1 Di alɛɛ alafa-ana-afosi-anɛ sɛmaa di Israel batii ladie ni di Egipte, di Solomon lɛlɛɛ naafa di sɛka ole kamɛ di Israel batii suoto yi, di Siw kɔwɛntɛ kamɛ, ninle ni kɔwɛntɛ nyɔɔfa di Israel batii awɛntɛ kanya yi, ni aakyekasɔ aatootofo SAATE nwu olekatakɔ nwu nɛ.

2 Olekatakɔ ka di Ɔka Solomon latofo aata ni SAATE nwu lɛkaana labla nkpaa afosi-anaasĩ, lɛblɛfɛ labla nkpaa afosi-atiɛ, lɛtaka kafɔɔ labla nkpaa afosi-ana-nnɔɔ. 3 Fiɛ bababuo ni olekatakɔ nwu kamu kamɛ, sitũ nɔɔ lɛkpata lɛkaana labla nkpaa lefosi-nnɔɔ, lɛblɛfɛ kafɔɔ labla nkpaa afosi-atiɛ, diɛblɛfɛ diɛkyɛkyɛ ku olekatakɔ nwu sitũ. 4 Akpee basɛfle maamaa di olekatakɔ nwu, basɛfle nwu lamaamaa di kayi lɛkyɛ baalenke kamɛ. 5 Di leyo nwu nkpo kakyɛ ka ku kakyɛ ka ku leyo nwu disi seyoyiɛ yi, aatofo ayo aakyisa sĩ, di koyoee lasisiɛ ni kaamɛ. 6 Ayo nwu labla sitika sitiɛ. Kasɔ leyo nwu lɛblɛfɛ labla nkpaa nkuɛnsĩ-anɛɛkpa-akuɔ, ntɛɛ lele labla nkpaa nnaasĩ, ni di osi lele kafɔɔ lɛblɛfɛ labla nkpaa lefosi ku dikuu nɛ. Olekatakɔ nwu osi seyoyiɛ labiibii sialenkee ntɛɛntɛɛ seyoyiɛ, nkpo kafɔɔ di ntɛɛntɛɛ seyoyiɛ labiibii sialenkee kalɔ ditika kasale nɛ. Nle oso baabla ni nkpo ninle alɛ ayo nwu kafuo oyila di kalɔ seyoyiɛ suoto, mmle dinamafĩ alɛ baayɔ sewoso mansũ sĩ nii.

7 Di obe wɔ baatootofo ni olekatakɔ nwu yi, afuɔ ya baawola baasiɛsiɛsa ni di afuɔ kabiɛkɔ nwu baablako ɔkpɛ, nkpo oso batanu ɔmankyĩ ee kafɛ ee lɛbɔɔsaa lɛkpɛmblasaa bamba kuninwii sɛlɔ di olekatakɔ nwu ɔlɔɔkɔ di obe wɔ baatootofo ni nii.

8 Kayokontũ ka manfe mambuo ni kalɔ leyo nwu lawɛ di olekatakɔ nwu kala kasɔ lɛkyɛ; nkatakɔ lawɛ diasifi ntɛɛ lele kamɛ, diayɔ ninfa kafɔɔ diasifi ditika tiɛfa kamɛ. 9 Nioso Solomon latofo olekatakɔ nwu aaloo, ninfɛ aaba ni ku sewoso ku sedar selenle nɛ. 10 Ninfɛ aatofo ayo aatika baawo aakyisa olekatakɔ nwu nɛ. Ayo nwu dibiala lɛtaka lawo nkpaa nkuɛnsĩ-anɛɛkpa-akuɔ. Baatofo nya baakaasa di olekatakɔ nwu ku sedar sewoso.

11 Ninfɛ di SAATE nwu ɔlaa lawa kuata Solomon alɛ: 12 "Di olekatakɔ ka mmle footofo nii, nse feetikanko sɛsaabla nii, fɛɛkyɛ di sisuku nii suoto, fɛɛbla kafɔɔ di afiofa nii amuu kanya yi, ni ntam be laka lata ni teefɔ Dawid yi, kamabla mi nfenko di suoto lɛfɔ. 13 Ni kamasiɛ di Israel batii kamɛ, namadiɛ kafɔɔ batii nii Israel ntɛ."

14 Nioso Solomon laloo olekatakɔ nwu otofo.

15 Ninfɛ di Solomon layɔ sedar ntaaboo aapɛ aakaasa di kamɛ seyoyiɛ nwu, aapɛ mi aakyeko olekatakɔ nwu kayesɔ aalaase di osi selenle suoto. Ni aatĩtĩi olekatakɔ nwu kayesɔ kafɔɔ ku odum ntaaboo nɛ. 16 Di olekatakɔ nwu kamɛ di sɛmaa lɛkyɛ yi, aatofo kamɛ leyo le bɔɔlɛɛ ni Kakleklekɔ kaamɛ Kakleklekɔ. Lɛkaana nini labla nkpaa afosi-atiɛ. Ninfɛ aayɔ sedar ntaaboo aakaasa di leyo nwu seyoyiɛ diayɔ ni di kayesɔ dialaadu ni osi selenle nɛ. 17 Lɛkpata nwu di leyo le mmle anu lɛkaana labla nkpaa afosi-akuɔ. 18 Di olekatakɔ nwu kamɛ, sedar ntaaboo baawola baadiki kukuiikuii ku atoto ya nikofukuti nii baatika. Lɛsaa biala ninfa latĩi ku sedar ntaaboo; alɛ flaanya difuɔ kuninwii di seyoyiɛ nwu.

