1 Obe wɔ di Solomon laloo ni SAATE nwu olekatakɔ ku lɛkayo otofo, aafuo ni kafɔɔ asaa ya aatɛ ni ɔbla amuu ɔbla yi, 2 SAATE nwu lakple aadiki suoto nɔɔ aatuo nwɔ lɛnyɔɔfa fɛ mmle aadiki suoto aatuo nwɔ ni di Gibeon. 3 Ni di SAATE nwu latɔkɔ nwɔ alɛ:

"Ntoonu ɔlaa ɔpɛ ku lekoto otikiti lɛfɔ le fatɔɔtɛ ni di anu nii; ntookleklesa olekatakɔ ka mmle feetofo ni, fɛɛyɔ Leyooto nii feetika ni ninfa dinaa ni kaloo. Anu nii ku otu nii kamatika ninfa obe lele.

4 "Afɔ yi, nse fɛɛkyɛ di anu nii di otu wɔ niɛkpa, kuosiɛko ni kamɛ, fɛ mmle di teefɔ Dawid labla nii, fɛɛbla di n-ya lebuɛ ni kanya, fɛɛkyɛ di sisuku nii, feele afiofa nii yi, 5 ni kamase lɛkakpomii lɛfɔ nwu di Israel suoto dinaa ni kaloo, fɛ mmle laka ntam lata ni teefɔ Dawid, labuɛ ni nlɛ, ‘Obe lele otii kamasiɛ di Israel lɛkakpomii suoto.’ 

6 "Kafɔɔ nse aye ee babisuɔtɔbi lee lekyi kamaa di suoto nii, mananle afiofa nii, bakyɛ di sisuku nii, kafɔɔ beesifi bɛɛlaatɔ bayaa bamba beesumu ma yi, 7 ni kamabudi Israel ndiki di kasɔ ka lɛta ma ni suoto, ni kamasĩ kafɔɔ olekatakɔ ka mmle lekleklesa lɛta ni Leyooto nii. Ni Israel kafɔɔ kamakple okyonsanu ku lɛmansaa di batii bamuu kamɛ. 8 Nu di kanunua olekatakɔ ka mmle kobuo anu yi, dibabla batii ba bamuu nimafe ni ninfa ɔkpɛ, mamma mambuɛ alɛ, ‘Obe oso di SAATE nwu lɛbla lɛsaa le mmle okle di kasɔ ka mmle ku olekatakɔ ka mmle suoto nkpo?’  9 Nse batii ntoobuɛ alɛ, ‘Ta batoosĩ ni SAATE, Yaa lɛma wɔ niakpaa ni bate lɛma aadieko ni di Egipte kasɔ, bɛɛkyɛ bakle bayaa bamba bɔɔtɔ, mansumu ma- nkpo oso di SAATE nwu ntɔɔta sɛlaa kpile se mmle simuu lɛwa ma di suoto nɛ.’ "

10 Di alɛɛ afosi-anyɔ kayɛntɛkɔ ya kamɛ di Solomon latofo ni ayo ya mmle nwu anyɔ- SAATE nwu olekatakɔ ku lɛkayo yi- 11 ninfɛ di Ɔka Solomon layɔ ekpoo afosi-anyɔ di Galilea kasɔ aata Tiro ɔka Hiram nɛ, diekye Hiram latɔɔ sedar ku odum sewoso simuu ku koto sɛɛle kumuu aatoomiɛ nii. 12 Kafɔɔ di Hiram ladie ni di Tiro alɛ ɔɔlaanyu ni sekpoo se di Solomon latɔɔ nii yi, suoto ditayɔɔ nwɔ ku sekpoo nwu. 13 Ni aakaalɛ Solomon alɛ, "Obiloo, sɛmɛn- kpoo ninle nse mmle fɛɛtɛɛ ni nɛ?" Ni aalɛɛ sĩ alɛ Kabul Kasɔ nɛ, leyooto le baatika sĩ diabadu dii le baakpana ni sɛlaa se mmle. 14 Ninfɛ di Hiram lakyɛnko ɔka Solomon koto sɛɛle ko nialenkee ni bakilo nkpe nna nɛ.

