BAKA I 16

1 Ninfɛ di Saate nwu ɔlaa lawa kuata Hanani obisuɔtɔbi, Yehu di Baasa suoto alɛ: 2 "Latakatɛsa fɔ di kudù kamɛ, ni labla fɔ tunletɛ di batii nii Israel suoto nɛ. Kafɔɔ faakyɛ di Yeroboam sisuku suoto, ni faata batii nii Israel labla okpile, baakpee mi ɔblɔ ku sikpile lɛma nwu ɔbla. 3 Nioso nfɛ kamawɔɔsa Baasa ku leyo nɔɔ batii, kamabla leyo lɛfɔ kafɔɔ fɛle Nebat obisuɔtɔbi, Yeroboam lele okle. 4 Baweewee kamawee mba ninle ni Baasa bale beekpi ni di okpoo kplɛ nwu kamɛ. Bakansiɛ ba di kɔfɛɛfɔ kafɔɔ kamakyɔkyɔfɛ mba niekpi ni di lepoo kamɛ."

5 Di Baasa sɛka ole sɛsaabla bamba, n-ya aabla ni ku nse aafũ ni leyooto yi, bɛɛkpana nya di Israel baka sekofolaa kukũ kamɛ. 6 Ni di Baasa latɛ ɔnyɛɛ ku bate nɔɔ, ni baakookaa nwɔ di Tirsa nɛ. Ni di obisuɔtɔbi nɔɔ Ela layila nwɔ kaanya fɛ ɔka nɛ.

7 Diɛkyakaa nii, Saate nwu ɔlaa lawa kuafe di Hanani obisuɔtɔbi, Yaa ɔlaabuɛtɛtɛ Yehu suoto kuata Baasa ku leyo nɔɔ batii, ta akpilesaa ya amuu aabla ni di Saate nwu anu, aakpee nwɔ ni ɔblɔ ku asaa ya aabla nii, diabakple fɛle Yeroboam leyo batii- ta ku mmle kafɔɔ aawɔɔsa nini oso.

Israel Ɔka Ela

8 Di Yuda ɔka Asa alɛɛ afosi-anyɔ-dikuɔnle kamɛ, Baasa obisuɔtɔbi, Ela labale Israel ɔka, ni aale sɛka di Tirsa alɛɛ anyɔ nɛ.

9 Ni di ɔnɔɔfotii nɔɔ onwii, Simri wɔ niale ni bakpɛtɛ kanyayilatɛ aata ni bakeke nɔɔ ba di bapɔnkɔ nnanfi ni dikuu lakũ kanwumbe di suoto nɔɔ. Ela nnwɔɔ aawɛ di Tirsa di obe nwu kamɛ aatoosiɛ ni nta di Arsa leyo, osuɔtɔ wɔ niayila ni di lɛkayo onyu kanya di Tirsa. 10 Ni di Simri lalabuo Arsa leyo aasafɔ Ela aalo nwɔ aatɛ, di Yuda ɔka Asa alɛɛ afosi-anyɔ-dikuɛnsinle kamɛ nɛ. Ninfɛ aayila nwɔ kaanya fɛ ɔka nɛ.

11 Di Simri lasiɛ osiɛ di lɛkakpomii aakye ni sɛka ole kasɔ, ni aalo Baasa leyo kamɛ batii bamuu nɛ. Atabu bia osuɔtɔ onwii, kuntɛ ɔnantii ee siɛwo. 12 Nioso Simri lawɔɔsa Baasa leyo kamɛ batii bamuu, di mmle kanya di Saate nwu lakakatɛ ni di Baasa suoto aafenko ni di Yaa ɔlaabuɛtɛtɛ Yehu suoto- 13 ta sikpile se simuu di Baasa ku obisuɔtɔbi nɔɔ Ela labla ni, baata Israel kafɔɔ labla ni oso, baakpee ni Saate , Israel Yaa nwu ɔblɔ ta afiɔ lɛma nwu ninaa ni ɔnyɛɛ suoto oso.

