1 Di obe wɔ di Yeroboam obisuɔtɔbi Abigya labuo ni ofiɛ, 2 ni di Yeroboam latɔkɔ ɔsɔfɔ nɔɔ omu alɛ, "Kyɛ faalaanyukũ asaa bamba, di mmle manamatofo fɔ ni alɛ Yeroboam ɔsɔfɔ fale ni. Ni faakyɛ Silo. Ɔlaabuɛtɛtɛ Ahiya nkpe ninfa- nnwɔ niatɔkɔ mi ni alɛ kamale ni ɔka di batii ba mmle suoto. 3 Yɔ bloblo akudi lefosi ku kaklo kawo ku bablɔ dikuuku faklee, faakyɛ ɔkyɛ nɔɔ. Abatɔkɔ fɔ lɛsaa le nimawa ni di osuɔtɔbi nwu suoto." 4 Nioso Yeroboam ɔsɔfɔ labla fɛ mmle aatɔkɔ nwɔ nii, ni aakyɛ Ahiya leyo di Silo nɛ.

Di obe nwu kamɛ, Ahiya diloosinnya; anu nɔɔ ntoobiɛ, ta lebe oso. 5 Kafɔɔ SAATE nwu latɔkɔ Ahiya alɛ, "Yeroboam ɔsɔfɔ kɔwa amakaalɛ fɔ ɔlaa di obisuɔtɔbi nɔɔ suoto, diekye oofiɛ, nioso tɔkɔ nwɔ mmle ku mmle. Nse ɛɛbabuo, abakũ ambla fɛ otii owo dile."

6 Nioso obe wɔ di Ahiya lanu ni ɔsanko nwu nkpaa lɛnafu di kayoko nɔɔ, ni aabuɛ alɛ, "Yeroboam ɔsɔfɔ, buo fawa. Be oso feekũ fɛɛbla mmle? Beekpee mi ɔkyɛ lɛfɔ ku ɔlaa kpile. 7 Kyɛ faalaatɔkɔ Yeroboam falɛ, nnya ɔlaa wɔ di SAATE, Israel Yaa nwu kobuɛ ni alɛ: ‘Ami niediki fɔ lekyeko batii nwu kamɛ, lɛbla fɔ tunletɛ di batii nii Israel suoto. 8 Labɛ sɛka kalekɔ nwu di Dawid leyo suoto, layɔ lata fɔ, kafɔɔ faate fɛle kpɛmblatɛ nii Dawid, nnwɔ niale ni afiofa nii, aatikankoe ni ku otu nɔɔ omuu, aatɔɔbla ni nle niasiɛko ni di anu nii. 9 Fatɔɔbla okpile falenke mba bamuu nintoosiɛ ni fiɛ di afɔ. Fɛɛbla bayaa bamba fɛɛta suoto lɛfɔ, afiɔ ya bɛɛbla ni ku abɔɔsaa; fatookpee mi ɔblɔ, feefuki mi feeyu di sɛmaa lɛfɔ.

10 " ‘Ta nle mmle oso, kamata ɔlaa kpile nwa di Yeroboam leyo suoto. Kamalo Yeroboam osuɔtɔ yɛntɛle biala ndiki di Israel- ɔlanle ee nnwɔ ninsiko ni suoto. Kamafiɛ Yeroboam leyo fɛ mmle di otii nfiɛ ni sɛsɔ, ninaase di obe wɔ di simuu nloo nii. 11 Baweewee kamawee mba ninle ni Yeroboam bale ba nimakpi ni di okpoo kplɛ nwu kamɛ. Kɔfɛɛfɔ bakansiɛ kafɔɔ kamakyɔkyɔfɛ mba niekpi ni di lepoo kamɛ. SAATE nwu niɛkakatɛ!’ 12 "Afɔ yi, kple fatɔɔkyɛ leyo. Nse feese kɔkpaa di okpoo kplɛ lɛfɔ nwu kamaa, osuɔtɔbi nwu kamakpi. 13 Israel omuu kamawi nwɔ mankookaa nwɔ. Nnwɔɔ lete ninle otii wɔ ninle ni Yeroboam ole babakookaa ni nɛ. Diekye lete nɔɔ ninle Yeroboam leyo kamɛ otii wɔ kamɛ di SAATE, Israel Yaa nwu lɛnyako ni lɛsaa biene nɛ.

