1 Solomon latofo lɛkayo nɔɔ, lefosi alɛɛ atiɛ diafũ fiɛ aaloo otofo. 2 Aatofo leyo nwu baatɔɔlɛɛ ni alɛ Lebanon Lepoo Lɛkayo, lɛkaana labla nkpaa kɔlafa-afosi-anɔɔ, lɛblɛfɛ labla nkpaa afosi-akuɛnsĩ-nnɔɔ, lɛtaka kafɔɔ labla nkpaa afosi-ana-nnɔɔ. Aase sedar sewoso akpaka ele ɛna di sedar sewoso bɛɛkyɛkyɛsa ni lasana nya ni di suoto. 3 Baaba leyo nwu ku seda di selenle se baasana ni di akpaka nwu osi, diabla selenle afosi-ana-ɛnɔɔ, lefosi-ɛnɔɔ di ole onwii suoto. 4 Di leyo nwu seyoyiɛ kakyɛka ku kayɛka, baakpee basɛfle takale batiɛ, batiɛ lakyɔɔ bawo anu. 5 Nyokontũ nwu mmuu sɛlɔɔkɔ sewoso lakaana sialenkee osi sele; siawɛ siitũ, di kakyɛ biala sele lɛbla ni etiɛ, etiɛ, siakyɔɔ ni bawo anu.

6 Aatofo lɛkpata bamba di lɛkaana nini labla ni nkpaa afosi-akuɛnsi-nnɔɔ, lɛblɛfɛ kafɔɔ labla nkpaa afosi-ana-nnɔɔ. Di leyo nwu anu, aabla kasiɛkɔ, aase akpaka, ni aaba ni aasakasa nɛ.

7 Aatofo kafɔɔ lɛkakpomii lɛkpata, baatɔɔlɛɛ ni Lɛkanko Lɛkpata, lɛba le abakanko ni batii, ni aatĩi seyoyiɛ nwu ku sedar ntaaboo, diayɔ ni kayesɔ dialaase ni di osi nɛ. 8 Di lɛkayo nwu, nfũ di Solomon kasiɛ nii, baatofo ni di sɛmaa fɛ nni nkpo okle. Solomon kafɔɔ latofo lɛkayo fɛle lɛkpata nwu okle aata Farao obisankobi wɔ aayɔ nii.

9 Ayo ya mmle nkpo amuu, diayɔ ni kaayi dialaase ni di kaflɔnkɔ kplɛ nwu, diayɔ kafɔɔ di ayo nwu lɛsɔse dialaadu ni sewoso ntikakɔ yi, afuɔ ya niafũ ni kɔya baawola ni di letembi okle onwii kanya, baayɔ afuɔ lewolasaa baakyɛkyɛsa ni kayi ku kamɛ, baayɔ baatofo. 10 Baase asɔse nwu ku afuɔ kplɛ biene nwaa, awo kanɛ lawo nkpaa lefosi-nnɔɔ, awo kafɔɔ kanɛ lawo nkpaa lefosi-nnyɔ. 11 Afuɔ ya niafũ ni kɔya baabudi kanya kanwii ku sedar sewoso latika di osi. 12 Baayɔ afuɔ ya baakyɛkyɛsa ni baatofo seyoyiɛ sitika sitiɛ baakyisa kaflɔnkɔ kplɛ nwu ku sedar sewoso baasiɛsiɛsa ni ditika ninwii, fɛ mmle diate ni di SAATE nwu olekatakɔ kamɛ kaamɛ kaflɔnkɔ nwu anu.

13 Ɔka Solomon lakpee batii baakyɛ Tiro baalaakpaa Hiram baawako, 14 nnwɔ ɔya niale ni kpisɔfɔ, aakye ni Naftali kɔna kamɛ, di ote lale ni Tiro otii, aale ni abɔɔsaa kpɛmblatɛ. Hiram lale otii wɔ niabe ni anu, aatɛ aatofo ni mmle man-yɔ abɔɔsaa mamblako ni asaa ate ate kpinwu. Ni aawa Ɔka Solomon nfũ aababla sɛkpɛ se simuu baatɔɔ ni nɛ.

