1 Ninfɛ di Elia, Tisbi otii nwu niakye ni Tisbi di Gilead latɔkɔ Ahab alɛ, "Di Saate , Israel Yaa nwu, nnwɔ kosumu ni nkpe ni nkpa yi, kanto ee oblokyi dilɔbasinwɛ di alɛɛ asɛɛ ya nikɔwa ni kamɛ, diediki lekple lebuɛ fiɛ di kanto kamanɔɔ.,"

2 Ninfɛ di Saate nwu ɔlaa lawa kuata Elia alɛ: 3 "Die ninfũ, faakyɔɔ anu kufĩ katunkɔ lɛkyɛ, faalaawofa di Kerit Kɔwɛ kamɛ, di Yordan kufĩ katunkɔ. 4 Fabanyi ntu di kaklenyii nwu, ntoodiki kafɔɔ bakwakwalobi kanya nlɛ banyu fɔ kanya ninfa."

5 Nioso Elia labla fɛ mmle di Saate nwu latɔkɔ nwɔ nii. Aasifi aalaasiɛ ninfa di Kerit Kɔwɛ nwu di Yordan kufĩ katunkɔ. 6 Ni di bakwakwalobi lawako nwɔ bloblo ku sina di olese, bloblo ku sina di kɔtɔɔfɔ, ni aanyi ntu di kaklenyii nwu nɛ.

7 Di obe owo sɛmaa kaklenyii nwu lasɔɔ, ta kanto disinnɔɔ ni di kasɔ nwu suoto oso. 8 Ninfɛ di Saate nwu ɔlaa lawa kuata Elia alɛ: 9 "Die wla fasifi Sarefat di Sidon faalaasiɛ ninfa. Ntɔɔtɔkɔ kpisɔfɔ onwii ninfa nlɛ ata fɔ alesaa." 10 Nioso aasifi Sarefat. Obe wɔ di Elia labadu ni okpoo nwu kayoko yi, kpisɔfɔ onwii lawɛ ninfa aatoomiɛ ni ntɔɔni. Ni di Elia lalɛɛ ɔsanko nwu aatɔkɔ alɛ, "Wakoe ntu kɛɛkɛɛ di kakuikuii kamɛ ninnyi." 11 Di ɔsanko nwu latoofe ni ntu nwu ɔyɔ, ni di Elia latɔkɔ nwɔ alɛ, "Lekoto, wakoe bloblo kakyɛɛ kafɔɔ."

12 Ni di ɔsanko nwu ladiki kanya alɛ, "Nwaako, di Saate nwu, Yaa lɛfɔ lɛnya akpe ni nkpa yi, bloblo kuonwii nnaa mi- nnaafũ kɔnɛɛ kamɛ diyii lete niebu mi di letoo kamɛ ku nnɔfɔ kafui di lɛtaase kamɛ. Ntɔɔni nsɛɛ kɔsɛsɛɛ nsifiko leyo ninaawa lelesaa nta ami omu ku obisuɔtɔbi nii, alɛ buale nya- munkpi."

13 Ni di Elia latɔkɔ ɔsanko nwu alɛ, "Tanyɛkɛ. Tɔɔkyɛ leyo faalaabla fɛ mmle feebuɛ ni. Kafɔɔ kasa bloblo kakudi ɔbla di nnaafũ be ninkpe fɔ ni kamɛ fawakoe, fiɛ nfɛ faabla lɛsaa lewo fata suoto lɛfɔ ku obisuɔtɔbi lɛfɔ. 14 Diekye nnya ɔlaa wɔ di Saate , Israel Yaa nwu kobuɛ ni alɛ: " ‘Nnaafũ dilɔbaloo di letoo, nnɔfɔ dilɔbaloo di lɛtaase kafɔɔ, diɛlaase di obe wɔ di Saate nwu kamata kanto nnɔɔ ni di kasɔ nwu suoto.’ "

15 Ninfɛ di ɔsanko nwu lasifi aalaabla fɛ mmle di Elia latɔkɔ nwɔ ni nɛ. Nioso alesaa lawɛ dii biala aata Elia ku ɔsanko nwu ku leyo nɔɔ batii. 16 Diekye nnaafũ ditaloo di letoo nwu, nnɔfɔ kafɔɔ ditaloo di lɛtaase nwu kafɔɔ, ta di ɔsanko nwu lanu ni Saate nwu ɔlaa wɔ di Elia labuɛ ni oso.

17 Di obe owo sɛmaa, ɔsanko wɔ nimba ni leyo nwu obisuɔtɔbi labuo ɔfiɛ. Ɔfiɛ nwu kanya latɔɔtaka katoo, lɛyɛntɛle, aabadiɛ onwuna. 18 Ni di ɔsanko nwu lakaalɛ Elia alɛ, "Yaa otii, ɔmɛnlaa ninsi munko fɔ ntɛɛ? Ɔwa fɛɛwa falɛ fɔɔbanyumasɛɛ sikpile nii, fanlo obisuɔtɔbi nii?"

19 Ni di Elia labuɛ alɛ, "Yɔ obisuɔtɔbi lɛfɔ nwu fatɛɛ." Ni aafũ nwɔ di ɔya nnɛɛ, aakpaa nwɔ aasifiko leyo le di osi di nfũ aasiɛ nii, ni aayɔ nwɔ aatensa di atensaa nɔɔ suoto nɛ. 20 Ni aapɛ ɔlaa aata Saate nwu aabuɛ alɛ, "Oo Saate , Yaa nii, fɛɛyɔ ɔlaa kpile kafɔɔ fɛɛwako di kpisɔfɔ wɔ mmle ɔkyɛ nsi ni, fanta obisuɔtɔbi nɔɔ nkpi?" 21 Ninfɛ aafuu di osuɔtɔbi nwu suoto sitiɛ simu nɛ, aapɛ ɔlaa aata Saate nwu alɛ, "Oo Saate , Yaa nii, ta osuɔtɔbi wɔ mmle nkpa dikple diwa nwɔ kamɛ!"

22 Ni di Saate nwu lanu Elia ɔlaa ɔpɛ, aata ninwuna lakple diabuo di osuɔtɔbi nwu kamɛ, ni aawɛ nkpa nɛ. 23 Ninfɛ di Elia lakɛnkɛ obisɔ nwu, aasooko nwɔ aawako kasɔ leyo nwu nɛ. Ni aayɔ nwɔ aata ɔya aabuɛ alɛ, "Nyu, obisuɔtɔbi lɛfɔ ntɔɔwɛ nkpa!"

24 Ninfɛ di ɔsanko nwu latɔkɔ Elia alɛ, "Mianwu nfɛ letofo nlɛ Yaa otii fale nɛ, alɛ Saate nwu ɔlaa wɔ niekye ni kanya lɛfɔ nle onukwale."