1 Solomon lanii kanya ku Egipte ɔka Farao, ni aayɔ obisankobi nɔɔ nɛ. Ni aakpaa nwɔ aawako Dawid Okpoo kplɛ nwu dialaase di obe wɔ aaloo ni lɛkayo nɔɔ ku SAATE nwu olekatakɔ ku oyoyiɛ otofo okyisa Yerusalem nɛ. 2 Di obe nwu nkpo kamɛ yi, batii nwu lakple baatɔɔta oleɔta di ntakalekɔ nwu, diekye baditofo olekatakɔ bata SAATE nwu Leyooto. 3 Solomon ladiki lɛbɔmbɔ nɔɔ aatuo SAATE nwu, aakyɛ di ote Dawid afiofa kanya, diediki alɛ aata oleɔta ku olufui ofiɛ di ntakalekɔ nwu.

4 Ni di ɔka nwu lakyɛ Gibeon alɛ ɔɔlaata oleɔta ninfa, diekye nfa niale katakalekɔ finle nɛ. Ninfɛ di Solomon lata ofiɛ asaaɔta kakpe di oleɔta akyikye nwu suoto nɛ. 5 Di Gibeon yi, SAATE nwu ladiki suoto aatuo Solomon kakyɛ nwu di kɔlaafɔ kamɛ, ni di Yaa labuɛ alɛ, "Kaalɛ mi lɛsaa lele foomiɛ falɛ nta fɔ."

6 Ninfɛ di Solomon ladiki kanya alɛ, "Fatootuo teemi, kpɛmblatɛ lɛfɔ Dawid sifutulɛ kplɛ, diekye aale onukwale aata fɔ, aate tinini, aakpa kafɔɔ di otu kamɛ. Ni feekple fɛɛkyɛ sitũ feediki sifutulɛ kplɛ se mmle feetuo nwɔ, ni fɛɛtɔɔ obisuɔtɔbi asi di lɛkakpomii nɔɔ suoto miɛ dii le mmle nɛ.

7 "Oo SAATE Yaa nii, nunua, fatɔɔyɔ kpɛmblatɛ lɛfɔ feese ɔka di teemi Dawid kanya. Kafɔɔ obisɔ biibii ko nle, nin-ye mmle kafɔɔ kabla ni sɛkpɛ nii nfenko nii. 8 Kpɛmblatɛ lɛfɔ nsi di batii lɛfɔ ba feediki ni kamɛ ninfũ, kale kplɛ, beesii ni ɔpɔ, manamafuo ma ni ɔka ee batɛ ma ni nsũ. 9 Nkpo oso ta kpɛmblatɛ lɛfɔ lɛsaatofo otu kayɔ nkpa ni batii lɛfɔ, ntofo ni dibiene ku lɛlalaale. Diekye owe nikamafuo kale kplɛ batii lɛfɔ ba mmle ɔkpa?"

10 Suoto layɔɔ SAATE nwu alɛ Solomon lakaalɛ lɛsaa le mmle. 11 Nioso Yaa latɔkɔ nwɔ alɛ, "Di obe wɔ fɛɛkaalɛ ni lɛsaa le mmle oso, ninanle ni nkpa kaanale ee lɛsaawɛ fata ni suoto ee fakaalɛ ni kukpi fata ni balo lɛfɔ, kafɔɔ fɛɛkaalɛ ni ninumbe alɛ faaka ni lɛka tinini yi, 12 kamabla lɛsaa le fɛɛkaalɛ ni nta fɔ. Kamata fɔ ninumbe ku lɛsaatofo otu, di mmle di otii kuonwii diiwɛ nini diidii fɛle afɔ okle, ee otii kuonwii kafɔɔ dilɔbawɛ ni diidii. 13 Diɛkyakaa nii, kamata fɔ lɛsaa le fanankaalɛ nii, lɛsaawɛ ku dibu, akyuu nwu anyɔ-alɛ di nkpa lɛfɔ kamɛ, ɔka kuonwii dilɔbawɛ abakyɛkyɛ ni ku afɔ. 14 Nse fɛɛkyɛ di sisuku nii suoto, feeklee ɔsaabla nii, feele kafɔɔ afiofa nii fɛ mmle di teefɔ Dawid labla ni yi, kamata fɔ nkpa kaanale." 15 Ninfɛ di Solomon lasɛnkɛ nɛ- ni aatofo alɛ kɔlaafɔ kule aasɛ.

Ni aakple aasifi Yerusalem, aalaayila di SAATE nwu kanya ninnii lɛlakaa anu, aata ofiɛ asaaɔta ole ku atoko ɔkyɛ ole asaaɔta nɛ. Nni kamaa, aatũ opunu aata banɔɔfotii nɔɔ bamuu.