15 N-ya mmle ninle sɛkpɛ sienle se di Ɔka Solomon layɔ aatikika ni di batii suoto aayɔ aatofo ni SAATE nwu olekatakɔ, lɛkayo nɔɔ nimu, seyoyiɛ se niayila siasũ ni nii ku seyoyiɛ se di Yerusalem ku Hasor, Megido ku Geser nɛ. 16 (Farao, Egipte ɔka lakpɛko Geser okpoo aafũ nwu. Aakpee nwu ɔtɔ. Aalo Kanaan batii ba niawɛ ni ninfa, ni aayɔ nwu aata obisankobi nɔɔ wɔ niale ni Solomon ɔsɔfɔ fɛ osiɛsa lɛkyɛsaa* nɔɔ nɛ. 17 Ninfɛ di Solomon lase Geser okpoo dibudi nɛ.) Aatɛ Kala kasɔ Bet Horon, 18 Baalat ku Tadmor di ɔfaafuu nwu di kasɔ nɔɔ suoto, 19 ku asaa nɔɔ ntɛkɔ sekpoo kplɛ simuu ku bakeke ba di bapɔnkɔ nnanfi ni ku bapɔnkɔ nɔɔ sekpoo- ku lɛsaa lele niakye nwɔ ni di otu alɛ ootofo ni di Yerusalem, Lebanon ku kasɔ ka kamuu suoto aatoole ni sɛka.

20 Batii ba bamuu niabu baasiɛ ni di kasɔ nwu niale Amori batii, Heti batii, Perisi batii, Hewi batii ku Yebusi batii nɛ, (batii ba mmle ditale Israel batii), 21 mma niale banantii ba niabu ni di kasɔ nwu suoto di Israel batii ditafuo ni ɔwɔɔsa nɛ- mba mmle di Solomon layɔ aabla balanle ɔkpɛ sienle nɔɔ bablatɛ, fɛ mmle dite ni bia miɛ nɛ. 22 Kafɔɔ Solomon ditabla Israel otii kuonwii ɔlanle; bakpɛtɛ nɔɔ, abaa banɔɔfotii nɔɔ, banɔɔfotii nɔɔ, bakpɛtɛ banɔɔfo, bakeke nɔɔ ba di babɔkɛɛ nnanfi ni kanyabayilatɛ ku bakatɛ nɔɔ baale. 23 Baale kafɔɔ bakpɛntɛ banɔɔfotii di Solomon sɛkpɛ kanya- baabla banɔɔfotii alafa-anɔɔ-afosi-anɔɔ niatoonyu ni batii ba niatɔɔbla ni ɔkpɛ nwu.

24 Di Farao obisankobi ladie ni di Dawid Okpoo kplɛ nwu aawa ni Solomon lɛkayo le aatofo aatɔɔ nii, aatofo kafɔɔ seyoyiɛ aasunsa ni.

25 Sitiɛ di lɛlɛɛ kamɛ di Solomon nta ofiɛ asaaɔta ku atoko ɔkyɛ ole asaaɔta di oleɔta akyikye ya aapɛ aata ni SAATE nwu, anfiɛ kafɔɔ olufui ku nnya di SAATE nwu anu. Nkpo oso aaloo olekatakɔ nwu sɛsaabla ɔbla.

26 Ɔka Solomon kafɔɔ lawola seklo di Esion Geber wɔ nintɛɛtɛɛ ni Elat di Edom, di Lekpo Sɛɛle kotoko. 27 Ni di Hiram lakpee batii nɔɔ- oklo bawantɛ ba niatofo ni Lekpo nwu kamɛ- alɛ bakyɛ kanya kanwii ku Solomon batii nɛ. 28 Baawa oklo baakyɛ Ofir kasɔ baalaayɔ koto sɛɛle fɛ bakilo nkpe lefosi-nna baawako Ɔka Solomon.