1 Obe wɔ di Seba Ɔkasanko lanu ni mmle di Solomon ntoofũ ni leyooto ku mmle di kasiɛ nɔɔ ku SAATE nwu leyooto nte nii yi, ni di ɔsanko nwu lawa aabasɔ nwɔ aanyu ku sɛnɔɔfolaa nɛ. 2 Ni di ɔkasanko nwu lakyɛ Yerusalem ku banɔɔfotii dikudi kpinwu- ku kapubapɔnkɔ ba niatuka ni akɔnɔkɔnɔsaa, koto sɛɛlɛ kpinwu ku afuɔ ya niefũ ni kɔya- ni di ɔsanko nwu lawa Solomon nfũ aabakakatɛko nwɔ ku sɛlaa se simuu niasiɛ nwɔ ni di disi kamɛ nɛ. 3 Solomon kafɔɔ ladiki kanya di sɛlaa se simuu aakaalɛ nii; lɛsalɛsaa ditasii osie ɔwɛ ɔta ɔka ku kamɛ ɔkpasa ɔta ɔsanko nwu. 4 Di Seba ɔkasanko nwu lanya ni Solomon ninumbe nimuu ku lɛkayo le aatofo nii, 5 alesaa ya di opunu nɔɔ suoto, banɔɔfotii nɔɔ nsiɛkɔ, bakpɛmblatɛ nɔɔ akpeele ya baakpee ni, nta banyɛɛnɛtɛ nɔɔ ku ofiɛ asaaɔta wɔ aabla aata ni SAATE nwu di olekatakɔ yi, diabla ɔkasanko nwu ɔkpɛ.

6 Ni di ɔsanko nwu latɔkɔ ɔka alɛ, "Sɛlaa se lanu ni di kale nii kamu lakyeko ni asaa ya fatɔɔbla ni suoto ku ninumbe lɛfɔ nte nkpo." 7 Kafɔɔ ntafũ asaa nwu lanu, diediki ntɔɔwa lɛbanya ku anu nii amu. Nwaako, batatɔkɔ mi bia kakyɛ ninya; di ninumbe ku lɛsaawɛ kamɛ yi, fatɔɔwaalɛ sɛlaa se lanu ni fanfa. 8 Nyu mmle di suoto kɔyɔɔ ni batii lɛfɔ! Nyu mmle di suoto kɔyɔɔ ni banɔɔfotii lɛfɔ ba nikonyu fɔ ni obe lele, man-nu ni kafɔɔ ninumbe lɛfɔ! 9 Baatansa SAATE, Yaa lɛfɔ, nnwɔ feebuo ni anu, ɛɛyɔ fɔ eesiɛsa ni di Israel lɛkakpomii suoto. Ta SAATE nwu lɛbɔmbɔ le ninaa ni kaloo akpe ɛɛta ni Israel oso eese fɔ ɔka, alɛ faaka lɛka tinini ku sɛsaabla tinini nɛ."

10 Ninfɛ di ɔkasanko nwu lata ɔka koto sɛɛle onutũ fɛ bakilo nkpe-nna, akɔnɔkɔnɔsaa kpinwu ku afuɔ ya niefũ ni kɔya nɛ. Diidii kuonwii ditasinwako akɔnɔkɔnɔsaa kpinwu ya mmle okle, fɛ n-ya di Seba ɔkasanko lata ni Ɔka Solomon.

11 (Ni di Hiram seklo lakyeko koto sɛɛle di Ofir baawako nɛ; baayɔ kafɔɔ sewoso se niefũ ni kɔya ku afuɔ ya niefũ ni kɔya kpinwu baawako. 12 Ɔka layɔ sewoso nwu niafũ ni kɔya aabla asunsaa aata SAATE nwu olekatakɔ ku lɛkayo nwu, baabla kafɔɔ bakyitaa ku basanku baata sinu basantɛ. Nioso diidii badisinklaa ee banya sewoso se niefũ ni kɔya diayɔ ni di dii nwu kamaa.)

13 Nioso ɔka Solomon lata Seba ɔkasanko nwu asaa ya amuu oomiɛ ni ee aakaalɛ nii, di n-ya aatɔɔ aakyeko ni akasaa nɔɔ kamɛ lakyakaa nii. Ninfɛ di ɔsanko nwu ku banɔɔfotii nɔɔ lakple baasifi kale nɔɔ kamu nɛ.

