1 Di SAATE nwu ɔlaa kanya, Yaa otii onwii lakye Yuda aawa Betel, di Yeroboam layila ni di oleɔta akyikye katũ alɛ ɔɔta ni asaaɔta. 2 Ni di osuɔtɔ nwu lafaa aakakatɛ aayila di oleɔta akyikye nwu suoto aabuɛ di SAATE nwu ɔlaa kanya alɛ: "Afɔ oleɔta akyikye, oleɔta akyikye! Nnya ɔlaa wɔ di SAATE nwu kobuɛ ni alɛ: ‘Babalofo obisuɔtɔbi onwii manta Dawid leyo, manlɛɛ nwɔ Yosia. Di suoto lɛfɔ di SAATE nwu kamayɔ olebatatɛ ba di ntakalekɔ nwu ninta ni asaaɔta ninfũ anta ole nɛ. Manfiɛ batii akufi kafɔɔ di suoto lɛfɔ.’ " 3 Di dii nwu nkpo kale, Yaa otii nwu lata dituosaa ninwii alɛ: "Nle mmle ninle dituosaa nwu di SAATE nwu lebuɛ ni nɛ: Bababɛ oleɔta akyikye nwu mantɛ, manlɛ ntɔ̀ nwu di suoto ninya manwii."

4 Di obe wɔ di Ɔka Yeroboam lanu ni Yaa otii nwu lɛkakatɛ di oleɔta akyikye ya di Betel suoto yi, ni di ɔka lananfi kɔnɛɛ nɔɔ di oleɔta akyikye nwu suoto aakyɔɔ osuɔtɔ nwu aabuɛ alɛ, "Bimufũ nwɔ!" Kafɔɔ kɔnɛɛ ko aananfi aakyɔɔ ni Yaa otii nwu lakpi, nioso ɔka nwu ditasinfuo kũ okplesa. 5 Oleɔta akyikye nwu kafɔɔ labɛ aate, ni di ntɔ̀ nimi lanyɛɛnɛ diawii, di dituosaa le di Yaa otii nwu lata ni di SAATE nwu ɔlaa kanya nɛ.

6 Ninfɛ di ɔka nwu latɔkɔ Yaa otii nwu alɛ, "Tikiti SAATE, Yaa lɛfɔ lekoto, faapɛ ɔlaa fatɛɛ, di kɔnɛɛ nii kukple di akpa ninkũ." Nioso Yaa otii nwu latikiti SAATE nwu lekoto, ni di ɔka nwu kɔnɛɛ lakple di akpa ninkũ, kuate fɛ mmle kuate ni saa nɛ.

7 Ni di ɔka nwu latɔkɔ Yaa otii nwu alɛ, "Wa buɔkyɛ leyo ninaata fɔ lɛsaa fale, kamata fɔ kafɔɔ lɛkyɛsaa."

8 Kafɔɔ Yaa otii nwu latɔkɔ ɔka nwu alɛ, "Bia kuntɛ fɛɛtɛɛ asaa ya ninkpe fɔ ni kakyɛ yi, namatikanko fɔ, ee nle alesaa ee nnyi ntu ninfũ. 9 Diekye SAATE nwu ɔlaa lakpee mi kufiofa alɛ: ‘Tanle alesaa ee tannyi ntu ee faakple faafe di osuku wɔ faafe faawa nii.’ " 10 Nioso osuku bamba aafe, atasinfe aakple di osuku wɔ aafe aawa ni Betel.

11 Di obe nwu kamɛ, Yaa ɔlaabuɛtɛtɛ kofole onwii lasiɛ di Betel, ni di babisuɔtɔbi nɔɔ lawa baabatɔkɔ nwɔ asaa ya amuu di Yaa otii nwu labla ni ninfa dii nwu nɛ. Baatɔkɔ ote lɛma kafɔɔ sɛlaa se aatɔkɔ ni ɔka. 12 Ni di ote lɛma lakaalɛ ma alɛ, "Ɔmɛnsuku aafe?" Ni di babisuɔtɔbi nɔɔ nwu latuo nwɔ osuku wɔ di Yaa otii nwu niakye ni Yuda lafe ni nɛ. 13 Nioso aatɔkɔ babisuɔtɔbi nɔɔ alɛ, "Bilolaa bɔkɛɛ nii wɔ nintuka ni atoo bitɛɛ." Obe wɔ baalolaa bɔkɛɛ wɔ nintuka ni atoo baatɔɔ nii, ni aayie aasiɛ 14 nwɔ di suoto, ni aati Yaa otii nwu sɛɛmaa nɛ. Ɔlaabuɛtɛtɛ nwu lalaanya Yaa otii nwu nsi di kowoso kplɛ kunwii kalɔ, ni aakaalɛ nwɔ alɛ, "Afɔ ninle Yaa otii wɔ niakye ni Yuda nɛ?"

Ni aadiki kanya alɛ, "Ami nɛ."

15 Nioso ɔlaabuɛtɛtɛ nwu latɔkɔ nwɔ alɛ, "Wa buɔkyɛ leyo faalaale alesaa."

16 Ni di Yaa otii nwu latɔkɔ nwɔ alɛ, "Namasinkple nkpaamaa, ntikanko fɔ, ee nle alesaa ee nnyi ntu ku afɔ di lɛba le mmle. 17 SAATE nwu ɔlaa latɔkɔ mi alɛ: ‘Tanle alesaa ee tannyi ntu ninfa ee tankple faafe di osuku wɔ faafe faawa nii.’ "

18 Ninfɛ di ɔlaabuɛtɛtɛ kofole nwu labuɛ alɛ, "Ami kafɔɔ ɔlaabuɛtɛtɛ nle, fɛ mmle fale nii. Ni di Yaa tɔkyɛntɛ onwii lɛtɔkɔ mi di SAATE nwu ɔlaa kanya alɛ: "Kplesa nwɔ fawako leyo lɛfɔ ku nnwɔɔ, alɛ aabale alesaa, aanyi ntu.’ " (Kafɔɔ ɔkyɔnkyɔ aatɔɔkyɔnkyɔ nwɔ.) 19 Nioso Yaa otii nwu lakple aatikanko ɔlaabuɛtɛtɛ kofole nwu, aalaale, aanyi ntu di leyo nɔɔ.

