1 Ninfɛ di Solomon lalɛɛ Israel banɔɔfo, ana nwu amuu batunletɛ ku Israel batii ayo kamɛ kanyabayilatɛ di anu nɔɔ di Yerusalem, alɛ balaayɔ SAATE nwu kanya ninii lɛlakaa di Dawid Okpoo kplɛ Sion bawako nɛ. 2 Nioso Israel batii bamuu labasi di Ɔka Solomon nfũ di Etanim Dii olebee kamɛ di kɔwɛntɛ kuɛsinle kamɛ.

3 Obe wɔ di Israel banɔɔfo bamuu labuo nii, olebatatɛ nwu lakɛnkɛ lɛlakaa nwu, 4 ni baayɔ SAATE nwu lɛlakaa ku Lɛkpaayo le Mansi ni ku asaa klekle amuu di kamɛ nini baawako nɛ. Olebatatɛ ku Lewi batii niatuka nya. 5 Ni di Ɔka Solomon ku Israel batii bamuu ba niamasi ni di ɔkyɛ nɔɔ labayila di lɛlakaa nwu anu, baatɔɔta ole ku bafoso ku banankyue kpinwu ba batafuo ni nsũ ɔtɛ ee baaka nii.

6 Ninfɛ di olebatatɛ nwu layɔ SAATE nwu kanya ninii lɛlakaa baawako di olekatakɔ kamɛ, kakleklekɔ nwu, niale ni Kakleklekɔ kaamɛ Kakleklekɔ di kayilakɔ nini, ni baayɔ ni baase di bakerubim afoko kalɔ nɛ. 7 Bakerubim nwu lafukuti afoko lɛma baatĩi lɛlakaa lɛba nwu, diata lɛlakaa nwu ku sewoso se mantuka nini oyududu. 8 Sewoso se mmle latɛ siakaana alɛ baatɔɔnya sɛnya nisĩ mankyeko Kakleklekɔ, kamɛ Kakleklekɔ sitũ. Kafɔɔ batatɔɔnya sĩ di Kakleklekɔ nwu kayi lɛkyɛ; siate ninfa dialaadu obe wɔ baakpana ni sɛlaa se mmle. 9 Lɛsalɛsaa ditasiɛ di lɛlakaa nwu kamɛ diediki afuɔ nkyɛ nnyɔ be baakpana ni afiofa lefosi ya di Mose layɔ aakpee ni kaamɛ di Horeb* Kobokote osi, nfũ di SAATE nwu lanii ni kanya ku Israel batii di obe wɔ baadie ni di Egipte kasɔ.

10 Obe wɔ di olebatatɛ nwu ladie ni di Kakleklekɔ nwu yi, ni di alokonkyɛ* layii SAATE nwu olekatakɔ nɛ. 11 Nkpo oso olebatatɛ nwu ditasinfuo ɔkpɛ lɛma ɔbla ta alokonkyɛ nwu oso, diekye SAATE nwu lɛkpa layii olekatakɔ nɔɔ nwu kamɛ.

12 Ninfɛ di Solomon labuɛ alɛ, "SAATE nwu labuɛ alɛ, nnwɔɔ abasiɛ di alokonkyɛ tunutunu kamɛ; 13 ntootofo olekatakɔ ka nikɔlɛ ni onyu lɛta fɔ, lɛba le fabasiɛ ni dinaa ni kaloo."

14 Di Israel batii bamuu lasi dikudi baayila ni ninfa, ɔka Solomon lamunikĩi, aata ma lɛtɔtrɔ. 15 Ninfɛ aabuɛ alɛ:

"Baatansa SAATE, Israel Yaa nwu, nnwɔ niɛyɔ kɔnɛɛ nɔɔ kumu ɛɛbla ni ntam be aaka ni ku kanya nɔɔ kamu aata ni teemi Dawid. Diekye aabuɛ alɛ, 16 ‘Diayɔ ni di dii le lakpaa ni batii nii Israel ladieko ni di Egipte kasɔ, nindiki okpoo kplɛ kuonwii di Israel kɔna kukunwii kamɛ nlɛ baatofo olekatakɔ alɛ Leyooto nii kate ninfa. Kafɔɔ lediki Dawid nlɛ ale sɛka di batii nii Israel suoto.’