14 Di lɛlɛɛ biala Solomon nfũ koto sɛɛle onutũ fɛ bakilo nkpe-afosi-anyɔ-banyɔ, 15 di akpooto ya ninkye ni asaa-bayatɛ ku asaa basunsũtɛ ku Arab batii baka ku kasɔ nwu abaa kanyabayilatɛ diesi ni kaamɛ.

16 Ɔka Solomon labla koto sɛɛle bɛɛbɛntɛ ni kubiafunsaa kplɛ alafa-anyɔ; kubidifunsaa biala lafũ fɛ koto sɛɛle bakilo bakuɔ. 17 Aabla kafɔɔ koto sɛɛle bɛɛbɛntɛ ni kubiafunsaa biibii alafa-atiɛ, di kubidifunsaa biala lafũ ni koto sɛɛle bakilo banyɔ. Ni di ɔka layɔ nya aalaatɛ di lɛba le bɔɔlɛɛ ni Lebanon Lepoo Lɛkayo kamɛ nɛ.

18 Ninfɛ di ɔka labla lɛkakpomii kplɛ ku bato anyɛɛ, aayɔ koto sɛɛle nwaa aakakaasa nɛ. 19 Lɛkakpomii nwu lawɛ nkatakɔ nkuɔ, kamaa nini kafɔɔ labla munumunu di osi. Di lekpomii nwu sɛlɔɔkɔ nwu nnyɔ yi, nnɛɛ ntikakɔ lawɛ, di kyata layila ni di kabiala ɔlɔɔkɔ. 20 Bakyata lefosi-banyɔ layila di nkatakɔ nkuɔ nwu disi le ku disi le. Badibla nninkpo okle bata sɛka kalekɔ bamba kukanwii diidii. 21 Koto sɛɛle baayɔ baabla Ɔka Solomon sipũ simuu, leyo kamɛ awansaa amuu di Lebanon Lepoo Lɛkayo nwu kamɛ kafɔɔ lale koto sɛɛle nwaa. Batayɔ koto fututu baabla lɛsalɛsaa, diekye baanyu alɛ koto fututu diedie lɛsalɛsaa di Solomon obe kamɛ. 22 Ɔka lawɛ seklo se niatɔɔkyɛ ni lekpo osi manaaya ni asaa ku Hiram seklo. Di alɛɛ atiɛ biala kamɛ seklo nwu nkple sinwa ninwii, batuka ni koto sɛɛle, koto fututu, bato anyɛɛ, bakuo ku basɛ̀.

23 Ɔka Solomon lawɛ lɛsaawɛ ku ninumbe aalenkee kasɔ ka mmle baka bule bamuu. 24 Kayi kamuu nkyɛ ɔka Solomon ɔkyɛ manaanu ninumbe le di Yaa lakpee ni di disi nɔɔ kamɛ. 25 Lɛlɛɛ biala otii biala niɛwa ɔkyɛ nɔɔ nwako nwɔ lɛkyɛsaa- asaa fɛ koto sɛɛle, koto fututu, akpeele, akpɛsaa, akɔnɔkɔnɔsaa, bapɔnkɔ ku babɔkɛɛ ba ninte ni fɛ pɔnkɔ.

26 Di Solomon lasiisa ni bakeke ba di bapɔnkɔ nnanfi ni ku bapɔnkɔ; aawɛ bakeke ba di bapɔnkɔ nnanfi ni kakpe alafa-ana ku bapɔnkɔ nkpe lefosi-nnyɔ, mma aayɔ aatɛ di bakeke okpoo kplɛ nwu ku Yerusalem kafɔɔ nɛ. 27 Ɔka nwu lata koto fututu labawɛ di Yerusalem fɛ afuɔ, sedar kafɔɔ labapɔ fɛ kowoso ko manlɛɛ ni sikamɔ-abue awoso di akpenkpe nkpaa. 28 Okyeko baakyeko Solomon bapɔnkɔ Egipte ku Kue kasɔ- ɔka asaa bayatɛ niaya nya baakyeko Kue kasɔ. 29 Manaaya keke wɔ di bapɔnkɔ nnanfi ni onwii di Egipte fɛ koto fututu bakilo bakuɛnsĩ okle, pɔnkɔ onwii kafɔɔ fɛle bakilo banyɔ okle. Mansunsũ ma kafɔɔ manta Heti batii ku Siria batii baka bamuu.