20 Di obe wɔ basi ni di opunu katũ, SAATE nwu ɔlaa lawa kuata ɔlaabuɛtɛtɛ kofole nwu niakplesa ni Yaa otii nwu. 21 Ni aafaa aatɔkɔ Yaa otii nwu niakye ni Yuda aawa ni alɛ, "Nnya ɔlaa wɔ di SAATE nwu kobuɛ ni alɛ: ‘Feesĩ SAATE nwu ɔlaa onu, faale kafɔɔ kufiofa ko di SAATE, Yaa lɛfɔ lata fɔ nii. 22 Feekple fɛɛwa fɛɛbale alesaa, feenyi ntu di lɛba le aatɔkɔ fɔ alɛ tanle, faanyi nii. Nkpo oso blɔbakookaa kpi lɛfɔ di bate lɛfɔ kakookaakɔ.’ "

23 Di Yaa otii nwu laloo ni ole ku onyi, ni di ɔlaabuɛtɛtɛ kofole wɔ niakplesɔɔ ni lalolaa nnwɔɔ omu bɔkɛɛ wɔ nintuka ni atoo aatɔɔ nɛ. 24 Obe wɔ di Yaa otii nwu layefe ni osuku, kyata onwii lakyakako nwɔ di osuku, aalo nwɔ, ni aafuki kpi nɔɔ aatɛ di osuku, ni di bɔkɛɛ wɔ nintuka ni atoo ku kyata nwu layila nwɔ di ɔlɔɔkɔ nɛ. 25 Ni di batii ba bawo niafe ni ninfa lanya kpi nɔɔ nwu baafuki baatɛ ni ninfa, di kyata layila ni di kpi nwu ɔlɔɔkɔ. Ni baakyɛ baalaabuɛ di okpoo kplɛ wɔ di ɔlaabuɛtɛtɛ kofole nwu lasiɛ ni nɛ.

26 Obe wɔ di ɔlaabuɛtɛtɛ wɔ niakplesa ni Yaa otii nwu lanu nwu ni ole, ni aabuɛ alɛ, "Yaa otii nwu niasĩ ni SAATE nwu ɔlaa onu. Ni di SAATE nwu ntɔɔyɔ nwɔ ɛɛta kyata nwu, atɔɔbɛbɛɛ nwɔ eelo, fɛ mmle di SAATE nwu ɔlaa lafunaa nwɔ ni nɛ."

27 Ni di ɔlaabuɛtɛtɛ nwu latɔkɔ babisuɔtɔbi nɔɔ alɛ, "Bilolaa bɔkɛɛ wɔ nintuka ni atoo bitɛɛ," ni baabla nkpo nɛ. 28 Ninfɛ aakyɛ aalaanya Yaa otii nwu kpi baafuki baatɛ ni di osuku, di bɔkɛɛ wɔ nintuka ni atoo ku kyata n-yɛ nwɔ ni di ɔlɔɔkɔ nɛ. Kyata nwu ditawee kpi nwu ee abɛbɛɛ bɔkɛɛ wɔ nintuka ni atoo. 29 Nioso ɔlaabuɛtɛtɛ nwu lakɛnkɛ Yaa otii nwu kpi aatika di bɔkɛɛ nɔɔ wɔ nintuka ni atoo suoto, aakplesa nwɔ aawako okpoo nɔɔ omu, aabawi nwɔ aakookaa. 30 Ninfɛ baawi nwɔ baabuɛ alɛ, "Oo obiloo-suɔtɔbi!" Ni baalaakookaa nwɔ di nnwɔɔ ɔlaabuɛtɛtɛ nwu omu ɔkya kamɛ nɛ.

31 Baakookaa nwɔ baaloo nii, ni di ɔlaabuɛtɛtɛ nwu latɔkɔ babisuɔtɔbi nɔɔ alɛ, "Nse lekpi, biekookaa mi di ɔkya wɔ kamɛ baakookaa ni Yaa otii nwu; biɛtɛ akufi nii di akufi nɔɔ ɔlɔɔkɔ. 32 Diekye ɔlaa wɔ aabuɛ ni di SAATE nwu ɔlaa kanya, aayila ni di oleɔta akyikye ya di Betel suoto, aayila ni kafɔɔ di nfiofa be mmuu di ntakalekɔ nwu suoto di Samaria sekpoo kamɛ kamawa kaanya."

33 Kafɔɔ bia di nle mmle sɛmaa, Yeroboam ditakyi di sisuku kpile nɔɔ nwu suoto, kafɔɔ aakple aase olebatatɛ aakyeko batii bamuu kamɛ aata ntakalekɔ nwu. Olele niamiɛ alɛ oole oletatɛ yi, aakleklesɔɔ ata ntakalekɔ nwu. 34 Nle mmle niale Yeroboam leyo batii okpile wɔ niata ni diabiɛ ni ku kawɔɔ nini di kasɔ ka mmle suoto nɛ.