1 Dawid lalɛɛ Israel banɔɔfotii bamuu aasiisa di Yerusalem: banɔɔfotii di ana nwu kanya, bakpɛtɛ akudi kanyabayilatɛ ba nimbla ni ɔka sɛkpɛ, bakpɛtɛ nkpe kanyabayilatɛ ku bakpɛtɛ alafa kanyabayilatɛ, banɔɔfotii ba niayila ni di lɛsaawɛ nimuu ku babɔkɛɛ sele ba niale ni ɔka ku babisuɔtɔbi nɔɔ bale kanya, diakyakaa ni di lɛkayo banɔɔfotii, basuɔtɔ sientɛ ku bakpɛtɛ ba niawɛ ni sɛkambi bamuu.

2 Ni di Ɔka Dawid lataka aayila ninkpaa nɔɔ suoto aabuɛ alɛ: "Bikyɔɔ mi atoko, babiloo ku batii nii. Diasiɛ mi di otu nlɛ katofo leyo fɛ ɔnyɛɛ katɛkɔ nta SAATE nwu kanya ninii lɛlakaa, nta Yaa loo nkpaa ditikasaa, ni labla disibu nlɛ kotofo ni nɛ. 3 Kafɔɔ Yaa latɔkɔ mi alɛ, ‘Diele afɔ nimatofo leyo fanta Leyooto nii, diekye kpɛtɛ fale, fatoowii ni ntɔ kafɔɔ.’

4 "Kafɔɔ SAATE nwu, Israel Yaa lediki mi di leyo nii nimuu kamɛ alɛ nle ɔka di Israel omuu suoto dinaa ni kaloo. Eediki Yuda fɛ tunletɛ, ni eediki leyo nii kamɛ kafɔɔ eekyeko Yuda leyo kamɛ nɛ, ni di teemi babisuɔtɔbi kamɛ kafɔɔ yi, lebuo nwɔ anu ni eese mi sɛka di Israel omuu suoto nɛ. 5 Di babisuɔtɔbi nii bamuu kamɛ- di SAATE nwu kafɔɔ latɛɛ ni kpinwu yi- atoodiki obisuɔtɔbi nii Solomon alɛ asiɛ di SAATE nwu sɛka kalekɔ lɛkakpomii di Israel suoto. 6 Aatɔkɔ mi alɛ: ‘Obisuɔtɔbi lɛfɔ Solomon ninle nnwɔ nimatofo ni leyo nii ku nflɔnkɔ nii nɛ, diekye ntodiki nwɔ nlɛ ale mi obisuɔtɔbi, ni ami kafɔɔ kamale nwɔ kote. 7 Kamase sɛka kalekɔ nɔɔ dinaa ni kaloo nse aakyi di sɛsaabla nii ku afiofa nii sɛmaa, fɛ mmle bɔɔbla ni di obe wɔ mmle kamɛ.’

8 "Nioso kanunua kɔta ye mintofo di Israel omuu, ku SAATE nwu kasiisakɔ anu, di Yaa loo kafɔɔ konu ni nlɛ: Bilolaabinyu bietikanko SAATE nwu Yaa lee afiofa amuu, alɛ biayɔ kasɔ biene ka mmle, min-yɔ ka kafɔɔ mintɛ banantii lee fɛ atesaa dinaa ni kaloo.

9 "Ni afɔ, obisuɔtɔbi nii Solomon, tofo teefɔ Yaa nwu, faayɔ okyiini fasumu nwɔ kafɔɔ ku otu lɛfɔ omuu ku disibu le niɛyɔ nwu ni ole, diekye SAATE nwu nnyunyuu otu biala kamɛ antofo kafɔɔ otii disibu biala. Nse feewolaa nwɔ yi, fabanyɔɔ; kafɔɔ nse feediɛ nwɔ nnɛɛ, abasĩ fɔ dinaa ni kaloo. 10 Kanunua lolaafanyu, diekye SAATE nwu ntoodiki fɔ alɛ tofo Olekatakɔ fɛ kakleklekɔ. Wɛ osie faabla ɔkpɛ nwu."