16 Dii ninwii, basanko-basɔnɔkpeetɛ banyɔ bawĩi lakyɛ baalaayila di ɔka anu. 17 Ninfɛ di onwii lɛma labuɛ alɛ, "Saate nii, ami ku ɔsanko wɔ mmle ninsi di leyo ninwii kamɛ. Ami ku nnwɔɔ niawɛ ninfa fiɛ lalofo obi. 18 Lalofo obi nii laloo nii, dii tiɛfa suoto, ɔsanko wɔ mmle kafɔɔ lalofo obi. Lete loo niawɛ; kuonwii ditawɛ di leyo nwu kamɛ, kafɔɔ batii loo banyɔ lete.

19 "Kakyɛ nwu yi, ɔsanko wɔ mmle obisuɔtɔbi lakpi, diekye aate nwɔ di suoto. 20 Nioso aataka di nkyɛntɛɛ, aaklee obisuɔtɔbi nii aayɔ di ɔlɔɔkɔ nii, di obe wɔ di ami kpɛmblatɛ lɛfɔ late latɔɔkyɔsĩi nii. Ni aayɔ obisuɔtɔbi nwu aalaatɛ di lɛnyɛɛ nɔɔ ɔlɔɔkɔ, ni aayɔ obisuɔtɔbi nɔɔ nwu nintookpi ni kafɔɔ aabatɛ di lɛnyɛɛ nii ɔlɔɔkɔ nɛ. 21 Koleesɛ kuyitatũ, lataka nlɛ kɔta obisuɔtɔbi nii nnyɛɛfu- ni lanya nlɛ atookpi nɛ! Kafɔɔ obe wɔ lalolaa nwɔ lanyu ni di kale ntɔɔkpa ni ku olesɛ yi, lanya nlɛ diele obisuɔtɔbi wɔ lalofo ni diale."

22 Ninfɛ di ɔsanko nyɔɔfa nwu labuɛ alɛ, "Kpawoo! Nnwɔ ninkpe ni nkpa ninle obisuɔtɔbi nii; nnwɔ niekpi ni ninle ole fɔ nɛ."

Kafɔɔ ɔsanko kasale labensa kanya alɛ, "Kpawoo! Nnwɔ nintookpi ni ninle fɔ ole; nnwɔ ninkpe ni nkpa ninle mi ole." Nioso baananfi nwu di ɔka anu.

23 Ninfɛ di ɔka nwu labuɛ alɛ, "Nnwɔ mmle kobuɛ alɛ, ‘Obisuɔtɔbi nii ninkpe nkpa nɛ, ni ole fɔ niekpi nɛ,’ nnwɔ kafɔɔ kobuɛ alɛ, ‘Kpawoo! Obisuɔtɔbi lɛfɔ niekpi nɛ, ole mi ninkpe nkpa nɛ.’ "

24 Ninfɛ di ɔka labuɛ alɛ, "Biwakoe kapamii." Nioso baawoko ɔka nwu kapamii. 25 Ninfɛ aadiki kanya alɛ, "Biblasa obisɔ nwu ninkpe ni nkpa di akyuu anyɔ, biɛyɔ kakyɛ bita onwii, biɛyɔ kakyɛ nyɔɔfa bita ɔnyɔɔfa."

26 Nioso kafutu lanyinyi ɔsanko wɔ di obisuɔtɔbi nɔɔ lawɛ ni nkpa aata obisuɔtɔbi nɔɔ, ni aabuɛ aatɔkɔ ɔka alɛ, "Saate nii, lekoto, yɔ obifɔɔle nwu ninkpe ni nkpa fatɔɔ! Tanlo nwɔ!"

Kafɔɔ ɔsanko nwu nyɔɔfa labuɛ alɛ, "Kuonwii loo dilɔbawɛ obi nwu. Blasa nwɔ di akyuu anyɔ!"

27 Ninfɛ di ɔka ladiki lɛbɛ ku lɛpɔɔ aabuɛ alɛ, "Biyɔ obifɔɔle nwu ninkpe ni nkpa bita ɔsanko nwu kasale. Bitanlo nwɔ; nnwɔɔ ninle obi nwu ɔya nɛ."

28 Obe wɔ di Israel batii bamuu lanu ni mmle di ɔka nwu ladiki ni lɛbɛ ku lɛpɔɔ yi, baayɔ dibu baata ɔka nwu, diekye baanya alɛ akpe ninumbe le niekye ni Yaa nfũ, ɔɔyɔ anka ni aka tinini.