1 Ninfɛ di Ahab latɔkɔ Yesebel lɛsaa biala le di Elia labla ni ku mmle aalo ni Baal ɔlaababuɛtɛtɛ nwu bamuu ku kapamii nɛ. 2 Nioso Yesebel lakpee tɔkyɛntɛ di Elia nfũ alɛ, "Bayaa nwu bananfi mi kootoko, bia ditɛ diwɛ osie nwaa, nse kɔsɛɛ nuakpa okle nimbla nkpa lɛfɔ dite fɛle onwii lɛma nle okle."

3 Elia layɛkɛ, ni aatoso aafũ nkpa nɔɔ nɛ. Obe wɔ aadu ni Beerseba di Yuda, aadiɛ kpɛmblatɛ nɔɔ ninfa. 4 Kafɔɔ nnwɔɔ omu aakyɛ dii kufĩ osuku aasifi ɔfaafuu. Ni aakyɛ aalaasiɛ di lɛkambe kowoso kunwii oyududu kalɔ, aapɛ ɔlaa alɛ akpi nɛ. Aabuɛ alɛ, "Saate , ntɔɔnya kayi lɛpɔɔsa, diki mi ninwua; ninlɛ nlenke bawa nii." 5 Ninfɛ aaklɛ aate di kowoso nwu kalɔ, aakyɔsĩi nɛ.

Nfanwu ni di Yaa tɔkyɛntɛ onwii lakpanko nwɔ aabuɛ alɛ, "Taka faale alesaa." 6 Ni aanyunyu aakyiko, ni aanya bloblo dikudi beefiɛ ni di atɔkɔnii kpankpa suoto ku ntu dikuuku di disi nɔɔ ɔlɔɔkɔ nɛ. Ni aale, aanyi, ni aakple aaklɛ aate nɛ.

7 Saate nwu tɔkyɛntɛ lakple aawa lɛnyɔɔfa aabaakpanko nwɔ aabuɛ alɛ, "Taka faale alesaa, diekye osuku nwu leloolo fɔ ku ɔkyɛ." 8 Nioso aataka aale, aanyi. Alesaa nwu lakpee nwɔ osie, aakyɛ ayi afosi-ana ku nkyɛ afoso-ana dialaase di obe wɔ aadu ni Horeb, Yaa kobokote nwu. 9 Nfa aalaabuo di ofuɔntuu onwii kamɛ aalaate ku kakyɛ nwu nɛ.

Ninfɛ di Saate nwu ɔlaa lawa kuata Elia alɛ, "Elia, obe fɔɔbla ninfũ?"

10 Ni aadiki kanya alɛ, "Latɛ lawɛ okyiini lata Saate Wɔ Ninlenke nii. Israel batii ntoosĩ kanya ninii lɛfɔ nwu, beebibiɛ oleɔta akyikye lɛfɔ nwu, beelo Yaa ɔlaa babuɛtɛtɛ lɛfɔ nwu ku kapamii. Lete nii niebu, kafɔɔ nunua boomiɛ alɛ balo ami kafɔɔ."

11 Ni di Saate nwu latɔkɔ Elia alɛ, "Die faalaayila di kobokote nwu di Saate nwu anu. Diekye Saate nwu nfɛ komiɛ alɛ abafe."

Ninfɛ di afɛɛfɔ kplɛ ku osie labɛbɛɛ abokote nwu, aabibiɛ afuɔnkpaa nwu di Saate nwu anu. Kafɔɔ Saate nwu ditasiɛ di afɛɛfɔ nwu kamɛ. Di afɛɛfɔ nwu sɛmaa, kasɔ latũkũ, kafɔɔ Saate nwu ditasiɛ di kasɔ otũkũ nwu kamɛ. 12 Di kasɔ otũkũ nwu sɛmaa, ɔtɔ niawa, kafɔɔ Saate nwu ditasiɛ di ɔtɔ nwu kamɛ. Ni di ɔtɔ nwu kamaa, sɛwɛɛwɛɛ buɛɛ niawa. 13 Obe wɔ di Elia lanu ni sɛlɔ nwu, ni aananfi aakpeele nɔɔ aatĩi anu nɔɔ, ni aadie aalaayila di ofuɔntuu nwu kanya nɛ.

Ni di sɛlɔ sinwii lakaalɛ nwɔ alɛ, "Elia, obe fɔɔbla ninfũ?"

14 Ni aadiki kanya alɛ, "Latɛ lawɛ okyiini lata Saate Wɔ Ninlenke nii. Israel batii ntoosĩ kanya ninii lɛfɔ nwu, beebibiɛ oleɔta akyikye lɛfɔ nwu, beelo Yaa ɔlaa babuɛtɛtɛ lɛfɔ nwu ku kapamii. Lete nii niebu, kafɔɔ nunua boomiɛ alɛ balo ami kafɔɔ."

15 Ni di Saate nwu latɔkɔ nwɔ alɛ, "Kple fafe di osuku wɔ faafe faawa ni, faasifi Damasko Ɔfaafuu. Nse feedu nfa, faapɛ Hasael ɔfɔɔ fɛ ɔka fata Siria. 16 Faapɛ kafɔɔ Nimsi obisuɔtɔbi, Yehu ɔfɔɔ fɛ ɔka fata Israel. Faapɛ kafɔɔ Safat wɔ niekye ni Abel Mehola obisuɔtɔbi, Elisa ɔfɔɔ, aayila fɔ kamaa fɛ Yaa ɔlaabuɛtɛtɛ. 17 Yehu kamalo olele nietoso Hasael kapamii, Elisa kafɔɔ kamalo olele nietoso Yehu kapamii. 18 Kafɔɔ lebu batii nkpe nkuɛnsĩ di Israel- mba bamuu akunkyi ninadiwakasɔ bata ni Baal, ku mba bamuu nnya ninadifĩfiɔ nwɔ ni akpoo."

19 Nioso Elia ladie ninfa aakyɛ aalaanya Safat obisuɔtɔbi, Elisa. Aatoofuu kasɔ ku banankyue lefosi-banyɔ baapɛ ni akpo siimu. Ni di nnwɔɔ omu aatɔɔka mba baapɛ ni akpo banyɔ baakaasa ni baawo lefosi-ɔnyɔɔfa nɛ. Ninfɛ di Elia lakata aakyɛ ɔkyɛ nɔɔ, ni aafuki akpeele nɔɔ aatika di Elisa suoto nɛ. 20 Ni di Elisa ladiɛ banankyue nɔɔ, aatoso aatikanko Elia aabuɛ alɛ, "Tɛɛ nnaafĩfiɔ teemi ku yaami akpoo ninkla ma fiɛ nfɛ nin-wa nimatikanko fɔ."

Ni di Elia ladiki kanya alɛ, "Obe lɛbla fɔ, kple fatɔɔkyɛ."

21 Nioso Elisa ladiɛ nwɔ aakple aasifi. Ni aamufũ banankyue nɔɔ nwu aapɛ ni akpo siimu aalo nɛ. Aafiɛ kasɔ akpɛnsaa nwu aawa sina nwu aata batii lawee. Ninfɛ di Elisa ladie aatikanko Elia, ni aabakple kpɛmblatɛ nɔɔ nɛ.