1 Obe owo sɛmaa, ɔlaa onwii lawa di nta awosobi kofe ko niale ni Nabot, Yesreel otii nwu kole suoto. Nta awosobi kofe nwu lawɛ di Yesreel, kuakaako ni Samaria ɔka Ahab lɛkayo. 2 Ni di Ahab latɔkɔ Nabot alɛ, "Yɔ nta awosobi kofe lɛfɔ nwu fatɛɛ, nin-yɔ mbla kutu ablasaa kɔba, ta kuɔkaako ni lɛkayo nii oso. Buɔkyɛlɛnsa, ninta fɔ nta awosobi kofe ko ninlɛ kulenke ni, ee nse dilɛ fɔ, kamata fɔ kɔya lele kuofũ."

3 Kafɔɔ Nabot ladiki kanya alɛ, "Saate nwu ata dikyɛ diokyo alɛ kayɔ bate nii atesaa nta fɔ."

4 Nioso Ahab lasifi leyo, aakatu anu, aanya ɔblɔ ta Nabot, Yesreel otii nwu labuɛ ni alɛ, "Namayɔ bate nii atesaa nta fɔ ni oso." Ni aalaate di atensaa nɔɔ suoto, aamunikĩisa anu aakyɔɔ oyoyiɛ, aasĩ alesaa ole nɛ.

5 Ni di ɔsɔfɔ Yesebel lawa aabakaalɛ nwɔ alɛ, "Obe oso fɔɔnya ɔblɔ osie kanya nkpo? Obe oso fonoole alesaa?"

6 Ni aatɔkɔ ɔsɔfɔ alɛ, "Ta latɔkɔ ni Nabot, Yesreel otii nwu nlɛ, ‘Sunsũ nta awosobi kofe lɛfɔ fatɛɛ; ee nse dilɛ fɔ, kamata fɔ nta awosobi kofe bamba nkyisa.’ Kafɔɔ Nabot labuɛ alɛ, ‘Namayɔ nta awosobi kofe nii nta fɔ.’ "

7 Ni di ɔsɔfɔ Yesebel labuɛ alɛ, "Diele afɔ nikole sɛka di Israel suoto? Taka faale alesaa! Nya otu. Kamafũ Nabot, Yesreel otii nwu nta awosobi kofe nta fɔ."

8 Nioso ɔsanko nwu lakpana akũ di Ahab leyooto kanya, aayɔ ɔka nwu nsũ lɛtɛsaa aatika, ni aayɔ aakyɛnko okpoo banɔɔfo ku banɔɔfotii ba niasiɛ ni di Nabot okpoo kplɛ nwu ku nnwɔɔ nɛ. 9 Di akũ nwu kamɛ, ɔsanko nwu lakpana alɛ:

"Bitɛ dii baanii kanya, biɛta Nabot kasiɛkɔ kplɛ asiɛ di batii nwu kamɛ. 10 Kafɔɔ bita atiipɛ anyɔ basiɛ bakyɔɔ Nabot anu, baabudi nwɔ kanya alɛ ɛɛkpaani Yaa ku ɔka, akyuu lɛma anyɔ. Biɛkpaa nwɔ bidieko bilaasafɔ nwɔ afuɔ bilo."

11 Nioso okpoo banɔɔfo ku banɔɔfotii ba niasiɛ ni di Nabot okpoo kplɛ nwu labla fɛ mmle di Yesebel labuɛ ni di akũ ya aakpana aata ma ni kanya. 12 Baatɛ kanya onii nwu, ni baasiɛsa Nabot di kasiɛkɔ kplɛ di batii nwu kamɛ nɛ. 13 Ninfɛ di atiipɛ anyɔ nwu labasiɛ baakyɔɔ Nabot anu, baabuɛ ɔlaa baatika nwɔ di suoto, di batii nwu anu baabuɛ alɛ, "Nabot lakpaani Yaa ku ɔka, akyuu lɛma nwu anyɔ." Nioso baakpaa nwɔ baadieko di okpoo kplɛ nwu kamɛ baalaasafɔ nwɔ afuɔ baalo. 14 Ninfɛ baata Yesebel kanya alɛ, "Batɔɔsafɔ Nabot afuɔ, nioso aatookpi."