15 Hiram labla abɔɔsaa akpaka anyɔ, dibiala lɛtaka lawo nkpaa afosi-anyɔ-nkuɛnsĩ, dibiala nimunumunu labla nkpaa nkuɛnsĩ ku dikuu, nse beekpee okũ. 16 Aabla kafɔɔ osi atikasaa anyɔ ku aabɔɔsaa aatika di abɔɔsaa akpaka nwu anyɔ osi. Osi atikasaa nwu anyɔ, dibiala lɛtaka labla nkpaa nkuɛnsĩ-anɛɛkpa-akuɔ. 17 Aaloso abɔɔsaa anyɛnɛ aasakasa di osi atikasaa nwu suoto di abɔɔsaa akpaka nwu suoto, aakpee anyɛnɛ akuɛnsĩ, di osi atikasaa nwu dibiala suoto. 18 Aabla awosobi ya ninte ni fɛ goowa ele ɛnyɔ aakpee lɛkpankyila di osi atikasaa nwu suoto di abɔɔsaa akpaka nwu osi aaloolaa ni. Aabla nkpo okle kafɔɔ di osi ditikasaa biala suoto. 19 Osi atikasaa di akpaka ya niayila ni di lɛkpata nwu kamɛ yi, aabla nya fɛ atoto letembi, lɛtaka lɛnya lawo nkpaa nkuɔ. 20 Di akpaka nwu anyɔ osi atikasaa suoto yi, nfũ niadie ni di kamunumunukɔ baakpee ni anyɛnɛ nwu yi, awosobi ya ninte ni fɛ goowa alafa-anyɔ lakpee ɛkaa diakyi nimuu. 21 Hiram layɔ akpaka nwu aase di olekatakɔ nwu kabuokɔ anu. Lɛkpaka le niayila ni di kala kasɔ lɛkyɛ, aatika ni leyooto alɛ Yakin,* nle kafɔɔ niayila ni di katoo kasɔ lɛkyɛ, aatika ni leyooto alɛ Boas.* 22 Baabla atoto letembi baatika di akpaka nwu osi. Nkpo oso akpaka nwu ɔkpɛ laloo.

23 Ninfɛ di Hiram layɔ lɛbɔɔsaa aabla bɛɛsi munumunu fɛle Lekpo, atokosi nimunumunu labla nkpaa lefosi-nnɔɔ, lekyofo labla nkpaa nkuɛnsĩ-anɛɛkpa-akuɔ, nse bɛɛklapoosa ni beekyi kafɔɔ, dibabla nkpaa afosi-ana-nnɔɔ. 24 Di bɛɛsi nwu atokosi kalɔ yi, baabla kukuiikuii baakyisa- di lefosi biala obo kɔkpaa kunwii late nii. Baabla kukuiikuii nwu ɛɛkaa ɛnyɔ diakaa di bɛɛsi nwu suoto.

25 Lekpo bɛɛsi nwu latika di banankyue-suɔtɔ lefosi-banyɔ suoto, batiɛ lakyɔɔ anu katoo kasɔ, batiɛ lakyɔɔ anu kufĩ kamɛɛkɔ, batiɛ lakyɔɔ anu kala kasɔ, batiɛ kafɔɔ lakyɔɔ anu kufĩ katunkɔ. Lekpo bɛɛsi nwu latika ma di suoto, akyeke lɛma kafɔɔ lawɛ kaamɛ. 26 Lekpo bɛɛsi nwu opĩ lawo anɛɛkpa atiɛ, atokosi nɔɔ kafɔɔ late fɛle opũ ku atoto ya niefukuti nii. Diaklee ntu bakpoko nkpe lefosi-onwii-alafa anɔɔ.

27 Hiram kafɔɔ labla abɔɔsaa sɛɛle atikasaa ya mankyisa ni lefosi, obiala lɛkaana labla nkpaa nkuɔ, lɛblɛfɛ nkpaa nkuɔ, lɛtaka kafɔɔ labla nkpaa nna ku dikuu. 28 Nnya mmle baabla ni bakeke nwu: Baakpee asaa blɛfɛɛ di sɛlɔɔkɔ baakpee sewoso kaamɛ. 29 Di asaa blɛfɛɛ nwu nkpo suoto yi, baawola nya baadiki bakyata, banankyue-suɔtɔ ku kerubim baatika di suoto. Di bakyata nwu ku banankyue nwu osi ku kalɔ yi, baawola atoto ɔkaa baadiki baatika. 30 Keke biala lawɛ abɔɔsaa nkpaa nna ku abɔɔsaa kplɛ anyɔ ninkle ni nkpaa nwu nna. Dibiala lawɛ lɛkpaayo latika ni di suoto di aba ana lamufũ diaklee nii. Baabla atoto ɔkaa baatika di dibiala suoto. 31 Di keke nwu nkpo kamɛ yi, baadiki sɛfle munumunu niatuunii diadie ni kɔkpaa kuniwii ku dikuu. Katikitikɔ nwu labla kyilankyila, di kalɔ nɔɔ kafɔɔ labla ni nkpaa nnyɔ ku dikuu. Di katikitikɔ nwu sɛlɔɔkɔ yi, baawola asaa baadiki baatika. Keke nwu atĩisaa asi nwu ana lakyɛkyɛ, ditate kyilankyila. 32 Nkpaa nna lasiɛ di nkpaa atĩisaa nwu kalɔ, nkpaa aklesaa nwu kafɔɔ laklee di keke nwu suoto. Kɔkpaa kunwii biala nimuɔ labla lɛklapoosaa nkpaa nnyɔ ku dikuu. 33 Baabla nkpaa nwu fɛle keke wɔ di pɔnkɔ nnanfi ni nkpaa; nkpaa nsiɛkɔ, nkpaa, nkpaa kɔbɔsɛɛ nkleekɔ ku nkyasakɔ, amuu abɔɔsaa baayɔ baabla.