17 "Diasiɛ di teemi Dawid otu kamɛ alɛ ootofo olekatakɔ anta SAATE, Israel Yaa nwu Leyooto. 18 Kafɔɔ SAATE nwu latɔkɔ teemi Dawid alɛ, ‘Ta diakye ni di otu lɛfɔ kamɛ falɛ footofo olekatakɔ fanta ni Leyooto nii yi, feelolaa fɛɛbla alɛ fɛɛwɛ nle mmle di otu lɛfɔ kamɛ. 19 Kafɔɔ, diele afɔ ninle otii wɔ nimatofo ni olekatakɔ nwu, kafɔɔ obisuɔtɔbi lɛfɔ, nnwɔ ninle fɔ ni suoto sina ku ntɔ mmu- nnwɔɔ ninle otii wɔ nimatofo ni olekatakɔ di Leyooto nii kamɛ nɛ.’

20 "Nwaako, SAATE nwu ntɔɔbla di ntam be aaka ni kanya: Nfɛ n-yɛ di teemi Dawid kanya fɛ ɔka, nioso kanunua nfɛ nsi di Israel lɛkakpomii suoto, fɛ mmle di SAATE nwu laka ni ntam kanya. Ntootofo olekatakɔ nwu lɛta SAATE, Israel Yaa nwu Leyooto. 21 Ntɔɔbla lɛba lɛta SAATE nwu lɛlakaa, ninle ni SAATE nwu kanya ninii le aanii ni ku bate loo, di obe wɔ aakpaa ma aadieko ni di Egipte kasɔ."

22 Ninfɛ di Solomon lataka aayila di SAATE nwu oleɔta akyikye katũ, di Israel batii dikudi nimuu anu, aablɛfɛsa nnɛɛ nɔɔ aakyɔɔ osi, 23 ni aabuɛ alɛ:

"Oo SAATE, Israel Yaa, Yaa kuonwii nnaa di osi kaatoo ee kasɔ kaalɔ- afɔ wɔ nimbla ni di lɛbɔmbɔ lɛfɔ kanya ninii suoto ku bakpɛmblatɛ lɛfɔ ba niekple bakyɛ ni di osuku lɛfɔ suoto ku situ lɛma simuu. 24 Fatɔɔbla di ntam lɛfɔ be faaka faata ni kpɛmblatɛ lɛfɔ teemi Dawid; ku kanya lɛfɔ faaka ntam, ku kɔnɛɛ lɛfɔ kafɔɔ fatɔɔta diɛwa kaanya- fɛ mmle dite ni miɛ.

25 "Nioso kanunua, SAATE, Israel Yaa, bla ni fata kpɛmblatɛ lɛfɔ teemi Dawid, di ntam be faaka faatɔɔ ni, di obe wɔ faabuɛ ni falɛ, ‘Diidii Israel lɛkakpomii dilɔbayila difukuti alɛ flɔbawɛ otii asiɛ nini di suoto di anu nii, nse babisuɔtɔbi lɛfɔ leloolaa beenyu di asaa ya amuu bɔɔbla ni, bɛɛkyɛ di anu nii fɛ mmle faabla nii.’ 26 Nioso kanunua, Oo Israel Yaa, ta ɔlaa lɛfɔ ntam be faaka faata ni kpɛmblatɛ lɛfɔ teemi Dawid diwa kaanya.