11 Ninfɛ di Dawid layɔ olekatakɔ nwu lɛkpata, otofo nini, asaa ntɛkɔ nini, osi nini aba, ayo ya kaamɛ nini ku lɛba le baayɔɔ sikple mankyɛ nii otofo letembi akũ aata obisuɔtɔbi nɔɔ Solomon nɛ. 12 Aatɔɔ kafɔɔ atembi ya amuu di Ninwuna nwu layɔ aakpee nwɔ ni diisi aata ni SAATE nwu olekatakɔ kaflɔnkɔ ku ayo ya amuu niɛmana nya eekyi ni aata ni Yaa olekatakɔ kotontɛkɔ ku asaa ya beekleklesa ni ntɛkɔ. 13 Aatɔɔ afiofa di olebatatɛ ku Lewi batii akudi nwu suoto, ku kasumu ɔkpɛ wɔ omuu bababla ni di SAATE nwu olekatakɔ, diɛkyakaa ni ku awansaa ya amuu babablako ni ɔkpɛ di kasumu kamɛ. 14 Aabuɛ kafɔɔ koto sɛɛle onutũ wɔ nimawo ninta ni koto sɛɛle awansaa ya amuu babablako ni kasumu ateate sɛkpɛ, ku koto fututu onutũ wɔ nimawo ninta ni koto fututu awansaa ya amuu babablako ni kasumu ateate sɛkpɛ aatɛ. 15 Aabuɛ koto sɛɛle onutũ wɔ nimawo ninta ni koto sɛɛle kandiɛ atikasaa ku bakandiɛ ninya ku onutũ nini diata ni kandiɛ ditikasaa biala ku bakandiɛ nini; ku koto fututu onutũ diata ni koto fututu kowesee kandiɛ ditikasaa biala ku bakandiɛ nini, di mmle kanya baablako ni kandiɛ ditikasaa biala ɔkpɛ; 16 koto sɛɛle onutũ diata ni opunu wɔ mantika ni bloblo wɔ beekleklesa ni; koto fututu onutũ diata ni koto fututu sipunu; 17 koto sɛɛle nwaa onutũ diata ni amunikĩisaa, babɛɛsi ku akuuku; koto sɛɛle onutũ diata ni koto sɛɛle lɛkaku biala; koto fututu onutũ diata ni koto fututu lɛkaku biala; 18 ku koto sɛɛle ko baase ni lefoto diata ni olufui oleɔta akyikye. Aatɔɔ kafɔɔ keke wɔ di bapɔnkɔ nnanfi ni letembi, dile ni koto sɛɛle bakerubim ba ninfukuti ni afoko lɛma kafɔɔ mantĩi ni SAATE nwu kanya ninii lɛlakaa.

19 Ni di Dawid labuɛ alɛ, "N-ya mmle amuu nle kɔkpana ko niekye ni SAATE nwu kɔnɛɛ ko nintika mi ni di suoto nfũ, ni ɛɛtɛɛ lɛsɔnu di ɔkpɛ nwu letembi sisuku simuu suoto nɛ."

20 Dawid lakple aatɔkɔ obisuɔtɔbi nɔɔ Solomon alɛ, "Wɛ osie ku sɛkambi, faabla kafɔɔ ɔkpɛ nwu. Tan-yɛkɛ ee faata nnɛɛ lafee fɔ, diekye SAATE Yaa nwu, Yaa nii nsiko fɔ. Ɔlɔbadiɛ fɔ ee asĩ fɔ diɛlaase di obe wɔ di ɔkpɛ nwu omuu diɛta ni SAATE nwu olekatakɔ kasumu nwu leloo nii. 21 Olebatatɛ ku Lewi batii akudi nwu ntoololaa suoto bɛɛta ɔkpɛ nwu omuu di Yaa olekatakɔ nwu, otii biala kafɔɔ nietuna aye ni kɔnɛɛ kamɛ ɔkpɛ lele kamakyakaako fɔ di ɔkpɛ nwu omuu kamɛ. Banɔɔfotii ku batii nwu bamuu kamakyɔɔ ɔlaa lɛfɔ biala kotoko."