19 Aalolaa kamɛ kaamɛ kakleklekɔ nwu di olekatakɔ nwu kamɛ alɛ aayɔ SAATE nwu kanya ninii lɛlakaa nwu anse ninfa. 20 Kamɛ, kaamɛ kakleklekɔ nwu lɛkaana labla nkpaa afosi-atiɛ, lɛblɛfɛ kafɔɔ labla nkpaa afosi-atiɛ, lɛtaka kafɔɔ labla nkpaa afosi-atiɛ. Aayɔ koto sɛɛle nwaa aakakaasa ni kaamɛ, ni aayɔ sedar ntaaboo kafɔɔ aakakaasa di oleɔta akyikye nwu suoto nɛ. 21 Solomon layɔ koto sɛɛle nwaa aatĩi olekatakɔ nwu kamɛ, ninfɛ aakpee koto sɛɛle anyɛnɛ aabudi kamɛ kaamɛ kakleklekɔ nwu anu, n-ya aayɔ koto sɛɛle aatĩi ni nɛ. 22 Nioso aatĩi kamɛ nwu kamuu ku koto sɛɛle. Aayɔ kafɔɔ koto sɛɛle aatĩi oleɔta akyikye nwu niayila ni di kamɛ kaamɛ kakleklekɔ nwu.

23 Di kamɛ kaamɛ kakleklekɔ nwu yi, aayɔ nnɔnyi owoso aawola bakerubim banyɔ, onwii lɛtaka lawo nkpaa lefosi-nnɔɔ. 24 Kerub kasale kofoko kunwii lɛkaana lawo nkpaa nkuɛnsĩ-anɛɛkpa-akuɔ, kɔnyɔɔfa kafɔɔ lɛkaana lawo nkpaa nkuɛnsĩ-anɛɛkpa-akuɔ. Nkpo oso afoko nwu anyɔ, diadie ni di disi ninwii dialaase ni di disi nyɔɔfa labla nkpaa lefosi-nnɔɔ. 25 Kerub nyɔɔfa nwu kafɔɔ lɛtaka lawo nkpaa lefosi-nnɔɔ, bakerubim nwu banyɔ ladie bawo di nimuɔ ku letembi kamɛ. 26 Kerub biala lɛtaka lawo nkpaa lefosi-nnɔɔ. 27 Ninfɛ aayɔ bakerubim nwu nkpo aase di kamɛ kaamɛ leyo nwu di olekatakɔ nwu kamɛ, ni baablɛfɛsa afoko lɛma nɛ. Kerub onwii kofoko lasũ di oyoyiɛ onwii, di obe wɔ di ɔnyɔɔfa kofoko kafɔɔ lasũ ni di oyoyiɛ bamba suoto. Ninfɛ di afoko lɛma nwu lasũ baawo di leyo nwu nkpo ntɛɛntɛɛ nɛ. 28 Ninfɛ aayɔ koto sɛɛle aakakaasa di bakerubim nwu suoto nɛ.

29 Di seyoyiɛ simuu se niamana siakyi ni olekatakɔ nwu yi, di kayi ku kamɛ koyoe suoto yi, aawola kerubim awɔsɔ ku atoto ya nikofukuti ni aatika. 30 Aatĩi kafɔɔ olekatakɔ nwu kayi ku kamɛ koyoe n-yosɔ ku koto sɛɛle. 31 Di kamɛ kaamɛ kakleklekɔ nwu kayoko yi, aayɔ nnɔnyi sewoso aabla akoloo, osi lɛkyɛ labla nkyakɔ nnɔɔ. 32 Ninfɛ aawola kerubim, awɔsɔ ku atoto ya ninkofukuti ni aatika di nnɔnyi sewoso n-yoko nwu nnyɔ suoto, ni aayɔ koto sɛɛle aakakaasa di kerubim nwu ku awɔsɔ nwu nɛ. 33 Nkpo kanya kafɔɔ aayɔ nnɔnyi sewoso aabla nkyakɔ nna kayoko aata lɛkpata kplɛ nwu kabuokɔ nɛ. 34 Aabla kafɔɔ odum akloo anyɔ, kabiala akloo anyɔ nka baawo, manfuo ni ofee otika baawo. 35 Aawola bakerubim, awɔsɔ ku atoto ya niefukuti ni aatika nya di suoto, aayɔ koto sɛɛle bɛɛbɛntɛ ni kyɛkyɛ aakakaasa nya di suoto aatĩi awolansaa nwu.

36 Ninfɛ aatofo kamɛ nwu kaflɔnkɔ kɔba nɛ. Aayɔ afuɔ bɛɛkyɛkyɛsa ni aatɛ asɔse atiɛ, ni aayɔ sedar sewoso aase nya di suoto nɛ.

37 Baase SAATE nwu olekatakɔ lɛsɔse di lɛlɛɛ naafa kamɛ di Siw kɔwɛntɛ kamɛ. 38 Di lefosi lɛlɛɛ ninwii kamɛ di Bul kɔwɛntɛ kamɛ, dile ni kɔwɛntɛ nɛnle di Israel batii awɛntɛ kanya, baaloo olekatakɔ nwu niimu otofo, di mmle okle baatɛ alɛ dite ni kanya. Aayɔ alɛɛ akuɛnsĩ aatofo ni.