27 "Kafɔɔ nwaako, Yaa kamasiɛ di kasɔ ka mmle suoto? Osi, bia osi, osi katakalekɔ nwu dilabafuo fɔ oklee. Ni lɛ nfɛ di olekatakɔ ka mmle letofo ni kamafuo! 28 Oo SAATE, Yaa nii, kafɔɔ kyɔɔ atoko di kpɛmblatɛ lɛfɔ ɔlaa ɔpɛ ku nyaami nɔɔ ɔnya ɔlaa suoto. Nu kaku ku ɔlaa ɔpɛ wɔ di kpɛmblatɛ lɛfɔ kɔpɛ anta ni di anu lɛfɔ miɛ dii le mmle. 29 Ta anu lɛfɔ atika di olekatakɔ ka mmle kakũ ku kakyɛ, lɛba le mmle faabuɛ ni falɛ, ‘Leyooto nii kamate ni ninfa,’ di mmle fabanu ni ɔlaa ɔpɛ wɔ di kpɛmblatɛ lɛfɔ nkyɔɔ ni anu di lɛba le mmle ampɛ ni. 30 Nu kpɛmblatɛ lɛfɔ ku Israel batii lɛfɔ diwi-lɛɛ nse bɛɛkyɔɔ anu lɛba le mmle bɛɛpɛ ɔlaa. Nu di osi, di kasiɛkɔ lɛfɔ nwu, nse feenu kafɔɔ, faayɔ fakyɛ.

31 "Nse otii lɛbla owo nɔɔ okpile, dikaatɛ alɛ ɛɛka ntam, ɛɛwa ɛɛbaka ntam nwu di oleɔta akyikye lɛfɔ suoto di olekatakɔ ka mmle yi, 32 ni faanu di osi, faadiki kɔkpaa. Ka lɛka di bakpɛmblatɛ lɛfɔ ntɛɛ, faasĩ ɔlaa fata nnwɔ niekpi ni lɛpɔɔ, faata kafɔɔ nle ɛɛbla ni ditika di nnwɔɔ omu nɔɔ disi. Diki nnwɔ ninakpi ni lɛpɔɔ lɛbɛ nɔɔ fatuo, faadiki lɛbɛ nɔɔ ole kasɔ.

33 "Nse balo lelenkee batii lɛfɔ Israel, ta bɛɛbla fɔ ni okpile oso, ni nse beekple bɛɛwa ɔkyɛ lɛfɔ, bɛɛlɛɛ Leyooto lɛfɔ, bɔɔpɛ ɔlaa, manwi manlɛɛ fɔ di olekatakɔ ka mmle yi, 34 ni faanu di osi, faayɔ batii lɛfɔ Israel sikpile fakyɛ ma, faakplesa ma fawako kasɔ ka faata ni bate lɛma suoto.

35 "Nse osi lɛsɛɛ, di kanto dilɔɔnɔɔ ta batii lɛfɔ lɛbla ni okpile di suoto lɛfɔ oso yi, bɛɛkyɔɔ anu di lɛba le mmle bɛɛpɛ ɔlaa, bɛɛlɛɛ leyooto lɛfɔ, beediɛ sikpile lɛma nwu, ta fɛɛnanfi ma ni kootoko oso yi, 36 ni faanu di osi, faayɔ bakpɛmblatɛ lɛfɔ, batii lɛfɔ Israel sikpile fakyɛ ma. Faatuo ma osuku biene wɔ kanya baasiɛ ni nkpa, faata kanto kafɔɔ anɔɔ akpete di kasɔ ka faata ni batii lɛfɔ fɛ atesaa.

37 "Nse kɔka ee ɔfiɛ kpile lɛwa di kasɔ nwu suoto ee alesaa lɛlalaa ee kabiene lɛkpɛ ee balososo ee atroee ee balo lɛbamana sekpoo kplɛ lele lɛma beekyi, di ɔlaa kpile lele ee ɔfiɛ owo lɛwa, 38 di obe wɔ di batii lɛfɔ Israel lele lɛpɛ ɔlaa ee eetikiti lekoto- di obiala lɛma letofo letoko nnanfi nɔɔ nimu di otu nɔɔ kamɛ, ɛɛtakatɛsa nnɛɛ nɔɔ ɛɛkyɔɔ olekatakɔ ka mmle yi- 39 ni faanu di osi wɔ ninle ni kasiɛkɔ lɛfɔ. Faayɔ fakyɛ ma, faadiki kɔkpaa; blako otii biala ɔkpɛ di n-ya amuu ɛɛbla ni kanya, diekye faye otu nɔɔ kamɛ, (diekye lete lɛfɔ nin-ye batii bamuu situ kamɛ), 40 alɛ babayɛkɛ fɔ obe lele basi di kasɔ ka faata ni bate loo.

