni di Ɔka Asa latɔkɔ ma alɛ babuɛ alɛ, "Ta kanya ninii kasiɛ di ami ku afɔ ntɛɛ, fɛ mmle kaasiɛ ni di teemi ku teefɔ ntɛɛ. Nyu lo, lekyesee fɔ akyɛsaa ya ninle ni koto fututu ku koto sɛɛle. Kanunua kplesa kanya ninii lɛfɔ nwu ku Israel ɔka Baasa, di mmle abadiɛ mi ni otikanko."

20 Ninfɛ di Ben-Hadad latunako Ɔka Asa nɛ. Ni aakpee bakpɛtɛ nɔɔ kanyabayilatɛ di Israel sekpoo nwu suoto nɛ. Ni aalenkee Iyon, Dan, Abel Bet Maaka ku Kinerot omuu di Naftali lakyakaa nii. 21 Di Baasa lanu ni nnwɔ mmle yi, aadiɛ Rama oyoyiɛ nwu otofo, ni aadie aasifi Tirsa nɛ. 22 Ninfɛ di Ɔka Asa lata kufiofa di Yuda kasɔ kamuu alɛ- kuonwii diedie kaamɛ- ni baatuka afuɔ ku sewoso se di Baasa latɔɔblako ni ɔkpɛ di Rama ninfa baasifiko nɛ. Ni di Ɔka Asa layɔ nya aabudi Geba okpoo kplɛ nwu di Benyamin ku Mispa nɛ.

23 Di Asa sɛka ole sɛsaabla bamba simuu, n-ya aafuo ni ɔbla amuu, n-ya aabla ni amuu ku sekpoo kplɛ se aabudi nii, bɛɛkpana nya beekpee di Yuda baka sekofolaa kukũ kamɛ. Kafɔɔ di sɛnɔɔfo nɔɔ obe kamɛ, aabuo ofiɛ di nkpaa nɔɔ. 24 Ninfɛ di Asa latɛ ɔnyɛɛ ku bate nɔɔ nɛ. Ni baakookaa nwɔ ku mma di ote Dawid okpoo kplɛ nwu nɛ. Ni di obisuɔtɔbi nɔɔ Yosafat layila nwɔ kaanya fɛ ɔka nɛ.

25 Di Yuda ɔka Asa lɛlɛɛ nyɔɔfa kamɛ, ni di Yeroboam obisuɔtɔbi Nadab labale Israel ɔka nɛ. Ninfɛ aale sɛka di Israel suoto alɛɛ anyɔ nɛ. 26 Aabla dikpilesaa di Saate nwu anu, aakyɛ di ote sisuku suoto ku sikpile nɔɔ kamɛ, ni aata Israel kafɔɔ labla sĩ nɛ.

27 Ahigya obisuɔtɔbi Baasa wɔ niakye ni Isakar leyo kamɛ lakũ kanwumbe di suoto nɔɔ. Ni aalo Nadab aatɛ di Filisti batii okpoo onwii bɔɔlɛɛ ni Gibeton, di obe wɔ di Nadab ku Israel batii bamuu lamana okpoo nwu baakyi nii. 28 Baasa lalo Nadab di Yuda ɔka Asa lɛlɛɛ tiɛfa kamɛ, ni di Baasa layila nwɔ kaanya fɛ ɔka nɛ.

29 Aakye okye sɛka ole kasɔ, ni aalo Yeroboam leyo kamɛ batii bamuu nɛ. Atadiɛ Yeroboam otii kuonwii ninnwuna nii, kafɔɔ aawɔɔsa bamuu, di Saate nwu ɔlaa kanya ka aata aafenko ni di kpɛmblatɛ nɔɔ Ahigya, Silo otii nwu suoto- 30 ta sikpile se di Yeroboam labla ni, aata Israel kafɔɔ labla ni oso, ta ku nle aakpee ni Saate , Israel Yaa nwu ɔblɔ oso.

31 Di Nadab sɛka ole sɛsaabla bamba ku n-ya aabla ni amuu, bɛɛkpana nya di Israel baka sekofolaa kukũ kamɛ. 32 Kakpɛ lasiɛ di Asa ku Israel ɔka Baasa ntɛɛ di sɛka ole lɛma simuu obe kamɛ.

33 Di Yuda ɔka Asa lɛlɛɛ tiefa kamɛ yi, Ahigya obisuɔtɔbi Baasa labale Israel omuu ɔka di Tirsa, ni aale sɛka alɛɛ afosi anyɔ-ana nɛ. 34 Ni aabla dikpilesaa di Saate nwu anu nɛ, aakyɛ di Yeroboam sisuku suoto ku sikpile nɔɔ suoto aata Israel labla ni nɛ.