1 Satana lataka aayila di Israel batii suoto, ni aakpee Dawid kadu alɛ akà Israel batii nɛ. 2 Nioso Dawid latɔkɔ Yoab ku bakpɛtɛ kanyabayilatɛ alɛ, "Bikyɛ biɛlaaka Israel batii, diɛyɔ ni di Beer-Seba diɛlaadu ni Dan. Biekple biwa bibatɔkɔ mi di mmle kaatofo ni lɛpɔ lɛma."

3 Kafɔɔ Yoab ladiki kanya alɛ, "SAATE nwu ata bakpɛtɛ nɔɔ bapɔ̀ di kɔlafa kamɛ bawaalɛsa. Saate nii ɔka, bamuu diele saate nii kalɔ basi? Obe oso di saate nii komiɛ alɛ abla nle mmle? Obe oso ɔɔyɔ lɛpɔɔ okpi anwako di Israel suoto?"

4 Kafɔɔ, ɔka ɔlaa wɔ aabuɛ ni lalenkee Yoab ole; nioso Yoab lasifi aalaakyi Israel omuu aakple aawa Yerusalem. 5 Ni di Yoab lawa aabatɔkɔ Dawid bakpɛtɛ nwu lɛpɔ nɛ: Batii ba niawɛ ni di Israel baafuo ni kapamii oklee bamuu labla kabialɛ kanwii-nkpe kɔlafa, diakyakaa ni di nkpe alafa-ana-nkpe-afosi-akuɛnsĩ ba niawɛ ni di Yuda nɛ.

6 Kafɔɔ Yoab ditaka Lewi ku Benyamin banantii aakyakaa di mba aakà ni kamɛ, diekye ɔka ɔlaa nwu lale mbusuo ɔlaa kuatɔɔ. 7 Ɔlaa wɔ mmle kafɔɔ lale dikpilesaa di Yaa anu; nioso aananfi Israel kootoko.

8 Ninfɛ di Dawid latɔkɔ Yaa alɛ, "Ntɔbla okpile osie kanya di nle mmle lɛbla ni suoto. Kotikiti fɔ lekoto, yɔ kpɛmblatɛ lɛfɔ lɛpɔɔ okpi fakyɛ nwɔ. Lɛtɛ lɛbla dibuusaa."

9 Ni di SAATE nwu latɔkɔ Dawid asaanyantɛ Gad alɛ, 10 "Tɔɔkyɛ faalatɔkɔ Dawid falɛ, ‘Nnya ɔlaa wɔ di SAATE nwu kobuɛ ni alɛ: Kɔtɛ asaa atiɛ di anu lɛfɔ. Diki ninwii lɛma alɛ kayɔ nwu mblako ɔkpɛ di suoto lɛfɔ.’ "

11 Nioso Gad lakyɛ Dawid nfũ ni aalaatɔkɔ nwɔ alɛ, "Nnya ɔlaa wɔ di SAATE nwu kobuɛ ni alɛ: ‘Diki nle ninlɛ fɔ ni: 12 kɔka kukpɛ alɛɛ atiɛ ɛɛ, sɛɛ balo lɛfɔ bakpɛ fɔ awɛntɛ atiɛ fantoototoso di anu lɛma, di mpamii lɛma dilenkee fɔ ɛɛ, sɛɛ SAATE nwu kapamii kakpɛ fɔ ayi atiɛ- di ofiɛ kpile ayi kamɛ di kasɔ nwu suoto, di SAATE nwu tɔkyɛntɛ odieko wɔ abadieko ni Israel di kakɔ biala.’ Ni kanunua, bu nwu disi mmle ninnaatɔkɔ ni nnwɔ niekpee mi ni kɔtɔ."

13 Ni di Dawid latɔkɔ Gad alɛ, "Nsi di nimiina kplɛ kamɛ. Tɛɛ mbuo di SAATE nwu nnɛɛ, diekye nyaami nɔɔ ɔnya lɛtɛ dipɔ; kafɔɔ atantɛɛ labuo di batii nnɛɛ."

14 Nioso SAATE lata ofiɛ kpile lawa di Israel suoto, ni di batii nkpe afosi-akuɛnsĩ di Israel lakpi nɛ. 15 Ni di Yaa lakyesee tɔkyɛntɛ onwii alɛ alaawɔɔsa Yerusalem nɛ. Kafɔɔ obe wɔ di tɔkyɛntɛ nwu latɔɔbla ni nkpo yi, SAATE nwu lanya nwu, ni aabuo sɛnyaami ta letoko naanfi nwu oso, ni aatɔkɔ tɔkyɛntɛ wɔ niatɔwɔɔsa ni batii nwu alɛ, "Nfɛ dipɔ! Kplesa kɔnɛɛ lɛfɔ." Obe nwu SAATE nwu tɔkyɛntɛ nfɛ n-yɛ di Ornan, Yebus otii nwu kakpaa.