41 "Ɔfɔɔ wɔ ninanle ni Israel lɛfɔ otii, kafɔɔ eekye ni kasɔ fanfa suoto ɛɛwa ni, ta leyooto lɛfɔ oso- 42 ta batii kamanu ni leyooto kplɛ lɛfɔ nwu ku kɔnɛɛ lɛfɔ osie ku kɔnɛɛ lɛfɔ lɛnanfi oso- nse ɛɛwa ɛɛbapɛ ɔlaa di olekatakɔ ka mmle, 43 ni faanu di osi, dile ni kasiɛkɔ lɛfɔ, faabla kafɔɔ lelele di ɔfɔɔ nwu lɛkaalɛ fatɔɔ, alɛ batii bamuu di kasɔ suoto katofo ni Leyooto lɛfɔ man-yɛkɛ fɔ, fɛ mmle di batii lɛfɔ bamu Israel kɔbla ni, mantofo ni alɛ Leyooto lɛfɔ nintika ni di leyo le mmle letofo ni suoto.

44 "Nse batii lɛfɔ lɛtaka bɛɛkyɛ kakpɛ di balo lɛma suoto, di kakɔ lele feekpee ma, nse kafɔɔ bɛɛpɛ ɔlaa bɛɛta SAATE nwu di okpoo kplɛ wɔ feediki ni ku olekatakɔ ka letofo lɛta ni Leyooto lɛfɔ yi, 45 ni faanu ɔlaa ɔpɛ ku lekoto otikiti lɛma nwu di osi, faabla fata ma.

46 "Nse bɛɛbla okpile di suoto lɛfɔ- diekye kuonwii nnaa alɛ ambla ni okpile oso- fɛɛnya ɔblɔ feekpeeko ma, fɛɛyɔ ma feekpee di lo lɛma nnɛɛ, eemufũ ma eesifiko kasɔ nɔɔ kamu suoto, keekyo ee kɛɛtɛɛtɛɛ ni yi, 47 ni nse beekyisa situ di kasɔ ka suoto beemufũ ma beesifiko nii, beediɛ sikpile lɛma, beetikiti fɔ lekoto di mba niemufũ ma ni kasɔ suoto beebuɛ alɛ, ‘Buɔbla okpile, buololaa bubla, buɔbla asaa di amumu kanya’ "; 48 ni nse beekple bɛɛwa ɔkyɛ lɛfɔ ku situ lɛma simuu ku sɛkla lɛma di balo lɛma kasɔ ka suoto beemufũ ma beesifiko nii, bɛɛpɛ ɔlaa bɛɛkyɔɔ anu di kasɔ ka faata ni bate lɛma, bɛɛkyɔɔ anu di okpoo kplɛ wɔ feediki ni ku olekatakɔ ka letofo lɛta ni Leyooto lɛfɔ, 49 ni nu di osi, dile ni kasiɛkɔ lɛfɔ nwu, nu ɔlaa ɔpɛ ku lekoto otikiti lɛma, faabla fata ma kafɔɔ. 50 Faayɔ fakyɛ batii lɛfɔ, mba niɛbla ni okpile di suoto lɛfɔ; yɔ ɔtanlolaa ɔbla wɔ bɛɛbla ni di suoto lɛfɔ fakyɛ ma, fata falɛ mba nielenkee ma ni banya ma nyaami; 51 diekye mma ninle batii lɛfɔ ku atesaa lɛfɔ nɛ, mba faakpaa faadieko ni di Egipte kasɔ, faadieko ni di abɔɔsaa-nyinakĩisale kpankpa kamɛ.

52 "Ta anu lɛfɔ atika di kpɛmblatɛ lɛfɔ lekoto otikiti suoto ku batii lɛfɔ Israel lekoto otikiti suoto, obe lele beewi bɛɛlɛɛ fɔ kafɔɔ, faakyɔɔ ma atoko. 53 Diekye afɔ niadiki lete lɛma faakyeko nnle mmuu kaayi kamɛ falɛ bale atesaa lɛfɔ amu, fɛ mmle faabuɛ faafenko ni di kpɛmblatɛ lɛfɔ Mose suoto, di obe wɔ di afɔ, O SAATE Kplɛ, faakpaa bate loo faadieko ni di Egipte kasɔ suoto."