15 Di Yesebel lanu onu alɛ batɔɔsafɔ ni Nabot afuɔ beelo nii, ni aatɔkɔ Ahab alɛ, "Taka faalaayɔ Nabot, Yesreel otii nwu nta awosobi kofe ko aasĩ ni osunsũ ɔta fɔ. Aasinsi nkpa, kafɔɔ atookpi." 16 Obe wɔ di Ahab lanu alɛ Nabot ntookpi nii, ni aataka, aasoo aakyɛ aalaayɔ Nabot nta awosobi kofe nwu nɛ.

17 Ninfɛ di Saate nwu ɔlaa lawa kuata Elia, Tisbi otii nwu alɛ: 18 "Soo fakyɛ faalaakyakako Israel ɔka Ahab, nnwɔ nikole ni sɛka di Samaria. Kanunua nfɛ akpe di Nabot nta awosobi kofe kamɛ, nfa atɔɔkyɛ alɛ ɔɔlayɔ kũ nɛ. 19 Tɔkɔ nwɔ falɛ, ‘Nnya ɔlaa wɔ di Saate nwu kobuɛ ni: Diele otii fatoolo, ni faatoofũ atesaa nɔɔ nɛ?’ Ni faatɔkɔ nwɔ falɛ, ‘Nnya ɔlaa wɔ di Saate nwu kobuɛ ni alɛ: Di lɛba le di baweewee laya ni Nabot ntɔ yi, nfa di baweewee kamaya ntɔ lɛfɔ nɛ- nwaako, ntɔ lɛfɔ!’ "

20 Ni di Ahab latɔkɔ Elia alɛ, "Lo nii, nioso fatabanyɛɛ!"

Ni di Elia latuna alɛ, "Ntɔbanya fɔ, diekye fatoosunsũ suoto lɛfɔ fɛɛta okpile di Saate nwu anu. 21 ‘Nfɛ kɔmawako ɔlaa kpile di suoto lɛfɔ. Kamawɔɔsa banantii lɛfɔ, kamalo kafɔɔ Ahab osuɔtɔ yɛntɛle biala, ndiki di Israel- ɔlanle ee nnwɔ ninsiko ni suoto. 22 Kamabla leyo lɛfɔ ninte fɛle Nebat obisuɔtɔbi, Yeroboam lele okle, ku Ahigya obisuɔtɔbi, Baasa lele okle. Diekye fatookpee mi ɔblɔ, fɛɛta kafɔɔ Israel lɛbla okpile.’

23 "Di Yesebel suoto yi, Saate nwu lebuɛ alɛ, ‘Baweewee nimabɛbɛɛ Yesebel di Yesreel seyoyiɛ suoto.’

24 "Baweewee kamawee mba ninle ni Ahab bale, beekpi ni di okpoo kplɛ nwu kamɛ. Kɔfɛɛfɔ bakansiɛ kafɔɔ kamakyɔkyɔfɛ mba niekpi ni di lepoo kamɛ."

25 (Otii kuonwii ditawɛ diidii, fɛle Ahab, aayɔ suoto nɔɔ aasunsũ aata ni sikpile ole di Saate nwu anu, di ɔsɔfɔ nɔɔ Yesebel lakpee nwɔ alɛ abla nii. 26 Ahab labla ayududusaa aatikanko afiɔ, fɛle mmle di Amori batii ba di Saate nwu latososa aadiki ni di Israel anu.)

27 Obe wɔ di Ahab lanu ni Elia sɛlaa se mmle, aabɛbɛɛ akpeele nɔɔ, aaminisa leboko ni aanii kanya nɛ. Aatoote di leboko kamɛ, aakyɛ aatookyi sɛnyaami kanya.

28 Ninfɛ di Saate nwu ɔlaa lawa kuata Elia, Tisbi otii nwu alɛ: 29 "Fatɔɔnya mmle di Ahab ntɔɔwakosa ni suoto nɔɔ kasɔ di anu nii? Ta atɔɔwakosa ni suoto nɔɔ kasɔ oso yi, namasinta ɔlaa kpile wɔ mmle kuwa di obe nɔɔ kamɛ. Kafɔɔ kamata nwu kunwa di obisuɔtɔbi nɔɔ obe kamɛ."