34 Keke biala lawɛ nkleekɔ nna, kakyakɔ biala kakleekɔ lawɛ, kaayila kaadie ni di keke nwu suoto. 35 Di keke nwu osi yi, niniisaa kyilankyila lawɛ diawo ni anɛɛkpa anaasĩ lɛtaka. Amufũsaa nwu ku atĩisaa nwu laklee di keke nwu osi. 36 Aawola bakerubim, bakyata ku awɔsɔ aadiki aatika di mmufũkɔ nwu ku atĩisaa nwu suoto, kakɔ lele di obo late, atoto lamana amuu aakyi. 37 Osuku wɔ mmle suoto di Hiram lafe aabla bakeke lefosi nwu nɛ. Aabla bamuu di letembi ninwii kanya, bamuu ladie bawo di nimuɔ ku letembi kanya.

38 Ninfɛ di Hiram labla abɔɔsaa babɛɛsi lefosi, di obiala nkle ni ntu bakpoko alafa-anyɔ-afosi-anyɔ, di obiala lablɛfɛ ni fɛ nkpaa nkuɔ, ni aayɔ onwii, onwii aakaasa di bakeke lefosi nwu suoto nɛ. 39 Ni aayɔ bakeke nwu banɔɔ aase di olekatakɔ nwu kala kasɔ lɛkyɛ, aayɔ banɔɔ kafɔɔ aase di katoo kasɔ lɛkyɛ nɛ. Ninfɛ aayɔ Lekpo bɛɛsi nwu kafɔɔ aase di kala kasɔ lɛkyɛ di olekatakɔ nwu koletanɛɛkyɛ di kufĩ katunkɔ lɛkyɛ nɛ. 40 Hiram kafɔɔ labla abukii, basoofi ku babɛɛsi.

Nkpo di Hiram laloo sɛkpɛ nwu simuu aabla aata ni Ɔka Solomon di SAATE nwu olekatakɔ nwu kamɛ nɛ:

41 akpaka nwu anyɔ;

osi atikasaa anyɔ nwu aabla aatika ni di akpaka nwu anyɔ osi;

abɔɔsaa anyɛnɛ nwu anyɔ aasakasa ni di osi atikasaa nwu suoto di abɔɔsaa akpaka anyɔ nwu suoto;

42 awosobi ya ninte ni fɛ goowa alafa-ana (ele ɛnyɔ nwu aakpee ni lɛkpankyila di osi atikasaa nwu suoto di abɔɔsaa lɛkpaka nwu osi aaloolaa nii);

43 bakeke lefosi nwu ku babɛɛsi lefosi lɛma nwu;

44 Lekpo bɛɛsi nwu ku banankyue lefosi-banyɔ nwu kaalɔ nini;

45 abukii, basoofi ku babɛɛsi nwu.

Asaa ya mmle amuu di Hiram labla aata ni Ɔka Solomon di SAATE nwu olekatakɔ kamɛ yi, abɔɔsa biene kamɛ baabla nya baakyeko. 46 Ɔka nwu lata baabla nya baakyeko kɔtɛ atembi ya baabla ni kamɛ di Yordan ɔtaata di Sukot ku Saretan obo. 47 Solomon ditata baaklaapoosa abɔɔsaa nwu, diekye aatɛ aapɔ; nioso batatofo abɔɔsaa nwu onutũ.

48 Solomon kafɔɔ labla asaa ya niayila ni di SAATE nwu olekatakɔ nwu kamɛ:

koto sɛɛle oleɔta akyikye;

koto sɛɛle opunu wɔ suoto di bloblo wɔ di SAATE nwu Anu, ntika ni;

49 koto sɛɛle nwaa kandiɛ atikasaa kowesee nwu (kɔnɔɔ di oletanɛɛkyɛ, kɔnɔɔ kafɔɔ di ɔmɛntunɛɛkyɛ, di kamɛ, kaamɛ kakleklekɔ nwu sitũ);

koto sɛɛle atoto ɔkpɛ nwu ku bakandiɛ ku kɔmaasa;

50 koto sɛɛle nwaa babɛɛsi, kandiɛ sikũ, abukii, nsɛfɛ ku olufui afiɛsaa;

ku koto sɛɛle amufũsaa diɛta ni akloo di kamɛ kaamɛ leyo nwu, Kakleklekɔ kaamɛ Kakleklekɔ nwu ku olekatakɔ lɛkpata nwu nimu akloo.

51 Obe wɔ di ɔkpɛ wɔ omuu di Ɔka Solomon labla ni di SAATE nwu olekatakɔ laloo ni yi, ni aayɔ asaa ya amuu di ote Dawid lakleklesa ni- niale ni koto fututu ku koto sɛɛle ku akpɛnsaa, aabase di SAATE nwu olekatakɔ asaa katɛkɔ nɛ.