54 Obe wɔ di Solomon laloo ni ɔlaa ɔpɛ ku diwi-lɛɛ le mmle nimuu ɔta ni SAATE nwu yi, ni aataka di SAATE nwu oleɔta akyikye katũ nɛ, di lɛba le amapɛ ni akunkyi, anwii ni nnɛɛ nɔɔ ankyɔɔ ni osi. 55 Ni aataka aata Israel batii bamuu lɛtɔtrɔ ku sɛlɔ siene aabuɛ alɛ:

56 "Baatansa SAATE nwu, nnwɔ nitɔɔta ni batii nɔɔ Israel ɔnyɛɛ ɔtɛ fɛ mmle aaka ni ntam. Bia ɔlaa onwii di ntam biene nɔɔ nwu mmuu aata aafenko ni di kpɛmblatɛ nɔɔ Mose suoto diebu, kunaawa ni kaanya. 57 SAATE, Yaa loo nwu asiɛko wo fɛ mmle aasiɛko ni bate loo; atandiɛ wo aatɛ ee aayee wo diidii. 58 Amunikĩisa situ loo atika di suoto nɔɔ, alɛ buakyɛ di sisuku nɔɔ simuu suoto, mmule afiofa nɔɔ, sɛsaabla ku ablasaa ya aata ni bate loo. 59 Ta sɛlaa nii se mmle, ntɔɔpɛ ni ɔlaa di SAATE nwu anu sitɛɛtɛɛ SAATE, Yaa loo nwu, kakũ ku kakyɛ, alɛ aabla anta kpɛmblatɛ nɔɔ ku batii nɔɔ Israel kafɔɔ di mmle diefĩ ni di dii biala kanya, 60 di mmle di batii bamuu di kasɔ suoto katofo ni alɛ SAATE nwu ninle ni Yaa, di kuonwii nsinnaa nii. 61 Kafɔɔ biyɔ situ lee simuu bita SAATE, Yaa loo, alɛ buasiɛ nkpa di sɛsaabla nɔɔ kanya, minkyɔɔ ni afiofa nɔɔ atoko fɛ mmle dite ni di obe wɔ mmle kamɛ."

62 Ninfɛ di ɔka ku Israel batii bamuu ba niawɛ ni ku nnwɔɔ lata ole di SAATE nwu anu nɛ. 63 Solomon lata atoko ɔkyɛ ole asaaɔta ole aata SAATE nwu: banankyue nkpe afosi-anyɔ-banyɔ, bafoso ku batie kafɔɔ labla nkpe kɔlafa-afosi-anyɔ. Nioso ɔka ku Israel batii bamuu ladiki SAATE nwu olekatakɔ kayi.

64 Di dii nwu nkpo kale, ɔka lakleklesa kaflɔnkɔ nwu ntɛɛntɛɛ di SAATE nwu olekatakɔ anu. Nfa kafɔɔ aata ɔfiɛ asaaɔta, alesaa asaaɔta ku atoko ɔkyɛ ole lɛla asaaɔta, diekye abɔɔsaa oleɔta akyikye nwu di SAATE nwu olekatakɔ anu lasii obiibii aaklee ni ofiɛ asaaɔta, alesaa asaaɔta ku atoko ɔkyɛ ole lɛla asaaɔta.

65 Nioso Solomon lale dii di obe nwu kamɛ, di Israel batii bamuu kafɔɔ lawɛ ni ku nnwɔɔ- batii dikudi kplɛ ninwii lakye Lebo Hamat baawa Egipte Kaklenyii. Baale dii nwu di SAATE, Yaa loo anu ayi akuɛnsĩ, baakple baale ayi akuɛnsĩ baaakyakaa, ni di amuu labla ayi lefosi-ana nɛ. 66 Di kaleesɛ, Solomon ladiki batii nwu osuku. Ninfɛ baawii ɔka lɛtɔtrɔ, ni baasifi ayo lɛma, ku suoto lɛyɔɔ ku lɛpɔ̀ di situ lɛma kamɛ di asaa biene ya amuu di SAATE nwu labla aata ni kpɛmblatɛ nɔɔ Dawid ku batii nɔɔ Israel nɛ.