14 Di Ela sɛka ole sɛsaabla bamba ku n-ya amuu aabla nii, bɛɛkpana nya di Israel baka sekofolaa kukũ kamɛ.

Israel Ɔka Simri

15 Di Yuda ɔka Asa alɛɛ afosi-anyɔ dikuɛsinle kamɛ yi, Simri lale sɛka di Tirsa ayi akuɛnsĩ. Ni di Israel bakpɛtɛ labasiɛ baakaako Filisti batii okpoo Gibeton nɛ. 16 Obe wɔ di Israel bakpɛtɛ ba di kasiɛkɔ nwu lanu alɛ Simri lakũ ni kanwumbe di ɔka suoto, aalo nwɔ nii, ni di dii nwu nkpo kale, baayɔ bakpɛtɛ kanyayilatɛ Omri baase ɔka di Israel batii bamuu suoto di kasiɛkɔ nwu ninfa nɛ. 17 Ninfɛ di Omri ku Israel batii ba bamuu niawɛ ni di ɔkyɛ nɔɔ ladie di Gibeton okpoo, ni baalaamana Tirsa okpoo kplɛ nwu baakyi nɛ. 18 Obe wɔ di Simri lanya alɛ batoofũ ni okpoo kplɛ nwu yi, ni aasifi lɛkayo katanikokɔ nwu kamɛ aalaakpee lɛkayo nwu ɔtɔ aakyisa suoto nɛ. Nioso aakpi, 19 ta sikpile se aabla ni oso. Aabla okpile di Saate nwu anu, aakyɛ di Yeroboam sisuku suoto, ku sikpile se aabla ni, aata Israel kafɔɔ labla nii.

20 Di Simri sɛka ole sɛsaabla bamba ku ɔtaka oyila nɔɔ wɔ aabla nii, bɛɛkpana nya di Israel baka sekofolaa kukũ kamɛ.

Israel Ɔka Omri

21 Ninfɛ di Israel batii lasɛ di akudi anyɔ nɛ; kakyɛ kanwii layila Ginat obisuɔtɔbi, Tibni kamaa alɛ ale ɔka, kakyɛ nyɔɔfa kafɔɔ layila Omri kamaa. 22 Kafɔɔ Omri batikankotɛ lawɛ osie baalenkee Ginat obisuɔtɔbi, Tibni bale. Nioso Tibni lakpi, ni di Omri labale ɔka nɛ.

23 Di Yuda ɔka Asa alɛɛ afosi-atiɛ-ninwii kamɛ yi, Omri labale Israel ɔka, ni aale sɛka alɛɛ lefosi-anyɔ nɛ, alɛɛ akuɔ nɔɔ di Tirsa. 24 Ni di Omri laya Samaria lekpenkpe di Semer ɔkyɛ ku koto fututu bakilo afosi-akuɛnsĩ nɛ. Ni aabudi okpoo kplɛ onwii di lekpenkpe nwu osi, aayɔ lekpenkpe nwu saate kofole Semer leyooto aatika nwu alɛ Samaria.

25 Kafɔɔ Omri labla nle niale ni okpile di Saate nwu anu, ni aabla okpile aalenkee mba bamuu niale nwɔ ni katũ nɛ. 26 Aakyɛ di Nabat obisuɔtɔbi, Yeroboam sisuku simuu ku sikpile nɔɔ se aata Israel labla ni kamɛ. Nkpo oso baakpee Saate , Israel Yaa nwu ɔblɔ ku afiɔ lɛma ya ninaa ni ɔnyɛɛ suoto. 27 Di Omri sɛka ole sɛsaabla bamba, n-ya aabla ni ku asaa ya suoto aafuo ni ɔbla suoto yi, bɛɛkpana nya di Israel baka sekofolaa kukũ kamɛ. 28 Ni di Omri latɛ ɔnyɛɛ ku bate nɔɔ, ni baakookaa nwɔ di Samaria nɛ. Ninfɛ di obisuɔtɔbi nɔɔ Ahab layila nwɔ kaanya fɛ ɔka nɛ.

Israel Ɔka Ahab

29 Di Yuda ɔka Asa alɛɛ afosi-atiɛ-lɛnɛnle kamɛ yi, Omri obisuɔtɔbi, Ahab labale Israel ɔka. Ni aale seka di Samaria di Israel suoto alɛɛ afosi-anyɔ-anyɔ nɛ. 30 Omri obisuɔtɔbi Ahab labla sikpile di Saate nwu anu aalenkee mba niale nwɔ ni katũ obiala. 31 Aanyu alɛ lɛsaa biibii lete diale alɛ aabla Nebat obisuɔtɔbi, Yeroboam sikpile nwu okle, kafɔɔ aayɔ kafɔɔ Sidon batii ɔka Etbaal obisankobi, Yesebel aayɔ, ni aakyekasɔ aatoosumu Baal nɛ. 32 Aapɛ oleɔta akyikye aata Baal di Baal olekatakɔ ka aatofo ni di Samaria. 33 Ahab kafɔɔ lase Asera owoso, ni aabla asaa kpinwu aayɔ aakpee Saate , Israel Yaa nwu ɔblɔ, alɛ ɔblɔ kufiɛ nwɔ kulenkee Israel baka bamuu ba niale nwɔ ni katũ nɛ.

34 Di Ahab obe kamɛ yi, Hiel wɔ niakye ni Betel lase Yeriko nwu letofo. Aase nwu ni lɛsɔse, obisuɔtɔbi nɔɔ kasale Abiram lakpi, aakpee ni n-yoko ninwu kafɔɔ yi, obisuɔtɔbi nɔɔ bisɔnle Segub lakpi, di ɔlaa wɔ kanya di Saate nwu labuɛ aafenko ni di Nun obisuɔtɔbi, Yosua suoto.