16 Ninfɛ di Dawid latakatɛ anu aanyu osi, ni aanya SAATE nwu tɔkyɛntɛ n-yɛ di osi ku kasɔ obo, aabɔkɔtɛ kapamii aakle di kɔnɛɛ nɔɔ aakyɔɔ Yerusalem. Ni di Dawid ku banɔɔfo nwu niaklee ni aboko, baafuusa anu kaasɔ nɛ.

17 Ninfɛ di Dawid latɔkɔ Yaa alɛ, "Diele ami niadiki kanya nlɛ bakà bakpɛtɛ nwu? Ami ninle nnwɔ niabla ni okpile, ninanlolaa mbla ni nɛ. Mba mmle bafoso ko bale. Obe bɛɛbla? Oo SAATE Yaa nii, ta letokonanfi lɛfɔ diwa di ami ku leyo nii batii suoto, kafɔɔ tanta ofiɛ kpile wɔ mmle latika di batii lɛfɔ suoto."

18 Ninfɛ di SAATE nwu tɔkyɛntɛ nwu ladiki Gad kanya alɛ atɔkɔ Dawid alɛ akata akyɛ aalaapɛ oleɔta akyikye ata SAATE nwu di Ornan, Yebus otii nwu kakpaa nɛ. 19 Nioso Dawid lakata aakyɛ di atoko ɔkyɔɔ kamɛ di ɔlaa wɔ di Gad labuɛ ni di SAATE nwu leyooto kamɛ.

20 Obe wɔ di Ornan latɔɔfɛɛlɛ ni kamɔɔ, aamunikĩi, ni aanya tɔkyɛntɛ nwu nɛ; babisuɔtɔbi nɔɔ bana ba niawɛ ni ku nnwɔɔ lawofasa suoto lɛma. 21 Ni di Dawid latɛɛtɛɛ Ornan, ni di Ornan latakatsa anu, ni aanyɔɔ nɛ, ni aakyɛ̀ di kakpaa nwu aalaawakasɔ di Dawid anu aase katũ nɔɔ kaasɔ nɛ.

22 Ni di Dawid latɔkɔ nwɔ alɛ, "Tɛɛ kakpaa lɛfɔ nwu nimpɛ oleɔta akyikye nta SAATE nwu, alɛ ofiɛ kpile nwu di batii suoto kaadiɛ. Sunsũ ka fatɛɛ di mmle di kɔya nika nte ni kanya."

23 Ninfɛ di Ornan latɔkɔ Dawid alɛ, "Yɔ ka! Ta saate nii ɔka abla lɛsaa lele ninlɛ nwɔ ni. Nyu lo, kamata banankyue-suɔtɔ diɛta ni ofiɛ asaaɔta, kakpaa sewoso diɛta ni ntɔɔni, kamɔɔ kafɔɔ kɛɛta ni alesaa asaaɔta. Kamata n-ya mmle nwu amuu."

24 Kafɔɔ Ɔka Dawid latɔkɔ Ornan alɛ, "Kpaoo, namatuna, kamaya ka di kɔya nika kanya. Namayɔ lɛsaa le ninle ni lele fɔ nta SAATE nwu, ee nta ofiɛ asaaɔta oleɔta wɔ ninanta ni koto kukunwii."

25 Nioso Dawid lata Ornan koto sɛɛle bakilo bakuɛnsĩ di kasɔ nwu suoto. 26 Ni di Dawid lapɛ oleɔta akyikye ninfa aata SAATE nwu, aata ofiɛ asaaɔta oleɔta ku atoko ɔkyɛ ole asaaɔta nɛ. Aapɛ ɔlaa aata SAATE nwu, ni di SAATE nwu latuna aatɔɔ ku ɔtɔ wɔ niakye osi kuawa ni di ofiɛ asaaɔta akyikye nwu suoto nɛ.

27 Ninfɛ di SAATE nwu lakakatɛ aata tɔkyɛntɛ nwu, ni aakplesa kapamii nɔɔ aakpee di kopoo nika kamɛ nɛ. 28 Di obe nwu kamɛ, di Dawid lanya alɛ SAATE nwu ntootuna ɛɛtɔɔ ni di Ornan, Yebus otii nwu kakpaa nwu suoto yi, ni aatɔɔta seleɔta ninfa nɛ. 29 SAATE lɛkpaayo klekle nwu, nle di Mose lapɛ ni di ɔfaafuu kamɛ, ku ofiɛ asaaɔta akyikye nwu lawɛ di Gibeon katakalekɔ nwu di obe nwu nkpo kamɛ. 30 Kafɔɔ Dawid ditafuo ka katũ ɔkyɛ aalaawolaa Yaa, diekye aatɔɔyɛkɛ SAATE nwu tɔkyɛntɛ kapamii nwu.