14 "SAATE nwu kamase ɔka anta suoto nɔɔ di Israel suoto, nnwɔ nimawɔɔsa ni Yeroboam leyo batii. Nle mmle ninle dii nwu nɛ! Bee-ye? Nwaako, bia kanunua. 15 SAATE nwu kafɔɔ kamananfi Israel kootoko, alɛ dibate fɛle mmle di lɛnwaakɛ nkpankpa ni di ntu kamɛ. Ansifi Israel andiki di kasɔ biene ka mmle aata ni bawa lɛma, ansamiisa ma ankpete di Eufrat okle kamaa, ta baakpee ni SAATE nwu ɔblɔ, baase ni Asera sewoso oso. 16 SAATE nwu kamadiki Israel anta, ta sikpile se di Yeroboam labla ni, aata kafɔɔ Israel labla ni oso."

17 Ninfɛ di Yeroboam ɔsɔfɔ lataka aasifi Tirsa nɛ. Di obe wɔ di ɔsanko nwu lase ose kɔkpaa di leyo nwu kayokontũ, ni di osuɔtɔbi nwu lakpi nɛ. 18 Ni di Israel batii bamuu lawi nwɔ, baalaakookaa nwɔ, fɛ mmle di SAATE nwu labuɛ aafenko ni di kpɛmblatɛ nɔɔ, Yaa ɔlaabuɛtɛtɛ Ahiya suoto nɛ.

19 Yeroboam sɛka ole sɛsaabla bamba, nkpɛ nɔɔ ku mmle aale ni sɛka yi, bɛɛkpana nya di Israel baka sekofolaa kukũ kamɛ. 20 Aale sɛka alɛɛ afosi-anyɔ-anyɔ, ninfɛ aatɛ ɔnyɛɛ ku bate nɔɔ nɛ. Ni di obisuɔtɔbi nɔɔ Nadab layila nwɔ kaanya fɛ ɔka nɛ.

21 Solomon obisuɔtɔbi Rehoboam lale ɔka di Yuda. Alɛɛ afosi-ana-ninwii aafũ fiɛ aabale ɔka, ni aale sɛka alɛɛ lefosi-akuɛnsĩ di Yerusalem, okpoo kplɛ wɔ di SAATE nwu ladiki ni di Israel ana nwu amuu kamɛ, aayɔ Leyooto nɔɔ aatɛ nii. Rehoboam ɔya leyooto niale Naama nɛ, Amon otii aale.

22 Ni di Yuda batii labla dikpilesaa di SAATE nwu anu nɛ. Baabla sikpile baalenkee nse di bate lɛma labla nii, baata SAATE nwu sɛsɔfɔwo ɔkpɛ ɔblɔ lataka osie kanya. 23 Baabla kafɔɔ ntakalekɔ, afiɔtii ku Asera sewoso di lekpenkpe takale biala ku kowoso biala niefukuti ni kalɔ baata suoto lɛma. 24 Bia nfiofa basɔnɔbakpeetɛ basuɔtɔ lawɛ di kasɔ nwu suoto; batii nwu layɔ suoto baakpee di nnle be di SAATE nwu latososa ni di Israel batii anu ayududusaa amuu ɔbla kamɛ.

25 Di Ɔka Rehoboam lɛlɛɛ nɔɔnle kamɛ yi, Egipte ɔka Sisak labakpɛko Yerusalem. 26 Aatuka lɛsaawɛ le di SAATE nwu olekatakɔ ku lɛsaawɛ le di lɛkayo aasifiko. Aayɔ lɛsaa biala, di koto sɛɛle kubiafunsaa ya amuu di Solomon labla ni lasiɛ ni kaamɛ. 27 Nioso Ɔka Rehoboam labla abɔɔsaa kubiafunsaa aase di nnya nkpo kanya, ni aayɔ nya aata banyuntɛ ba di lɛkayo kayoko kanyabayilatɛ nɛ. 28 Obe lele di ɔka kɔkyɛ SAATE nwu olekatakɔ yi, banyuntɛ nwu nklee kubiafunsaa nwu, nni sɛmaa, mankplesa nya manaatɛ di banyuntɛ nwu leyo.

29 Yeroboam sɛka ole sɛsaabla bamba ku n-ya amuu aabla nii, bɛɛkpana nya di Yuda baka sekofolaa kukũ kamɛ. 30 Kakpɛ sɛlaa lasiɛ di Rehoboam ku Yeroboam ntɛɛ obe lele. 31 Ni di Rehoboam latɛ ɔnyɛɛ ku bate nɔɔ, baakookaa nwu ku mma di Dawid Okpoo kplɛ nwu nɛ. Rehoboam ɔya leyooto niale Naama nɛ; Amon otii aale. Ni di obisuɔtɔbi nɔɔ Abigya layila nwɔ kaanya fɛ ɔka nɛ.